sinursuran-banner-sqSinursuranNi Jobert M. Pacnis

Ita a Piesta Dagiti Natay

Sinursuran: Kolum ni Jobert M. Pacnis
(Umuna a paset)

NAGTENG manen ti pannakaselebrar ti Piesta Dagiti Natay. Kas kadagiti dadduma, saan a mapupuotan. Kasla kaano la daydi naudi. Ngem adtoy manen a rambakantayo daytoy nga aldaw dagiti minataytayo. Dagiti ipatpateg nga immun-unan kadatayo. Nga iti masanguanan, maysa a kinapudno a mapantayto met iti yanda.

Panawen daytoy a pananglagip/panangilagip kadagiti minataytayo. Dayta ti anag daytoy a panagrambak. Panagrambak a nagbalinen a panawen ti panagsasarak dagiti agkakabagian. Reunion, daytan ti mapaspasamak. Sumangkaaduanna a daytoy a panawen a makapagbakasion dagiti kabagian a naipalladaw iti adayo a nakasarakanda iti panilpo ti biagda wenno nakaikamanganda pay ketdin.

Normal a mapaspasamak kadagiti kamposanto, makalawas sakbay ti selebrasion, a madalusan dagiti panteon. Magabut dagiti ruot, maalat-at dagiti cadena de amor ken mapintaan dagiti panteon. Nakakadkadlaw kadagitoy a panawen dagiti panteon a saan man la a nadalusan wenno napintaan. Agminar ti kinanumo iti pannakawaknit dagiti nangabbeng a ruot.

Wen, iti pannnakailinged dagiti panteon kadagiti ruot iti makatawen, saan a nadnadlaw dagiti babassit. Nailemmeng ti kinanumoda. Ngem ammotayo nga iti linged dagiti ruot, addada dita a nakalemmeng. Dagiti laeng kasla balay payen ti kadakkelna a panteon dagiti mailangaan. Agminar latta ti estadoda uray simminadan ditoy a biag.

Wen, itoy manen a panawen, maibaskag saan laeng a dagiti nanumo a minatay no di ket dagiti nabaybay-anen. Dagiti awanen ti makalagip wenno mangsarsarungkar kadakuada. Ala, mabalin a panunoten a nalabit, awanen dagiti kabagianda iti asideg. Addadan iti adayo, kas nasao itayen. Ngem dina kayat a sawen a nanglipatdan. Nalabit nga ilaglagipda dagitoy kadagiti nakaipalladawanda a disso. Ta saan met a kas karina a lipaten/malipatan ti ayat nga impabur-ida idi sibibiagda pay laeng. Mabalin a dayta nga ayat ti tulbek ti sagsagrapen a nam-ay iti agdama.

Mapaliiw pay a kadagitoy a panawen, mapatibker ti kinnayammet dagiti agkakabagian. Iti kaunday ti dida panagkikita, mabalin a di payen agaam-ammo dagiti annakda. Ket itoy a panagsasarak, mapasamak ti nasaotay itayen a reunion. Innammo, pinnadamag, pinnadigo kadagiti padas a nagbalin a tulbek iti sagsagrapen a nam-ay. Ken mangbiag iti singgalot ti panagkakadaraan.

Kas kadagiti sabsabali a panagsasarak, panagkikita, panagrambak, saan a mailaksid dagiti taraon a maisagana. Taraon para kadagiti minatay; ken taraon para iti panagsasarak, panagiinniliw kadagiti mangilagip. A naynay nga agkakabaknang a taraon.

Maipalagip kaniak no kasano nga isagana ni tatang dagiti yatangna. Sipud addan puotko, saan pay a nagbaliw dagitoy a simple a lutlutuenna: baduya, kaskaron, diket (a mapatakderanto iti itlog iti tengnga apaman a mayatang), sinuman ken netib a manok nga awan a pulos ti rekadona. Inton mayatang dagitoy, karaman dagiti dulsi, ramayramay, arak, gawed, bua, apog, ken softdrink.

Aginnagaw ti sipnget ken lawag ti malem ti Nobiembre 1 a mayatang dagitoy. Agtalinaed a nakalukat ti ridaw agingga a maakas dagitoy iti agarup tengnga ti rabii. Nupay adda panagbuteng idi ti rikna a silulukat ti balay kabayatan ti iriridep, awan lugar ti panagreklamo. Dakes kano a rikpan dagiti “umay makikaan” a minatay. Agsakitka kano. Aglalo no kasta a libasem a kissayan, kanen dagiti nayatang. Agkabbibawka kano.

Isu nga an-anusan ti buteng iti barukong agingga a maakas dagiti atang. Masulnitan amin daytoy apaman nga aglawag. Mariingak iti ayamuom ti netib a manok (a nayatang) a dobdoblien a lutuen ni tatang. Agkakamakamton ti tig-ab kalpasan ti pammigat.

(Adda tuloyna)