Footer

Isisingising ken Ilelennek

Salaysay ni Jaime M. Agpalo, Jr.

(Umuna iti dua a paset)

 

Isisingising ken ilelennek. Daytoy ti panangiladawanko iti maysa a dekada ket gudua nga innak panagsursurat, partikular iti Saringit Chronicle ken iti Tawid Magasin, nga idi agangay ket napagbalin a pagiwarnak, nga isu itan ti Tawid News Magasin.

Ups and down, kunata lattan. Isisingising ken ilelennek. Ta saan kadi a kasta ti pannakalinas ti biag? Adda daydiay panawen a naraniag ket lalo pay a rumanraniag iti pannakaruros ti aldaw; ngem adda met ti panawen nga in-inut ken in-inut nga aglidem.

Isu iti innak sublian ken imutektekan dagiti tugot…

Ti isisingising. Iti kansion ni John Denver, kunana: Sunshine on my shoulders makes me happy. Pudno la unay ti kunana. Iti panawen a nasirnaat, naragsak ti amin a kanito. Kasla awan patinggana, agnanayon. Ngem kas ‘tay kunadan, ti biag ket kasla pilid nga agtultulid, no dadduma, adda iti ngato, no maminsan adda iti baba wenno iti nagtengnga. Agtulid ngarud.

Kas ‘tay kunadan, datayo met laeng ti mangaramid iti biagtayo. Adda met ngata kinapudnona, saan? Ngem no dadduma, dumteng ti saan a pannakasidasig ti limitasion ken ekspektasion, a gagangay a maamiris inton dumteng ti kidag, inton malpas ti amin.

You charge to experience, masansan a mangngeg, lalo iti tungtongan babaen ti kapadasan. Dagiti dadduma, ibilangda pay a ti padas ket isu kano ti nalaing a mannursuro.

Wen met a, awan ti naparasapas a panagtulid ti biag no awan dagiti eksperiensa wenno padas iti biag a mangibunga iti pagraragsakan.

Dayta ti makapaisem a parte ti napalabas. Saan a magatadan. Lalo iti ubet ti baso. Saan a maliklikan dagiti huntahan, debate, argumento, ken komentario kadagiti isyo iti sosiedad ken iti personal ken dadduma pay nga aspekto iti panagtitinnarabit, pagkakatawaan, pagaangtotan ken pagsisinnutilan no agsasango ken agsesesion dagiti agbabaddungalan.

Kasta idi, tunggal Sabado wenno Domingo a dumap-awak  iti Vigan, ta iti sidong dagiti kakadua, a kaadduanna ti mamaestro ken media personalities iti probinsia nga Ilocos Sur, kunaek a sabali met a padas ti maikur-it iti panid iti libro ti biag a kas pakalaglagipan iti napalabas.

Kunaek a nangitag-ay iti ammok ken kabaelak nga agsurat ti ikakappengko iti SC. Iti panangpasiarko ken Mang Badong idi 1997,  naawisak nga agsurat. Adda met nagkaduaanmi sipud pay idi early 90s isu a pinadasko nga impasaksak ti kabaelak.

Ngem ad-adda nga essem ti piksion, saan a journo; nagsursuratak iti literatura ken salaysay kadagiti nagduduma a magasin  ken pagiwarnak; nagtrabahoak iti innem a tawen kas scriptwriter iti radio,  kadagiti advertisement ken iti translation.

Ti panagsuratko iti SC ket sabali pay a padas ti biagko. Ti pannakibinnuligko kadagiti kabarbaro a kabaddungalan, ket makunak a maysa a  dakkel a lagto iti panangitatakko ti naganko iti aglinawas a pagiwarnak. Mannuratak a makuna, ngem saan nga iti ili a nakaiyanakak ket iti panagsuratko iti pagiwarnak iti probinsia ket maitutop la unay.

Uray no awan bayad dagiti sinuratko iti SC, ken itulod iti Vigan, saan a tubeng. Timmulongak iti literature section ta isu ti forte.

Iti pannakipulapolko kadagiti kabaddungalan ket pagtaudan ti ragsak, lalo kadagiti kabarbaro a maam-ammo iti national presscon, iti seminar ken kombension dagiti mannurat ken dadduma pay a panagtitipon, iti komunikasion babaen ti surat, ken iti chance conversation.

Naipasngay ti Tawid Magasin. Nagaw-awisak kadagiti papagayam a mannurat, ket adu dagiti nagipatulod iti manuskritoda, manipud iti Cagayan Valley, Cordillera ken iti Region I ken Metro Manila; timmaripnongak kadagiti miting ken seminars dagiti nagduduma a gunglo dagiti mannurat, campus writers ken educators, nagaw-awisak kadagiti agkontribiut.

Idi agangay, naawisak nga agsarita, aglektiur, makisinnukat iti kapanunotan ken dadduma pay. Makunak nga eksperiensa dagitoy a saan a magatadan.

(Maituloyto)