Iseserrek iti MOA para pannakaipasdek fishport, naited iti mayor

CABUGAO, Ilocos Sur – Inikkan ti sangguniang bayan ditoy nga ili iti otoridad ni Mayor Edgardo S. Cobangbang, Jr. a sumrek iti katulagan iti Philippine Fisheries Development Authority para iti pannakaipasdek ti maysa a fishport sadiay Barangay Salomague.

Segun ken ni Konsehal Benedicto Savellano, chairman iti committee on agriculture, maipasdek ti fishport iti lauden ti pagbasketbolan iti Barangay Salomague ket no kasapulan, maiwayat ti reklamasion nga aglawa iti 2,000 square meters.

Innayon ni Savellano a kiniddaw ni Vice Gov. Deogracias Victor Savellano ti nasao a proyekto manipud iti Bureau of Fisheries and Aquatic Resources idi pay la 2008 ket ita, addaanen iti pondo para iti pannakaipasdekna.

Naammuan a counterpart ti lokal a gobierno ditoy ti pannakaited iti otoridad ken ni Mayor Cobangbang a sumrek iti MOA iti PFDA, ken ti pannakaaprobar ti resolusion para iti project acceptability iti nasao a fishport manipud iti sangguniang bayan ken iti Barangay Salomague a pakaipasdekan ti nasao a proyekto.

Bimmisita iti Salomague itay nabiit dagiti marine engineers ken technical staff ti PFDA para iti inspeksion ken rebalidasion ti nasao a proyekto.#