Italian national, nalmes

CANDON CITY – Saanen a nakibaro a tawen daytoy Italiano agsipud ta nalmes sadiay Barangay Calongbuyan idi aldaw ti Disiembre 28.

Nasarakan dagiti mangngalap nga agindeg iti nadakamat a barangay a tumtumpaw iti kabaybayan ti bangkay ni Mario Rebecchi y Muti, 75, naasawaan, ken agnaed iti Barangay Darapidap, ditoy siudad idi agarup 11:30 ti aldaw ti nasao a petsa.

Intaray dagiti nagresponde a polis ken barangay tanod ni Rebecchi iti Candon City Hospital ngem indeklara ti doktor a nangtaming kenkuana nga awanen ti biagna.

Segun iti live-in partner ti Italiano a ni Perlita Gonzaga, imbaga ni Rebecchi a mapan agdigos iti baybay idi agarup 8:00 iti dayta a bigat.

Idi saanna a mauray nga aggawid ti kalib-inna, sinapul ni Gonzaga ket naammuanna laengen a nalmes daytoy iti Barangay Calongboyan.

Segun iti polis, awan ti sinagrap a dunor iti bagi ti biktima.#