Isuzu Elf a nagkarga, naputputed a kayo, na-impound

SALCEDO, Ilocos Sur – Maysa nga Isuzu Elf ti saan  a pinagbiahe dagiti otoridad ditoy agsipud ta nagkarga kadagiti naputedputed a mahogany sadiay Barangay Maligcong, ditoy nga ili idi agsapa ti Enero 29.

Nagturong dagiti polis iti nadakamat a lugar kalpasan a nakaawatda iti impormasion nga adda naputedputed a mahogany a maikarkarga iti maysa nga Isuzu Elf.

Naipan ti drayber a nabigbig a maysa a Jose Randy Rabo, residente iti Barangay Poblacion Norte, Sta. Catalina, Ilocos Sur  agraman ti lugan ken dagiti kinargana iti police station para iti pannakaimbestigana.

Nupay kasta, naruk-atan met laeng ni Rabo kalpasan a nakaipakita kadagiti dokumento para iti pannakaputed ti nasao a kayo ken iti pannakaibiahena.#