Italian national, 4 pay naaresto gapu nagduduma a kaso

BANTAY, Ilocos Sur – Lima a tattao a pakairaman ti maysa nga Indian national ti inaresto ti kapolisan ditoy probinsia gapu iti nagduduma a kaso manipud Nobiembre 20 agingga iti Nobiembre 24.

Iti Candon City, inaresto dagiti polis ni Jennifer Fortes Suguitan, 42, baro, seaman ken residente iti Brgy. Gonzales, Tubao, La Union, babaen ti bileg ti warrant of arrest nga inyisio ni Judge Ethelwonda A. Jaravata ti Regional Trial Court Branch 32, Agoo, La Union.

Naaresto ni Suguitan, sumangsango iti kaso a panaglabsing iti RA 9262, wenno Violence Against Women and Children Act of 2004, a nai-docket iti babaen ti Criminal Case No. FC A-1939, babaen ti tulong ti maysa a Lambat Sibat volunteer a nangited iti impormasion a nakitana ti akusado iti Romena’s Electronics.

Nairekomenda nga agpiansa ni Suguitan iti P80,000.00.

Idi agsapa ti Nobiembre 21, 2016, inaresto dagiti joint elements ti PIB,PIDMB ISUR PPO, Sta Ana Manila MPS and MPD HQs, Ermita, Manila City nga indauluan ni PCI Andrew Rabang, Deputy PIB ISUR babaen ti superbision ni PSSupt. Rey Antolin De Peralta, APD, ni Saverio Nuccio, 77, naasawaan, negosiante, Italian national ken residente iti 32 Eurovilla Town Homes Corner Lamayan St. Panaderos, Sta Ana, Manila babaen ti bileg ti warrant of arrest nga inyisio ti dua a judge ti Regional Trial Court, Branch 72 ken 22, Narvacan.

Akusado ni Nuccio iti estafa (10 counts) a nai-docket iti CC No. 4223-N to 4227-N iti sala ni Judge Marita B. Balloguing ti RTC Branch 72 ti Narvacan ken iti CC No. 4228-N to 4232-N iti sala ni Judge Gina Juan Chan ti RTC Branch 22 ti Narvacan ket nairekomenda nga agpiansa iti P20,000.00 tunggal kaso wenno iti total a P200,000.00 para iti temporario a wayawayana.

Idi sardam ti Nobiembre 21, inaresto dagiti elemento ti Vigan CPS, PIB, PPSC ken CIDT ni Nico Pajo y Jimenez, 20, baro, mannalon, ken residente iti Barangay Rugsuanan, Vigan City, babaen ti warrant of arrest nga inyisio da Judge Marita B. Balloguing ti RTC Branch 20, Vigan City, ken ni Judge Macario M. Bañez ti RTC Branch 21, Vigan City gapu iti dua a kasona ti panagrames.

Awan ti nairekomenda a piansa ti akusado para iti temporario a wayawayana.

Iti met Salcedo, inaresto dagiti polis ni Richard Bugarin y Dungawen, 24, baro, mannalon ken residente iti Barangay Kinmarin, idi malem ti Nobiembre 22 gapu iti kasona a panagrames.

Naipaima ni Bugarin iti Bureau of Jail Management and Penology, Candon City babaen ti commitment order nga inyisio ni Judge Policarpio Martinez ti RTC Branch71, Candon City.

Kabayatanna, impakat dagiti joint personnel ti CIDG Ilocos Sur, ISPIB ISPPSC ken San Juan police station ti warrant of arrest nga inyisio ni Judge Rapiel F. Alzate ti RTC Branch 24, Cabugao idi malem ti Nobiembre 23 a nagtungpal iti pannakaaresto ni Elsa Nolasco y Talosa, 58, ken residente iti Barangay Guimod Sur, San Juan.

Akusado ni Nolasco iti illegal recruitment babaen ti CC No. 3534-KS.

Naipan ni Nolasco iti CIDG Ilocos Sur para iti dokumentasion sakbay a naipaima iti maseknan a korte. (Tawid News Team)