sinursuran-banner-sqSinursuranNi Jobert M. Pacnis

Ita a Piesta Dagiti Natay

Sinursuran: Kolum ni Jobert M. Pacnis
(Maudi a paset)

Kas nasaon, agpapan kadagitoy, saan latta a nagbaliw ni tatang. Simple ngem napnuan ayat ti panangisaganana kadagiti taraon a yatangna kadagiti minataymi.

Ta saan kano met a rumbeng ti nagarbo, nabaknang a taraon. Ti napateg, mailagip dagiti minatay ket adda iti puso ti pudpudno a panagayat kadakuada. Saan a masirayan, marikna kadagiti agkakangina a makan.

Ti nakakalkaldaang kadagitoy a panawen, madlaw a sabalin ti pannakarambak ti Piesta Dagiti Natay. Adda dagiti nangisit ti kararuana. Alaenda daytoy a gundaway a mangloko. Operasionenda dagiti mayatang kadagiti panteon. Siimenda dagitoy. Apaman a nakalikud ti nagatang, kasla kimatda kapardas a mamagpukaw iti atang.

Maysa pay, ti panamagbalin kadagiti panteon a pagiinuman ken pagsusugalan. Saan man laeng a maikkan iti respeto dagiti minatay. Kasla ketdin lisensia daytoy nga okasion tapno maaramid dagiti banag a di koma rumbeng iti lugar a pagin-inanaan dagiti kakabsat a pimmusayen.

Panawen pay dagiti kriminal. Iti kinadupudop dagiti sumarungkar iti kamposanto, dayta la agsisiim ti mabalinda a biktimaen. Snatching, dayta ti modus-da. Aglalo ta adda dagiti kailian a kasla ketdin pagparammagda ti kaadu dagiti alahasda idinto nga iti kamposanto ti papananda. Ania pay, masulisog dagiti managdakdakes. Napudot ti kuarta, kunada ngarud.

Maibalakad ngarud a saan koma nga agmaymaysa a mapan iti kamposanto. Liklikan ti agimet kadagiti agkakangina nga alahas wenno ramit. Agbalin a simple, kasta laeng. Alerto iti aglawlaw.

Kadagiti met addan an-annayenda kas iti hayblad, saanda koman a mapan pay iti kamposanto ta baka dakes laeng ti mapasamakda. Kaadu ti tao, dippiit ti pagnaan. Narigat no agatake ti sagubanit kadagita a kanito.

Tungpalen met ti sangkakuna dagiti otoridad. Saan a rumbeng nga agimet kadagiti makadangran, agbalon kadagiti makaulaw a mainom ken ubbing nga aw-awir. Ngem no di maliklikan ti naud-udi, suroten ti balakad kas koma ti panangipan iti name tag ti ubing ta no bilang laeng a mapukaw daytoy, nalaka a sapulen ken isapul kadagiti maseknan.

Ditoy ilimi, maragsakanak a makaimatang kadagiti maseknan, otoridad, nga ar-aramidenda dagiti akemda. Addada nga agpagnapagna iti ikub ken ruar ti kamposanto tapno siguraduenda ti talinaay ken kappia no kastoy a panawen. Iti daytoy a mapaspasamak, adda laeng panagamak dagiti managdakdakes a mangipatungpal kadagiti nangisit a panggepda. Maliklikan ti krimen a mapasamak.

Kasta metten dagiti volunteer a mangkita, mangtaming iti salun-at dagiti tattao a kalbiten dagiti sagubanitda gapu kadagiti nadumaduma a rason. Dagitoy dagiti indibidual nga ipapaayda ti panawenda a libre kadagiti agkasapulan iti tulongda. Umadu koma ngarud dagitoy kastoy a grupo saan laeng nga iti ilimi no di ket iti sapasap a pagilian.

Maysa pay a kapaliiwan no Piesta Dagiti Natay, isu ti kaawan ti disiplina dagiti kailian no dadduma. Kas iti panawen ti Sabado Gloria a mapmapan dagiti tattao iti aplaya tapno agrambak para iti panagungar ti Mangisalakan, mabati dagiti rugit/wara iti kamposanto. Kasla intayab ti angin dagiti basura nga indisso dita iti saan a panangipirpirit dagiti tao iti kinapateg ti panagdaldalus. Rugit nga agbalin nga arkos ti kamposanto aglalo no awan ti para dalus. Naimbag ketdi ta no diak mariro, adda agbanbantayen a regular kadagiti kamposanto; ken agdalus metten no kasapulan. Ti munisipio ti manueldo kadaytoy.

Ngarud, itoy manen a panangilagiptayo kadagiti minataytayo, ilaem iti puso ti pudpudno nga anag daytoy. Saan a dakes ti nakaugaliantay’ itan a panagrambak no kastoy a panawen. Ngem liklikantay’ koma ti nalabes unay. Ipangruna dagiti minatay a nakaisangratan daytoy nga okasion. Nasayaat met no utobentayo ti bagbagitayo. No siakto ti sumina, adda ngata naimbag a pakalaglagipan a naibatik/maibatik? mabalin a saludsodentayo. Saludsod a mamagbaliw ti taray ti panagbiagtayo, ti taray ti pannakilangentayo kadagiti makapulpulapoltayo iti inaldaw. A no masungbatan iti sipupudno, sigurado nga awan ti panagbuteng iti pannakisangonto met ken ni Patay.

Sika, ka-Sinursuran, kasano met a rambakam daytoy nga aldaw?#