: ITI DUYOG TI SINGASING: Cultural Festival: buttuon ti napalabas? | Tawid News Magazine - Weekly Ilocos News đź“°

ITI DUYOG TI SINGASING: Cultural Festival: buttuon ti napalabas?

Naruay dagiti cultural festival a selselebrarantayo ditoy pagilian iti agdama. Dagiti festival a mangipaduyakyak iti ngayed ti napalabas a kultura, tradision, aramid ken nakairuaman dagiti kaputotan. Nagduduma a festival  a kasla nagtubo nga uong ti kaburnokda. Arigna tunggal ili ket addaan ti kabukbukodan a festival a mangitandudo iti nangayed a buya ti napalabas  a manmanon a masirayan ken saanen nga ammo ti agdama a kaputotan dagiti dadduma.

Napateg unay dagitoy a festival ta ladawanda ti napalabas, isuda ti rangtay a mamagsilpo iti agdama a panawen – saan laeng a para iti entertainment wenno parambak no di pay kas behikulo tapno maidur-astayo ti agdama.

Ti panangipromot iti lugar tapno maitandudo a kas disso no di man sentro ti turismo ti kangrunaan a rason ti festival. Ti programa ti turismo ti nangriing iti nabayagen a nailibay a kannawidan. Naiparang daytoy a kasla napateg unay a cake wenno kangrunaan a putahe a nasken nga umilgat ti asinoman ken aniaman nga ili. Umilgat iti kapkapnekanna; aramidenna amin a kabaelan ken   resourcesna tapno laeng dakkel ti mailgatna itoy a taraon. Nasken nga iposision ken ilugarna ti bagina iti sanguanan ti ummong tapno dakdakkel ti mailgatna.

Saan ngamin a masasaan ti dakkel a tulong-dur-as a katukad ti panangriing kadagiti daan a kannawidan. Lalona la unay iti komersio ken negosio. No nabaludbod ti komersio ken negosio, rumang-ay met ti ili. Rumang-ay met dagiti umili. Maiparang ti nadur-as a panagbiag, nga adda  nagluposan ti puli.

Ngem isuna laeng ta adda madlaw a buttoon wenno padagsen daytoy nga itataldiap iti napalabas. Lalo kadagiti festival a mangiparang kadagiti war dances. No dadduma, isu pay ti makuna a kangrunaan a maiparang wenno masala iti publiko.

Rumbeng kadi a taldiapan pay dagitoy a kannawidan ti susik ken gubat? Rumbeng kadi nga iparang dagitoy saan a panagkikinnaawatan a nagbunga iti pannakaipusing, panagsisina ken panangibayog iti kinamalalaki ken masochismo? Adda kadi kaimudinganna dagitoy nga itataldiap iti napalabas babaen kadagitoy nagduduma a festival?

Panagkunami, saanen nga umno ti panangiparang kadagiti saan a makaited iti mulinaw a perception iti napalabas. Lalona ti panagiparang kadagiti war dances kadagiti festival, ta agserbida laeng a buttoon wenno padagsen iti pananglagip iti napalabas a panagbiag ti kaputotan.

Rumbeng laeng a panunoten a riniing dagitoy a festival para iti turismo. Maitutop kadi a pangawis iti turista a ganggannaet ken lokal dagitoy a panangiparang kadagiti naglabas a saan a panagkikinnaawatan ken susik? Kunami: saan koman a nasken a dagitoy ti iparang wenno ipakita ta ad-adda a palasbangenna ti naalas a maris ti napalabas. Nasaysayaat a lipatenen, a saanen a riingen dagitoy nga nga aramid a kas pangpangayed ti festival.

Adda met dagiti  napimpintas nga ipabuya, kas iti courtship dances, wenno panagiinnarem, ti sala ti panagmumula ken panagaapit. Ti sala ken ragragsak a nangpangayed iti taripnong. Dagiti kannawidan a mangiladawan ti panagbiag, aramid, trabaho, komersio ken negosio. Iladawan dagitoy  ti napalabas a panagbiag idi a maikompara iti agdama; kas pangadawan kadagiti rason tapno ad-adda pay nga ipateg dagitoy a tradision ken kultura. Iladawan koma dagiti musika, literatura ken dadduma pay a kannawidan ken aw-awid a nabayagen a nailibay. Dagiti festival a namunganay iti nasged a pammati iti Namarsua. Dagitoy koma ti kaskenan nga iparang.

Napateg unay ti panangtaldiap iti napalabas. Umno la unay dayta. Ngem  saan nga umno ti panagiparang kadagiti kaugalian ken kannawidan a mangitandudo iti nangisit nga imahe ti napalabas iti panggep a pannakaibayog ti turismo ken pannakaidur-as ti agdama.

Buklen dagiti nagduduma a puli ken tribu ti Cordillera ken Amianan. Maatur koma dagiti biddut kadagiti nagduduma a festival – iladawan koma no kasano ti sistema ti panagkaykaysa idi a saan ket a dagiti panagsisina. Iparang koma dagiti sistema ti napalabas no kasano a naidur-as ti agdama tapno lalo pay a maidur-as ti kapkapnekan a kasasaad iti masakbayan.

Dagiti biddut ti pangadawantayo iti nabaludbod a pannakasursuro.#