Isu ngata a maaw-awaganda iti baro a bannuar

Sinurat ni Danny Antalan

Saanko a sinurat daytoy a kolum gapu iti panangbastos ni Celia Veloso—ina ni Mary Jane—ken ni Presidente Benigno Aquino III. Saanko a sinurat daytoy tapno babalawen isuna iti panangibagana nga awan ti naitulong ti Presidente tapno maibabawi ti panaka-firing squad ni Mary Jane idiay Nusakambangan, Indonesia kalpasan a natiliwan daytoy iti 2.6 a kilogramo ti heroin. Saanko a babalawen no sinurotna nga imbaga dagiti durog a nangkaddua kenkuana, resulta ket ngaruden nga isuna ti binababalaw dagiti netizens a nangibaga iti kinaawan nakemna kas umili ti pagilian.

Ken saanko a sinurat daytoy iti panagyaman iti panakailisi ken ni Mary Jane (a kanagnagan ti maysa a maiparit nga agas) iti bitay.

Sinuratko daytoy a kaso ni Mary Jane ta kasla umapalak iti pagilian ti Indonesia iti panangidaulo ni Presidente Joko Widodo nga addaan iti political will tapno pasardengenna ti nakaro nga operasion iti pagilianda idi impatuloyna ti firing squad iti 4 a Nigerian, 2 nga Australians, 1 Brazilian ken 1 nga Indonesian. Nasuratko daytoy a kolum ta nupay adu ti pressure iti pagilian ti Indonesia a makuna a di met nabileg ngem saan a nagkurno iti pamutbuteng, pressure ken kalikagum manipud kadagiti nabibileg a pagilian a kas koma iti Australia ken Brazil.

No ar-arigen, awan pay iti kikit ti maiparit nga agas a naala ken ni Mary Jane no iyarigtayo iti panagraira ti droga ditoy pagilian. No ar-arigen, maysa a tulnek laeng kadagiti billion a kilo ken gatad ti shabu a na-raid ditoy pagilian itay napalabas a tawen. Pagaramidan ti droga a kaadduan a kukua dagiti Chinese a nagturong ditoy pagilian tapno ditoy nga agpuonan. Piman a Pilipinas, agsipud ta ma-death penalty dagitoy a Chinese idiay pagilianda, ditoy pagilian-tayon ti pagturonganda tapno ditoy nga agaramidda iti binilion a shabu wenno methamphetamine hydrochloride ta mabalinda met a tapalan iti kuarta dagiti sumagmamano a pulitiko ken pannakabagi ti linteg. Ket ania ti mapasamak kadagitoy a Chinese ken dadduma pay a puli nga agpuonan ti droga ditoy pagilian no matiliwda? Isuda pay ti agari iti pagbaludan—no dida man maisubli idiay pagilianda a China. Isuda dagiti VIP. Agkuyakoy nga aguray iti pannakaruarda. Ngem agtalinaedda iti pagbaludan, de-aircon ken Jacuzzi ti paggiananda.

Nakaay-ay-ay la ngamin, bayat a dagiti ibagbagatayo a Baro A Bannuar nga OFW ti maisaksakripisio kadagiti operasion dagiti drug dealer ken smuggler babaen iti panangaramat kadakuada, dagiti met drug pusher ditoy pagiliantayo ti agbibiag kas ari.

Malagipyo ti panag-raid ti National Bureau of Investigation ken DOJ iti panangidaulo ni Justice Secretary Leila de Lima iti pagbaludan? Ania ti natakuatanda? Dagiti anak ti salbagna a drug pusher ken smuggler ti agbibiag iti pagbaludan kas ari. Addaanda iti bukod a recording studio, addaan iti nagdakkel a LED TV, addaan iti paltog, P2 milion, addaan iti sex toys, sauna ken jacuzzi, kama, ref ken dadduma pay a kinaariod a di koman ganasen ti maysa a balud a kas kada Peter Co, Eugene Chua, Sam Li Chua, Vicente Sy, George Sy, Michael Ong, Herbert Colangco ken dadduma pay.

Apay ngata? Apay ngata a no ditoy Pilipinas, dagiti drug pusher ken drug dealer ti addaan iti nagagamar a paltog, addaan iti mansion a balay, adu gagayyemna a pulitiko ken pannakabagi ti linteg. Isuda ti addaan bileg ken proteksion. No matiliwda ket isuda pay ti addaan iti naglalaing nga abogado ket bassit la a technicality, rasonen tapno mapukaw ti kaso a naipila kontra kadakuada.

Ngem no idiay sabali a pagilian, kakaasi dagiti OFW a maar-aramat kas courier ti droga tapno maiserrek iti pagilian a nainget ti droga kas koma iti Indonesia, Saudi Arabia, China ken dadduma pay. Ket agsipud ta agbuteng dagitoy a drug smuggler a sumrek, aramatenda metten piman dagitoy ipatpatulodtayo a kas domestic helper tapno isuda ti mangiserrek iti illegal a droga. Ta no matiliw man, agkuyakoyda latta kabayatanna a ti OFW a naaramat ti maisakripisio iti firing squad, lethal injection wenno electric chair.

Ngem isu ngata nga aw-awagantayo ida a bannuar ta ngamin isuda ti maisaksakripisio kadagiti banag a pagsayaatan ti pagilianna.

Awan ngamin death penalty ditoy Pilipinas isu a naturturedda. Ania ngata no kas kainget met iti Indonesia wenno China ti pagiliantayo?

Sakbay ken ni Mary Jane Veloso, adun dagiti immun-una nga OFW a naibalud ken nakedngan a mabitay gapu iti kaso ti maiparparit nga agas idiay Middle East, Indonesia, China. Kasano a malipatan ti kaso da Sally Villanueva, Elizabeth Batain, Ramon Credo a kailiantayo nga OFW a ti kayatda la koma met ket maipaayan iti napintas a panagbiag ken narungbo a kadakuada, adda pay 41 dagiti agur-uray ken patay gapu iti droga: 21 iti China, 16 iti Malaysia, 1 iti Saudi Arabia, 2 iti Vietnam, ken 1 iti Indonesia. Ngem ti rigatna—kas koma iti Tsina—bayat a dagiti Intsik a matiltiliw ditoy ti agbibiag a kasla ari iti pagbaludan, dagiti kadaraantayo idiay pagilian-da ti agur-uray iti lethal injection.

Adunto pay dagiti sumaruno a matiliw a mainayon iti napenpenen a nakabalud a kailian a sa la maikkan ti importansia no dandanida met mabitay wenno mapaltogan babaen iti firing squad. Piman.

Maysa laeng ni Mary Jane Veloso kadagiti kakailiantayo nga OFW nga addaan nakas-ang a pakasaritaan iti ballasiw-taaw. Adu pay dagiti nakakursong iti pagbaludan nga agur-uray a maikkan koma iti sangkapirgis nga importansia manipud iti gobiernotayo.

Kas kuna ti kanta ni Nora Aunor a nairanta para iti maysa nga OFW:
Bagong Bayani, na ang sandata / Bigyan n’yo naman kami kahit na konting pag-asa.#