ITI DUYOG TI SINGASING: 1st Honor Blanco Cabie Premio iti Literatura Ilokana, Salip Ti Sarita A Para Ubbing: Nabaludbod dagiti Apit

Dagiti puntos nga ikonsidera itoy a sarita:

1. Ti chicken joy iti panunot ni ubing nga Andy

2. Ti chicken joy iti panunot dagiti ubbing, in general

3. maysa a panagtakuat ken panagamiris ti pananggun-od iti ingpen para iti masakbayan

Ti chicken joy. Nailadawan ti autor ti nakaaw-away wenno rural a panagbiag. Nailadawanna ti kananakem ni ubing nga Andy a di pay nakaraman no ania dayta a chicken joy ken dayta pagdikalutanna. Nasken a maramanan met ti ubing dayta tapno ammona ti pakasaritaan daytoy ken addanto masaona kadagiti padana nga ubbing. Daytoy daytay aw-awaganda iti kabarbaro nga eksperiensa a mangiturong iti asinoman a mangammo iti kinapudno. Eksperiensa a pakaamirisan ti agdadata a kinapudno. Daytoy nga eksperiensa ket itag-ayna ti kapanunotan ken panagikeddeng ti ubing.

In general, saan laeng nga iti rural a panagbiag ti pakapaspasamakan daytoy, uray pay iti siudad. Maysa a phenomenon iti panunot ken nakem dagiti ubbing ti chicken joy. Naganna laengen kadakuada ket makapakatayen. Uray binandehado la ngaruden ti prito a manok iti sangoda, kaykayatda pay laeng ti chicken joy. Adda la ket naidumduma a pangabig daytoy, isu dayta ti kabarbaro nga eksperiensa ken sabali manen a panangammo ken pannakaammo iti kinapudno.

Ngem ti agdadata a kinapudno, inton addada iti uneg ti Jollibee, kaykayatdanto met laeng ti mapan agay-ayam iti ayan dagiti padada nga ubbing iti pagusok-usokan, pag-slide-an ken kangrunaan ti amin, ti pannakaadda iti kabarbaro a gayyem. Pagangayanna, maiyawidto dagita a prito a manok kada prito a patatas.

Adda naisangsangayan a gagar ti ubing a mangiduron kenkuana tapno takuatanna ti kinapudno. Isu a nasken a mapasamak dayta nga ingpen. Ket iti pannakapasamakna, dumteng metten kenkuana ti pannakaamiris ti kinapudno. Dayta a panagamiris ket pasidapenna ti naganus a panunot.

Ket ti naganus a panunot a pinasidap ti eksperiensa, tumayok nga agtakuat ken agamiris iti pagsayaatan. Ti eksperiensa ti ubing a makasursuro.

Ti eksperiensa ti kasiriban a mannursuro, dayta ti tema ti sarita. Isu dayta ti phenomenon ti chicken joy.

Ti manok ni Andy ti kapintasan a paset ti sarita, siempre. Nangrugi iti manok. Uray kasano ti kinapateg dayta a manok, maisakripisio dayta no isu ti bentahe a pakagun-odan iti ingpen—a makaraman iti chicken joy. Ngem iti pannakaamiris ti kinapudno nga ad-adda a makabsog ti tinola ta adda papayana ken kaldona, agsubli met laeng ti kinapateg dayta a naisakripisio. Isu a pagitlogenna laengen tapno umadu pay ti itinolada. Itoy a puntos, ti istabilidad ti manok ken ni Andy ket masapul a dida agsina iti udina ta isuda la ngarud ti masarsarita.

Napintas a sarita. Nabara a kablaaw iti autor.

Ni Anya Manilenia ken ni Balong Promdi, sarita ni SHERMA E. BENOSA, maika-2 a gunggona (Naipablaak iti Bannawag, Agosto 17, 2009)

Dagiti naipakita a ramenna ti pagpintasan ti sarita. Agduma ngamin ti impakita ken ti naidetalye wenno naisawang a paset. Iti ngamin literatura, ipakita dagiti tagipatgen wenno pagpintasanna a saan ket nga idetalye wenno isawang. Bay-an a makita a nalawag da dear readers. Bay-an nga apresiaren ni dear readers dayta a pagpintasan.

Dagitoy dagiti sumagmamano a pagpintasan daytoy a sarita. Nupay adda pagkaarngianda iti maikatlo a gunggona maipapan iti panagtakuat, agdumada ketdi ta nalawlawa ti sakupen daytoy (nalawlawa nga scope). Uray no saan a naibaga ket nakakadkadlaw ti transformation wenno panagbalbaliw ti panirigan ni Anya. Ti ayat ken eksperiensa a naagsawna itoy a panagbakasionna ket dinto maumag.

Ti comparison technique ket naaramat a di naisawang no di ket kadagiti pasamak ken pannakautob.

(Adda tuloyna)