Ita a Paskua : ania ti isagutmo?

Salaysay ni JOBERT M. PACNIS

PASKUAN!

Napardas ti panagtulid ti panawen. Kasla kaano la nga agpayso daydi Paskua 2010. Ita, adtoy manen ti sabali pay a Paskua a rumbeng unay a rambakantayo.

Iti biagtayo a Kristiano, daytoyen ti kapatgan nga aldaw – aldaw a pannakaipasngay ni Jesukristo, ti mannubbot kadagiti basbasoltayo. Ania ketdin a kinagasattayo iti daytoy a naindaklan a sagut ti Dios kadatayo. A rumbeng laeng a subadantayo iti kinaimbag.

Agingga iti mabalin, kayattayo a maisurat ti tunggal aramidentayo no dumteng ti kastoy a panawen. Ita a panawen ti kompiuter, naglaka ketdin ti makaala iti pakalaglagipan ‘ton dumteng ti panawen nga agtabonen ti inittayo. No kasano ti kinalaka ti mangala iti pakalaglagipan, kasta met laeng iti panangikamada kadagitoy ken panangibinglay kadagiti gagayyem wenno kakabagiantayo tapno iti kasta, mairamanda met uray kaskasano iti kinaragsaktayo uray addada iti adayo a disso.

Mapasamak dagitoy iti apagkirem gapu iti internet!

Kadaytoy met a panawen a maangay ti reunion wenno panagtitipon dagiti kameng ti pamilia. Kasano man kaadayo ti maysa a kameng, adda man iti ballasiw-taaw, ikagumaanna ti agawid tapno laeng makapulapolna dagiti ipatpategna iti biag.

Kasta ti kinapateg daytoy nga aldaw!

Ngem kitaentayo man ti bagbagitayo. Adda kadi Paskua iti kaunggantayo?

Kas pagaammotayo, aldaw ni Ayat ti Paskua. Ayat iti bagi, iti sabali, iti pagilian— iti sapasap!

Ngem ti saludsod, napadasam kadin ti nangipaay iti ayat?

Idi nakasabatka wenno adda nalabsam a nakakaasi a kabsat, tinulongam kadi? Idi pinagdamagandaka dagiti ganggannaet iti lugaryo, sinungbatam kad’ ida iti maitutop, wenno dimo ida inkankano? Idi nagkasapulan ti kaarrubam ta masakit ‘diay anakna ket masapul a maitaray iti ospital, nakaukrad kadi met laeng dagita dakulapmo? Idi nasabatmo da Apong a marigatan idi bagbagkatenda, tinulongam kad’ ida?

Babassit laeng dagitoy a banag. Ngem no maaramidtayo, nangipaaytayon iti Paskua a nalablabes pay ngem iti agkakaimas a makan.

Ken napadasam kadin ti namakawan?

Rag-o ti ibunga dagitoy nga aramid kadagiti natulongan aglalo la unayen kenka a nangaramid.

Ta kas kuna ti Apo: “No inaramidmo dagitoy kadagiti kanunumuan a kakabsat, inaramidmo metten kaniak.”

Ngem ti nasakit a mapaspasamak iti aglawlaw, agraraira latta ti panagkurakot a mangilumlumlom kadagiti marigrigat; ti panangidadanes kadagiti babassit; ti inningar wenno pinnadakes, awan mayat a paabak, agkakalaing ti amin. Awan mayat nga agpakumbaba.

Maagapadko man ditoy ‘tay grupo (diak koma pakabasbasolan) nga idi un-unana, gunglo a map-apalan ta adda ayat iti puso tunggal kameng ken opisiales.

Nakaragragsak idi daytoy a gunglo. Tinawen pay nga adda panagtitiponda.

Agbibiag iti bukod a sakripisio ti tunggal maysa gapu iti napagkaysa a gagem a pagimbagan ti sangkapulian.

Ngem iti panaglabas ti panawen, rimsua ti parikut. Baginan ikalakagna. Nagudua ti grupo. Adda rason tunggal paksion. Ita, adda dayta inningar uray iti cyberspace.

No kaano nga agpatingga daytoy nga inningar, pinnadakes, dagiti laeng maseknan ti makaammo. Ti kadaksan ditoy, in-inut a marippuog ti namunganayan a grupo— ti simmusuan ti amin sakbay a nagbalinda a tao.  Ala, saan a dakes dayta mangtunton iti kinapudno. Ngem no asino koma dagiti nagbasol, isuda dagiti agsungbat. Saan a mairaman dagiti inosente.

Solusionan ti parikut iti naulimek a wagas. Agsasarita dagiti maseknan.

Ngem no pumada iti mapaspasamak iti gobierno a pinniltak kada inningar latta, pagturongan ngarud ti riri? Pagturongan ti gunglo? Asino dagiti agbalin a nakakaasi?

Diak kayat a panunoten ti pannakasayyasayya. Idawdawatko laengen a sapay la koma ta dumtengto met laeng ti panawen a ti rimat ti bituen a limtuad sadi-Belen ket silnaganna ti pampanunot ti tunggal maysa.

ITOY a Paskua, kitaentayo koma met ti salun-at wenno pagimbagan ti tunggal maysa. Kas pangarigan, iti taraon, pilien/idasar dagiti nasustansia, saan a makadakes iti salun-at dagiti kameng ti pamilia. Di unay iti namanteka, naapgad ken nasam-it. In moderation laeng. Kas pagaammotayo, awan kadagiti makan ti pudno nga anag daytoy nga aldaw.

Adda iti panagiinnayat. Panagpipinnakawan.

Iti met biang dagiti ubbing nga agtaytayyek ti lubongda iti ay-ayam, maitutop unay a kitaentayo met dagiti isaguttayo kadakuada nga ay-ayam. Dagitay koma saan a makadangran iti salun-atda. Surotentayo ti balakad ti Ecowaste Coalition (a nasuratkon ditoy itay Hunio).

Agpanunot. Ta baka imbes a kinaragsak ti mariknatayo itoy a panawen, liday ketdi ta simmina ti patpatgentayo iti kinamanagbaybay-atayo iti ayattayo laeng a maparagsak ida.

Saludsodentay’ man  ketdi iti  bagbagitayo: Manon a Paskua ti limmabas iti biagko? Ket ania dagiti naipaayko iti padak a tao? Bin-ig kadi a sakit ti nakem? Wenno maiyannatup kadi iti pagayatan ti Dios?

Panawenen tapno itar-aptayo dagiti itta iti biagtayo. Mangipaaytayo iti ayat saan laeng nga iti aldaw ti Paskua no di ket iti inaldaw-aldaw a panagbiagtayo.

Ngem no mangipaaytayo, saan a gapu ta adda namnamaentayo a katukadna. Wenno ammotayo a masupapakantayo. Ketdi, mangipaaytayo nga agtaud iti kaunggantayo.

Ti Dios ti makaaammo iti amin.  Awan ti makalibas iti imatangna. Ammona dagiti aramidtayo.

Ket dagitoyto ti pangrukodanna iti kinataotayo. No rumbeng met laeng nga ibilangnatayo nga annak.

Ngarud, ania ti ipapaskuam, Kabsat?#