ITI DUYOG TI SINGASING: Charactonym

Idi un-unana, naruay a mabasa kadagiti sarita Iluko ti charactonym. Nakail-ilokano a character. Ininaw ken impasngay ti ayat ken pinnateg dagiti naglilinnaga a sinilong dagiti kinelleng ken bangkag. Nagdaliasat kadagiti tambak ken desdes a kumamang kadagiti pinagayan, kabangkagan, kanatengan; kadagiti waig ken pangngappuan a pagsigayan ken pagtanggaran; kadagiti pay-as a simmussuan dagiti rinaepan; iti igid ti baybay a taptapliakan dagiti dalluyon; iti tengnga ti taaw a pag-kalkalapan; kadagiti punsionan ken uray kadagiti paguummongan iti purok; iti panawen ti tikag wenno nepnep; iti rigat ken nam-ay; iti ili ken iti away; iti probinsia ken iti siudad; ken dadduma pay a panawen ken setting, ania man a genre ken klase ti sarita.

Saan a palpalawpaw a karakter dagiti charactonym. Saan nga agtatapaw, makitam nga aggunay ken agtignay, agsao, agkanta ken agdaniw, agunget ken agbassawang ken dadduma pay. Iti ababa a pannao, karakter a makita, saan ket a nakalemmeng wenno saan nga ammo ti kinaasinona.

Napateg ti maysa a karakter ngaĀ  agbibiag ken agtignay, agsao iti kabukbukodanna, a saan ket a padiktaran a kasla bambanti iti tengnga ti pinagayan.

Daytoy idi ti charactonym iti sarita Iluko. Dagiti karakter nga ininaw ken impasngay ti nasariwawek a panag-pampanunot dagiti mannurat. Dagiti karakter a dinaydayaw ken linalais; kaay-ayo ken kagurgura, iniseman ken minisuotan. Imbayog ken inlunod.

Ngem yanda itan dagitoy a karakter? Naginanada kadin wenno saanen a kayat dagiti mannurat? Iti paliiwko, simmerioso dagiti mabasbasan a sarita iti agdama. Gapu kadi ta naginana wenno linipaten ti charactonym? Sapay koma ta saan.

Ania ngamin aya dayta a karakter? No dayta a character ti maysa a sarita ket maysa a charactonym, addan dagus a pamalpalatpatan ti kinaasinona. Uray saanen nga ibaga ti kinaasinona, saan metten a kaskenan nga ibaga pay ta naiparang metten. Kas reader, ammom a dagus ket maisingedmo ti riknam kenkuana; no saan met, agserbi isuna a kas kontrabida iti sarita a sisiimem a mismisuotan dagiti tignayna kabayatan ti panagbasam. Iti sabali a bangir, no isu ti bida, kaay-ayom dagiti tignay ken kapanunotanna.

Iti daytoy a punto, saanen nga agkarkarawa dagiti readerĀ  iti kinaasino dagiti karakter iti basbasaenda. Addan nalawag a makitkitada. No maminsan ngamin, uray bassit laeng a panangiladawan ti mannurat, ammon ni agbasbasa ti kinaasino dayta a karakter. Ammonan ti akemna iti sarita. Nalabit nga isu ti bida wenno saidkik. Ti kontrabida wenno extra.

Ngem, iti panangiladawan kadagitoy a karakter a kas maysa a charactonym, nalawag a panangiyam-ammo ken panangiparang payen ti kinaasino dayta a karakter. Makapneken ti panangiladawan uray saanen nga idetalie. Kadagiti dadduma, saandan nga ibaga pay nga isuna ti kontrabida ta babaenĀ  laengen iti naganna ket maipudosen a saan nga isu ti bida.

Ngem adda met dagiti punto a mangaramat ti charactonym a kas bida. Basta ti punto ket panangibaga ti kinaasino ti karakter ken iladladawan payen babaen ti naganna. Makapatig-ab a panangiladawan.

Adda tuloyna)