Iti Dutdot ti Puraw a Kalapati iti Linabag ti Arbis

 Sarita ni Jaime Agpalo, Jr.

(Maudi a paset)

 

Ngem inkeddeng lattan ni kagawad ti agpaliiw. Ket iti panagpakada ti lalaki itay bigat a mapan agpasiar sadiay kabisera, nakaragragsak daytoy; marikna met ni kagawad dayta, ngem dina laeng masinuo no apay a nagtibbayo iti nakakarkaro iti ipapanaw ti lalaki, ket iti maysa a suli ti mugingna immapon ti maysa a saludsod: maysa kadi daytoy a partaan?

Oh, oh/ Oh, oh, oh, oh/ Oh, oh, oh, oh/ Oh…

I’ve tried and tried/ Blocking out the pain I feel inside/ The pain of wanting you/ Wanting you…

Nangitangad manen ti lalaki. Kasla imbudo ti karabukobna. Kasla awanen ti espiritu ti whisky no di ket nagbalinen a kasla diro ti ramanna. Intangadna manen ti Cutty Sark. Inyibbusna amin a linaon ti botelia. Kurang. Agkurang. Awanen? Siniripna ti uneg ti botelia no adda pay linaonna, ngem awanen. Impalapalna ti botelia ket naggilap a nasilnagan dagiti light emitting diode nga street lights a naimuntar a nataratar kadagiti abaga ti rangtay. Iti panagkitana, kasla agtaytayab ti botelia a naginiin iti dakulap ti naulimek a rabii agingga a natnag iti naadalem a danum ti Karayan Nasaoang.

Naulimek ti danum ti karayan a kunam la no agpalpaliiw iti mapaspasamak iti lalaki; a kas iti kasla panagpaliiw met dagiti muymuyong iti teppang ken igid ti karayan, iti bakras ti bantay, iti naulimek nga angin-sardam idinto nga itay ket kumulkuldit, ti naulimek a kalsada nasional ta nairana nga awan ti lumabas a lugan; naulimek ti rabii ket iti kalangitan inabbongan ti pangisiten nga ulep; iti panangiyunnat ti nabarteken a lalaki dagiti takiagna tapno matmatanna ti nagdissuan ti impalapalna a botelia ti arak, saanna a napuotan ti panagdisso ti sumagmamano a linabag ti arbis kadagiti dakulapna, ket simmalpa iti paradipad ti rangtay, ken dinan ikaskaso dagiti dadakkel a linabag ti arbis.

Ti arbis kadi ket lua ti langit? Aglua kadi met ti langit, aglua gapu iti ladingit, gapu iti saem a mabuybuyana gapu ta maysa manen a parsua ti agpangpangta nga umagep iti tapok. Maladingitan met ti langit, isu nga agarbis…?

Knife/ Cuts like a knife/ How will I ever heal/ I’m so deeply wounded

Knife/ Cuts like a knife/ How will I ever heal/ I’m so deeply wounded

You cut away the heart/ Of my life

Nakasalpan ti lalaki iti paradipad ti sementado a rangtay. Nagrukob latta a nagrukob ti lalaki a mangmirmira iti botelia ti arak ken in-inut a maareb-eb iti tukot ti danum; a kas iti in-inut a pannakaareb-eb ti lalaki iti tukot ti ngilangil—ti kinaawan patinggana a pagpatinggaan…

PADPADASEN ni kagawad Ben a butingtingen ti netbook, ta dina pay napadasan ti nagusar iti loptop, nupay napadasannaniti nangusar kadagiti tallo a desktop iti Dalumpinas Barangay Hall no kasta nga agsurat iti spot report, memorandum, barangay clearance ken dadduma pay, ngem kaluklukatna pay laeng idi dumteng ni Carlo manipud eskuelaan.

Tinaldiapan ni kagawad ti Seiko 5 iti kanigid a pungnguapunguanna, oras gayamen ti panagawid ‘toy anakna nga agis-iskuelan iti agrikultura. Eksakto nga alas-onse ti oras iti aldaw ti Lunes.

Imbaga ti anak nga isu ti agusar iti netbook ta agbasa iti damdamag iti website ti Tawid News Magasin, ta tunggal Lunes a ma-update ti linaonna.

Napamusiig ti kagawad, sa met la napaisem idi naamirisna nga Ilokano ti basbasaen ti anakna. Binay-anna lattan, ket nagpaliiw ken nakipagbasa metten.

Iti damdamag a basbasaen ti anakna, iti byline ni Christine Marie Versoza:

Maysa a bangkay ti lalaki ti nasarakan a tumtumpaw iti Karayan Nasaoang idi agsapa ti Sabado. Agtayag ngata iti innem a kadapan ken walo a pulgada, kalalainganna ti napuner a pammagina ken kayumanggi a kudilna, medio maratimmukelen ti naamo a rupana, adda nagbiag a nangisit a sallapiding iti kanawan ti pingpingna a kas kadakkel iti bukel ti pusi…

Kellaat a nagtibbayo ni kagawad Ben a nakabasa met dayta, bumanugbog ti barukongna, kas iti tibbayo a nariknana idi nagpakada ti lalaki a boarder-da idi agsapa ti Biernes, nga agingga ita ket saan pay a nagawid, ngem pattapattaen ti kagawad a nalabit a nagdiretson daytoy iti ilida iti kabangibang a probinsia; saan met a makaawag ta nabati ti lalaki ti selponna iti rabaw ti nagtimmukel a lamisaan iti salas.

Napatakder ni Carlo, saan a makauni, ngem agbalbalikas dagiti matana a nangsabat kadagiti mata ni kagawad Ben; agpada ti linaon ti panunot dagiti agama, ket nagdardarasda a napan iti ili ti Nasaoang tapno penkenda ti mulmulmolan ti mugingda, ket saanda a napaay…

Turn me loose from your hands/ Let me fly to distant lands/ Over green fields, trees and mountains/ Flowers and forest fountains/ Home along the lanes of the skyway

For this dark and lonely room/ Projects a shadow cast in gloom/ And my eyes are mirrors/ Of the world outside/ Thinking of the way/ That the wind can turn the tide/ And these shadows turn/ From purple into grey

For just a Skyline Pigeon/ Dreaming of the open/ Waiting for the day/ He can spread his wings/ And fly away again/ Fly away skyline pigeon fly/ Towards the dreams/ You’ve left so very far behind…

Iti sumaruno a Lunes, inukag manen ni Carlo ti website ti Tawid News Magasin, nagbasa manen iti damdamag, iti byline met laeng ni Christine Marie Versoza:

Naammuanen ti Nasaoang PNP ti kinaasino ti bangkay ti lalaki a nasarakan sadiay Karayan Nasaoang idi napan a lawas, babaen iti pammigbig dagiti agama a nangibaga a boarder-da ti lalaki. Naammuan pay ti otoridad a ti lalaki ket maysa a kassangpetna la unay nga OFW ken temporario nga agnanaed iti Brgy. Dalumpinas iti ili ti San Manuel. Impakaammodan iti pamilia daytoy ket inyawiden ti asawana a masikog iti agpito a bulan ti bangkay ni Alberto Ramiscal…

Nauneg ti binulosan a sennaay ni Carlo, ket naitanamitimna: Kastan, Angkel Abet. Agyamanak unay itoy netbook, ikarik dikay mapaay ti kalikagumyo.#