Isu Met Laeng…

Kolum ni Jobert M. Pacnis

(Maikadua a Paset)

 

Maidisdissaagen dagiti inorderna a kayo idi dumteng ti maysa a motor a dua ti nakalugan. Dagitoy dagiti kakonkontakna. Ket kastoy ti naammuan ni Sabas kadakuada:

Kadagiti liplipit iti abagatan ti haywey ti nagnaan dagiti kalongkalong tapno awan unay ti makakita kadakuada.

Nagbantayda a nakamotor iti kanto iti asideg ti kuerpo ti pulisia tapno maitawagda no rummuar dagiti polis nga agturong iti yan dagiti kakaduada ket makapaglisi dagitoy.

Nayaw-awan dagiti nakakalongkalong ta sabali a nagbedngan ti nasurotda. Nagdamdamagda iti maysa nga am-ammoda a kabarangayan ni Sabas.

Naudi a naideliber ti kayo ni Sabas ta adda pay gayam inyun-una dagiti kontakna a deliberan. Ngem saan a kayo a mismo dagiti kontakna ti indeliberda no di ket dagiti kayo dagiti pannakabagi ti linteg iti ili a nangigapuanda kadagiti kayo. Adda met  gayam limed a negosio dagiti polis! Binayadanda lattan dagiti nakakalongkalong nga agideliber. Kas subadna pay, palusotenda lattan iti tsekpoint wenno saanda nga agbalin a naiget kadagitoy. Give and take a kunada!

Pagdaksanna, apaman a napagkape ni Sabas dagiti bisitana, dimteng ti ama ti barangay. Madlaw a makaunget unay. Nabaypas kano.

Kuna met dagiti agtartarikayo: Naikoordineyten kadagiti pannakabagi ti linteg ti pannakaiserrek ti kayo ditoy a deppaar ken pati iti ahensia ti gobierno a mangkitkita kadagitoy nga aramid. Ngem dinamag latta ti kapitan no asino a polis ti nakaikoordineytanna. Saan kano a mabalin ti kasta ta saan a nabagaan.

Dimmawat iti dispensar dagiti agtartarikayo. Kinuna met ni Sabas nga inallawatna laeng ti dadduma ta saan a magabenan ti pagadalan a gatangen ti sangaribu a board feet. Ken usarennanto a pangituloy iti balayna. Sa maysa, bassit laeng met ti naideliber a 300 bd.ft.

Ngem ipapilit latta ti kapitan a madi ta saan a nabagaan. Gapu itoy, inkari dagiti agideldeliber a mapanda iti balay ni kapitan ket makisaritada. Dita metten a naukas ti irteng ti rupa ti kapitan aglalo ket naammuanna no asino ti ama ti maysa kadagiti kasarsaritana.

Ket kastoy man pay ti dadduma a naammuan ni Sabas iti kakontakna iti selponna:

Ti ama ti maysa kadagiti nakakalongkalong ket dati gayam a kadua ti kapitan idi adda pay laeng iti negosio a panagtarikayo (ta sakbay a nagkapitan iti barangay da Sabas, agtartarikayo gayam ti pagsapulanna).

Masapul a mapanda iti kapitan ta sigurado nga agsapul iti para kapena. Kas met laeng kadagiti pannakabagi ti linteg. Piso kano iti kada board foot ti pannakabagida.

“Dayta ti makagapu, sir,” kunada ken Sabas, “a nangina ti kayo. Kuna ti ahensia ti gobierno a mangkitkita, mangsalsaluad iti nakaparsuaan, masapul a mangtedkami ta naimbag la kano a sukat ti bambannogda nga agpampamula kadagiti bambantay.”

Idiay kano puonna, pudno a nalaka ti kayo. Ngem tunggal agibiaheda, idiay pay laeng pagkargaan, tallo agingga kano iti lima a grupo (nagtaud iti gobierno) dagiti mapan sumarungkar. Aminda, maikkan iti pagkape. Kastanto met laengen dagiti amin a madalanan a tsekpoint iti tunggal ili. Sa inayon payen ti ama ti barangay a pinal a pakaipanan dagiti kayo.

“Isu met laeng, a, a nangina,” nakudkod laengen ni Sabas ti di met nagatel nga ulona.

Ania ngata no dagitoy nga agtartarikayo, maikkanda lattan iti naan-anay a kalintegan ket agbayadda iti umisu iti gobierno ket mapalugodanda (nga awanen ti baybayadanda pay kadagiti madalananda) nga agideliber kadagiti makasapul iti kayo? Saan ngata a nalaklaka daytoy a masapul iti panagbalay?

Iti met maseknan nga ahensia, masapul a kitaenda no umisu ti pannakaipatungpal dagiti linteg. Imonitorda no agpampamula met laeng dagiti loggers iti sukat dagiti putputdenda.

Ngem no agtultuloy ti kasta a pannagna ti sistema, saanto latta nga agresta ti itatayok ti presio dagiti tarikayo– banag a mangparigat latta kadagiti ordinario nga umili.

Change is coming koma met kadaytoy a banag.#