sinursuran-banner-sqSinursuranNi Jobert M. Pacnis

Isu Met Laeng…

SINURSURAN

Kolum ni Jobert M. Pacnis

(Umuna a Paset)

 

AWAN ti magatang a kayo!

Kastoy ti reklamo iti lugar da Sabas kadagiti naglabas a bulan. Naibusan kano iti suplay dagiti lehitimo a paggatgatangan. No adda man, nagpardas a maibus. Ket no dim’ am-ammo ti paggatangan, sigurado a saanka a makaala ta kadagiti pay laeng dadakkel ti gatangenda ti ilasinanda no adda tagilakoda.

Isu a kaaduan dagiti nagbalay ken agbalay ti agparikut iti usarenda a kayo. No met adda, kas nasaon,  nagbassit. Ken permi a nginanan. Agarup sangapulo a pisos ti ngimatuan ti maysa a board foot— banag a maysa pay a pagrigatanda iti aspeto ti pinansial ti asino man nga agpangpanggep nga agipatakder iti balay wenno pasdek nga agkasapulan iti tarikayo.

Ken tapno saan a maisardeng ti plano a panagbalay wenno panagpatarimaan, addada dagiti nagsapul iti tarikayo kadagiti barangay iti asideg ti bantay. Ammoda a ditoy, addada latta met dagiti agileblebben iti tarikayo nga inan-anusanda a pinukan ken insalog para iti bangonenda a balay wenno pagpalawa iti pagtaenganda. Laeng ta saanda a dagus mausar gapu iti kinarigat ti panagbiagda kadagita a deppaar. Maibayag sa mayurnonganda. Di kad’ mapilitanda a mangilako kadagiti tarikayo no maipitda?

Gapu ta agkasapulan ti pagadalan da Sabas (saanna a pudno a nagan) iti tarikayo para iti pannakatarimaan dagiti nadadael a pasetna ken pannakapapintas metten daytoy, kapilitan a nangkitada iti sabali a pamataudanna iti kayo. Pagsayaatanna, adda concerned citizen a nangited iti nagan ti tao a makontak. Isuda kano met laeng dagitoy dagiti agibagbagsak kadagiti furniture shop iti ili da Sabas ken kadagiti kabangibangda.

Ti laeng pagrigatan daytoy, tablon wenno saan pay a naririt dagiti kayo. Agpuskol amin dagitoy iti dos pulgada ken addaan iti nadumaduma a kaatiddog—16, 18, 20, 22, 24 a kadapan—ken kaakaba a 8, 10, 12, 14 a pulgada. Makaammonton da Sabas a mangiparirit iti kayatda a size.

Ti presio? Nalaklaka iti agingga P7 ti kada board ft ngem kadagiti magatang kadagiti puesto.  Ket no makuenta, makainut pay laeng iti bassit da Sabas uray inton agbayadda iti pannakaririt dagiti kayo.

Ket tapno maideliber kadakuada dagiti kayo, masapul a di nababbaba ngem sangaribu a board feet ti alaen da Sabas. Pagdaksanna, saan a kabaelan a bayadan daytoy ti pagadalanda ta sangkapirgis laeng ti MOOE-da. Gapu itoy, inkeddeng ni Sabas nga alaen ti gudua ti sangaribu ta uray ket masapulnanto met laeng inton ituloyna ti agpatrabaho iti masagsaginnit a maileppas a binangonna a balayda. Agurnong laeng biit sananto manen paituloy ti agpatrabaho.

Yanna laeng nga adat, naibayag sakbay a naideliber ti kayo. Kuna dagiti aglako, narigatda nga ilusot ta “nabara ti aglawlaw.” Adu dagiti mata a mangsipsiput kadakuada.

Agdua bulan ngata ti napalabas sakbay a narugian a naideliber  dagiti kayo. Rabii pay a naideliber dagitoy tapno awan ti makakita (ta inlibas la ngarud dagitoy a maibaba iti bantay).

Nayuna a naideliber ti para iti pagadalan. Ngem nagkurang daytoy a lima gasut a board feet ta saan a kinabaelan a kinarga ti dua a kalongkalong—saan a dump truck wenno bagon ti nakaikargaanda. Nagbalin a naannayas ti pannakaideliber dagitoy.

Naisaruno ti pannakabagi ni Sabas iti sumuno a rabii. Naguray iti tawag agingga iti alas dies. Ngem awan. Nariing laengen iti agarup alas singko iti agsapa iti kabigatanna. Ket dagiti agideldeliber ti kayo ti tumawtawag kenkuana.

Dagus a nagpahaywey tapno sabtenna dagitoy ta imbagada nga asidegdan. Ngem awan a naurayna dagiti agideliber kalpasan ti sangapulo a minuto. Tinawaganna iti namindua a daras ngem saandan a sumungsungbat. Indiretsona payen ti nagpaili  ta bareng masabatna ida sadiay numona ket ngannganin aglawag. Ngem awan latta. Nagsubli iti haywey iti barangayda.

Lima minuto ngata ti napalabes sakbay nga adda naawatna a mensahe. Agawid kanon idiay balayda ta addadan sadiay dagiti agideliber. Pinardasanna ti simrek iti lipit nga agturong iti pagtaenganda. Ngem awan latta a nasangpetanna dagiti agideliber iti tarikayona. Inkeddengna manen a tawagan dagiti kontakna. Awan latta ti sumungsungbat. Iti iruruarna iti lipit iti amianan ti balayda tapno agpahaywey manen, addada narangrang a silaw a sumungad iti daya.

Impagarup ni Sabas a ti kaarrubada laeng dayta ta naipasir iti lawag ti silaw a kalongkalong laeng ti sumungad. Ngem idi kuan, maipasirnan a dua a kalongkalong ti agsarsaruno nga agturong iti yanna. Isu pay laeng ti pannakakitana a kayo ti karga dagitoy.

(Adda tuloyna)