: ITI DUYOG TI SINGASING: Arte ti Komunikasion Ilokano 101 (Maudi a paset) | Tawid News Magazine - Weekly Ilocos News 📰

ITI DUYOG TI SINGASING: Arte ti Komunikasion Ilokano 101 (Maudi a paset)

Kas sagudayen ti naiparang a syllabus, nalpas wenno nasurot amin dagiti naipresentar. Adda pay dagiti sumagmamano a nainayon, ngem ketdi karaman wenno kanayonan met laeng iti intay panagadal maipapan itoy  Ilokano 101.

Natakuatan daytoy a  kolum a mabalin  met  gayam a maisuro babaen ti bukod a dila dagiti maadal iti eskuelaan, partikular iti tertiary level. Ngarud, pammaneknek laeng a rumbeng koma a maikkan met iti preperensia dagiti dialekto para iti bukodda a pagimbagan a saan laeng a para iti Tagalog wenno English.

Iti kaso ti Tagalog, no Philippine Literature kunatayo, tumpuar lattan dagiti literatura a nasurat iti English ken dagiti naisurat iti Tagalog. A kasla ketdin, dagitoy laeng ti nangbukel iti Philippine Literature.

No kunatayo a Philippine Literature, national level. Agis-isem dagiti Tagalog ta naiyagpang dagiti sinuratda iti national level, idinto ta nabirngasan laeng iti “regional” dagiti non-Tagalog, banag a dakkel la unay ti nagbaetan ken diperensia dagiti sinurat.

Lalo iti panangipatarus iti pagdumaan ti Tagalog Literature ken Non-Tagalog Literature dagitoy dua a National Artist for Literature, panangipasuli kadagiti non-Tagalog (a pakairamanan ti Iluko) ken panangitandudo  iti Tagalog. Anian a  klase ti panagpampanunot.

Well, dayawek dagiti nabalitokan a sinuratda ngem itoy a panagsisina ti kapanunotanda, saanko a magustuan daytoy a banag a nangibaba ti panagkitak kadakuada. No kastoy ti kaipapanan ti “unity” dagitoy malalaki a mannurat, ngarud, saanto a magun-od ti panagkaykaysa dagiti amin a sinurat a kas Philippne Literature. Addanto dayta tatak iti muging a dagiti laeng anggalog ti nalaing ta isuda laeng ti mataltaliaw, wenno saanda a kayat ken lapdanda a mataliaw dagiti non-Tagalog a kas iti panangdillaw dagitoy dua a national artist iti pannakaadda kadagiti salip dagiti non-Tagalog iti KWF. (Ad-adunto pay a kapanunotan ken kapaliiwan maipapan itoy iti sumaruno). Iti ababa pannao, nasken a baddekan ni Tagalog dagiti dadduma pay a lengguahe ken dialekto tapno makinngato wenno tapno agbiag.

Naiparang kadagiti naglabas a serie ti pannakaibinsabinsa ti panagadal ken panagsukisok maipapan iti lengguahe, ti pannakaaramatna, panangiyebkas ken panangipaay iti rumbeng a kaimudinganna.

Dagiti napalabas a serie, (Ilokano 101) ket panangipamatmat a mabalin met a yadal ti lengguahe a kas  met laeng iti panangiyadal daytoy iti Ingles ken iti Tagalog.

Ngarud, kas  panangigibus,   yamanen toy numo ti anusyo a nangsurot  ken nangbayabay iti daytoy a panagadal.

Mabalin nga iti sumaruno a bilang, ta madama pay laeng iti panagurnos kadagiti data, maiserie dagiti maipapan ti literatura dagiti non-Tagalog (a pakairaman ti Iluko).

Ala ngarud.#