Iti Duyog ti Singasing

Ni Jaime M. Agpalo, Jr.

(Maikatlo a paset)

 

Naipatangatang iti radio cassette ti kansion ti ‘The Carpenters’ ket uray la met makapatengngel ti anges ti nalamuyot a panagkanta ni Karen Carpenter iti kansionda a napauluan iti “(I’m Caught Between) Goodbye and I Love You.” Imasnan, g’yem!

Iti pananganalisarko iti kansion, napintas siguro no mangsuratak iti bersionko iti isu met a konsepto, nayonak laeng. Ken nasken a nakalidliday ken makapasangit agsipud iti format ti drama a “Mr. Lonely.” Pauluak man met iti “Iti Nagbaetan iti Panagpakada ken Ay-ayatenka.” Ania la ketdin, isuda la ti maymayaten? Dayta ti nalawag a germs ti idea!

Kasano a suratek, nay?Dayta ti dakkel a parikut. Nasken a balabalaen pay nga umuna no kasano ti pannagna ti istoria. Nasken nga ammuen dagiti agbibiag, ti risiris ken dadduma pay a paset ti istoria. Salbag, nagrigat ti biagko, kas mannurat, kas ‘commissioner’ iti termino dagiti Pangalatok a mankukomis, isu a ‘commissioner’—para aw-awir kadatayo nga Ilokano; no saanak koma a simrek a mannurat, agtrabahoak (isu ti trabahok sakbay a nagsuratak iti radio) kas maintenance aide dagiti walo a bus ken tallo pay a babassit a lugan ti Regga Contractors, ti kontratista nga agitulod kadagiti rinibu nga empleado ti Texas Instrument Philippines sadiay Export Processing Zone Authority (EPZA) idiay Loakan Road.

Ket immapay iti panunotko, nga agparikutak iti makapasangit nga idea idinto ta kasursuratko la unay ti script ti parikut ti estudiante a masikog? Daydiayen a ti ituloyko! Ti script ti “Dear Manang Helen” baliwakon, ituloykon  iti “Mr. Lonely”! Ania ti serbim a mannurat no dimo ammo ti ag-modify kadagiti script? Ania la ketdin!

Binukelko nga immuna iti panunotko ti sarita: Saanen nga estudiante. Addadan iti husto nga edad dagiti karakter. Saanen a parikut dagiti agayan-ayat no di ket kasla love triangle twist. Adda kaayan-ayat ti balasang, ngem napinget pay laeng nga agrayo ni baro. Ti kaayan-ayat ti balasang, kellaat a nagpukaw ti salbag a lalaki, saan nga ammo ti napananna.Ti rigatna, masikog ti napanawan a balasang. Ti other baro, inyupreserna latta ti panagayatna ken ni balasang, nga isu ti mangako iti responsibilidad ti nagpukaw a kaayan-ayat. Saan koma a kayat ti balasang, ta awan a pulos ti mariknana nga ayat iti baro, ngem awan ti sabali a pagpilianna tapno saan a maibabain iti panagsikogna a balasang, awatenna ti ayat ti baro uray dina ay-ayaten ken adda  inibbatanna a katulagan, a nupay maikutan ti baro ti bagina, saan ti pusona ta maymaysa laeng iti agtagikua itoy, ti lalaki a nakasikog kenkuana. Dayta ti tulag.Inawat ti baro dayta a tulag. Inrason ni piman a baro a masursuronto ti balasang nga ipateg ta agbalinto a mapagwadan nga ama. Kuna ti balasang nga amangan no dumtengto ti panawen nga agsublida nga agina iti pudpudno nga ay-ayatenda. Ni tungngang a lalaki, (expression a naputar ta saan a palubosan ni Sister Tessie nga agmonmonitor kadagiti drama iti agsao iti dakes ta maipatangatang dagitoy kadagiti nadumaduma a catholic-run radio stations iti Northern Luzon) inkasarna latta ni masikog a babai. Kasta ti ayat, ti pakasaritaan ti bulsek nga ayat.(Istoriakis de amor ngarud, ania ketdin, aya!) Ti makapasangit a partena: adtoyen ti lalaki a pudno a nakasikog, agsublin. Ngem addan asawa ti babai. Nupay kasta, nakisinnubli latta ni babai iti nakasikog kenkuana ket mapmapan pay ni lalaki iti balayda no addan iti trabaho ni  lalaki a nangikasar. Iti nalawag a saritaan, malipliputan piman ni lalaki…!

(Maituloyto)