ISNHS, Hall of Fame iti Eskwela Brigada

VIGAN CITY –  Napadayawan manen ti Ilocos Sur National High School a best implementer iti Brigada Eskwela iti daytoy a tawen.

Daytoy ti maikatlo a tawen a nagun-od ti nasao a pagadalan ti pammadayaw nga impaay ti Department of Education iti big secundary school category iti sapasap a pagilian.

Kinuna ni Dr. Giovanni Velasco, prinsipal, nga iti daytoy a pannakapadayaw manen ti ISNHS, dua a tropeo ti awaten ti pagadalan, maysa, kas best implementer iti Eskwela Brigada ken ti maikadua, kas pannakaital-ona iti Hall of Fame gapu iti pannakagun-odna iti pammadayaw iti nagsasaruno a tallo a tawen.

“Daytoy a pammadayaw ti mangipasimudaag iti napintas a singgalut ken timpuyog dagiti amin nga stakeholders ti ISNHS, dagiti empleado, estudiante, nagannak, alumni ken dagiti lidertayo iti probinsia,” kinuna ni Velasco idinto nga impeksana ti panagyamanna kadakuada gapu iti suportada iti pagadalan.#