ITI DUYOG TI SINGASING: Agtutubo, Namnama ti Pagilian

Dagiti agtutubo ti namnama ti pagilian, kuna ni nailian a bannuar Jose Rizal. Dayta ti gapuna a mangnamnamatayo kadagiti agtutubo. Ta isuda ti sumaruno a mangidaulo. Ta isuda ti masakbayan. Adda kadagiti takiagda ti naraniag a bigat a ditay nakita kadagiti nangituray, agtuturay, ken mangiturturay kadatayo.

Ngem sakbay a dumteng dayta nga arapaap, masapul a makipartisipar, makipaset dagiti agtutubo iti pannakaipagna ti turay. Umuna nga aramidenda ti agrehistro tapno makabutosda. Masapul a makiramanda ken makipaset iti mapaspasamak. Daytoy ti karbenganda a kas umili. Karbenganda ti makipaset ti eleksion inton umay a tawen.

Manamnama ti pannakaiwayat ti kaunaan nga automated elections inton 2010 kas intuding ti Republic Act 9369 . Ngata, kunatayo ta di pay sigurado. Ngem dakkel ti namnama a maangay ti automated elections. Maysa nga historic a pagteng daytoy. Kaunaan iti pakasaritaan ti pagilian. Isu a rumbeng laeng ti pannakipaset amin iti eleksion inton 2010.

Manamnama a nasurok a dua a milion ti kabarbaro a rehistrado a botante. Ket tapno ad-adda pay ti panniguradona a makipartisipar dagiti agtutubo wenno damona iti bumotos, inikkan ida ti Commission on Elections  iti naan-anay a panawen nga agrehistro. Nangrugi ti panagrehistro  idi Disiembre 2 idi napan a tawen ken posible nga aggibus inton Oktubre 31 iti daytoy a tawen. Iti dayta a naited nga atiddog a panawen, awanen ti rason a saan a makarehistro ti maysa a botante ken bumotos inton Mayo 2010.

Ulitenmi, adda kadagiti imayo nga agtutubo ti panagbalbaliw. Iti agdama, saantayo a mapnek ti klase dagiti mangituray kadatayo. Saantayo a mapnek iti kalidad dagiti linteg nga impasada. Ngem datayo met laeng a botante ti yan ti basol no apay nga isuda ti nakatugaw wenno mangituray kadatayo. Adu a kailiantayo ti saan a nangaramat iti karbenganda nga agbutos kadagiti namnamaenda a makabael ken addaan iti nadarisay a tarigagay nga agserbi para iti pagimbagan dagiti umili ken iti pagilian.

Iti daytoy a panawen, saanmo a kutien laeng ti abagam wenno  agulimek lattan iti sanguanan dagiti dakes a maar-aramid iti gobierno, ti panagraira ti kinaruker ken anomalia, ti pannakarabngis ti kalintegan dagiti nababa a mangmangged ken mannalon. Kasapulan nga agtimekka itan. Kasapulan nga ipangegmo nga adda metten bosesmo.

Mangeg laeng ti bosesmo babaen ti balota. Ngarud, kasapulan nga agrehistroka tapno maibisikmo ti bosesmo tapno denggendaka dagiti didiosen a politiko.

Ngarud, kadagiti agtutubo iti pagilian, daytoyen ti panawen tapno ipariknayo, ipakitayo, ipasimudaagyo ken ibatadyo nga addaankayo met iti bileg ken boses ken karbengan a mangipatugaw kadagiti pagwadan a lider a mangibagi kadatayo iti turay. Iti napalabas, nagtakderkayo laeng iti igid ti dalan, ngem iti daytoy a gundaway, agbalin koma a karit kadakayo ti pannakipasetyo iti mapasungadan nga eleksion.

Makunami, adda iti imayo no ania a klase ti masakbayan nga agur-uray kadatayo nga umili#