ISTPP, agpautang kadagiti agmulmula iti kamatis nga awan interesna (Tuloyna)

Nangrugi nga agdadael ti sumagmamano a paset ti planta a nangitunda iti saanen a pannakaproseso dagiti kamatis dagiti mannalon. Awan ti naaramid a tomato paste a mailako, ngarud di met nabayadan ti kamatis dagiti mannalon agingga a nangrikep daytoy idi 2008 tapno malapdan ti lalo pay a pannakalugi ti planta.

Saan ketdi a simmuko ni Gov. Luis “Chavit” Singson ket kalpasan ti pannakipatangna iti Italiano a supplier a ni Nuccio Saverio ti NS International Inc., itay napan a tawen, napagnummuanda a lukatan manen ti planta babaen ti panagsosioda. Nangilatang iti P55 milion ti gobierno probinsial idinto a P45 milion ti NS International Inc. iti kabuklan a P100 milion kas pangrugian. Limapulo ket lima a porsiento iti kita ti planta ti mapan iti gobierno probinsial idinto a 45 a porsiento ti mapan iti Italian investor.  Naibiahe sadiay Italia dagiti dadael a paset dagiti makinaria tapno maipasimpa idinto a nasukatan dagiti saanen a mabalin a pasetna.  Kalpasan ti sumagmamano a bulan, nailukat manen ti planta idi Abril 7, 2011.

Sakbayna, adda 240 ektaria a namulaan iti kamatis ket ti naapit manipud ditoy ti naiproseso iti panangipadasda iti planta. Babaen itoy, nakitada dagiti saan a gumana a pasetna ket nasolusionan a daras. Ita, sisasaganan ti Ilocos Sur Tomato Paste Plant para itoy sumaruno a tomato season. Addan 800 nga ektaria a nakasaganan a pamulaanda iti kamatis. Nakapatangda metten ti CDO ken Del Monte Philippines a manggatangto iti tomato paste nga aramidda. Agtultuloy met ti panangsanayda kadagiti teknisian ken mannalon tapno saan a maudi dagitoy iti benneg ti panagsukisok kadagiti teknolohia a kasapulan iti talon. Kinapudnona, kauman-uman ni Engr. Mateo dagitoy mannalon tunggal Lunes sumagmamano a bulan sakbay ti panagkakamatis tapno makapagsaganada.

 

Kapasidad ti Planta

Kabaelan ti makinaria ti ISTPP nga iproseso ti 18-20 a tonelada ti presko a kamatis tunggal oras wenno 300-400 a tonelada tunggal aldaw. Umuna, mailasin dagiti nalungsot ken berde iti weighing bridge tapno masigurado a dagiti laeng napintas ti luomna ti maipan iti dumping area. Agdiretso daytoy iti sorting area nga ayan dagiti napusgan a mangkita no adda pay laeng nakalusot a berde wenno inamag a kamatis. Sumaruno a mapan iti chopper a pakailasinan ti lasag ken maikkat ti bukel ken ukis. Maipisokton iti tangke ti tubbog tapno maluto. Maipan kalpasanna iti evaporator sa agtarus iti bagging system tapno ma-sterilize sakbay a maipisok kadagiti lata nga aglaon iti 220 a kilo. Mangalada iti sample ti naiproseso tunggal dua nga oras tapno kitaenda no nasayaat met la ti kalidadna. No makitada nga adda dagiti saan a nasayaat ti pannakalutona, maisubli dagitoy iti tangke tapno maidoble ti pannakalutona. Iti kastoy a wagas, malapdan ti nababa ti kalidadna a tomato paste a maideliver kadagiti kliente nga awan ti masayang a kamatis.

Ania ngaud, appo a mannalon iti Kailokuan, nairanta daytoy a planta tapno maaddaankayo iti madadaan a paglakuan kadagiti apityo a kamatis. Rumbeng ngarud a ditoy ti pangipananyo kadagiti maapityo. Ala, uray ta adda pay sumagmamano a bulan, inkayo metten agpalista iti ISTPP tapno mairamankayo a makaala iti financial a suporta manipud iti planta.#