ISECO, naglugi iti napalabas 3 tawen: COOP-NATCCO rep

STA. CRUZ, Ilocos Sur – Minilion ti lugi ti kooperatiba ti elektrisidad ditoy probinsia iti napalabas a tallo a tawen, daytoy ti impalgak ti pannakabagi ti COOP-NATCCO itay nabiit.

Kinuna ni COOP-NATCCO party list representative Jose Ping-ay a nagpukaw ti Ilocos Sur Electric Cooperative iti P119 milion idi 2007, nasurok a P80 milion idi 2008 ken aganay a P70 milion idi 2009, sana innayon nga imbatayna ti manipestasionna iti naited kenkuana a dokumento idi naawis a guest speaker iti general assembly nga insayangkat ti ISECO.

“Apay nga agluglugi ti ISECO? Ania dagiti contributory factors no apay nga agluglugi?” sinaludsod ni Ping-ay idinto nga innayonna a nagsalsaludsod iti dua nga opisial ti ISECO no apay nga agluglugi ti kooperatiba ngem awan ti naalana a palawag dagitoy.

“Saandak koma a pabasolen ta imbasarko ti manipestasionko kadagiti dokumento a naited kaniak,” kinuna ni Ping-ay.

Ngem iti text message manipud iti maysa nga opisial ti ISECO, kinunana a saan a pudno ti alegasion ni Ping-ay a naglugi ti kooperatiba iti napalabas a tallo a tawen.

Kasta met a kinuna ni Board Director Bong Savellano a nagsardeng koman ti operasion ti ISECO no agpayso a nagpukaw iti minilion ti kooperatiba iti napalabas a tallo a tawen. (Basaen ti kaabayna a damag).

Kinuna ti party-list representative a saan nga “at liberty” a mangiwaragawag iti naduktalanna no saan a public documents dagiti naited kenkuana ken naggapu a mismo iti ISECO.

Kinuna ni Ping-ay a kasapulan nga analisaren dagiti opisial ti ISECO dagiti makagapu iti net losses daytoy agsipud ta dagiti consumers ti kooperatiba ti agsagrap kadagitoy a pukaw.

“Sino ti agbayad iti systems loss… datayo,” kinuna ni Ping-ay. “Uray saantayo a nausar a koriente, bayadantayo latta.”

Indagadag ni Ping-ay nga agrehistro dagiti electric cooperatives iti Cooperative Development Authority agsipud ta agsagrap dagitoy kadagiti exemption kas iti VAT on distribution, vat on systems loss ken vat on nighttime rates.#