ITI DUYOG TI SINGASING: Dagiti nauneg-a-narabaw a balikas (Maikadua a paset)

A rhetorical figure in which incongruous or contradictory terms are combined, as in a deafening silence and a mournful optimist, kuna met dagiti dadduma a diksionario.

Ket kasano iti Iluko? Dayta ket. Ngem kasayaatan iti amin nga aramiden ti panangipatarus dagiti balikas nga Iluko iti English, wenno ti English iti Iluko. “Nalaklaka-narigrigat” ngata a maawatan?

Intay man ngarud mangipatarus kadagiti sumagmamano a balikas a mangiduron-manggutugot kadatayo a mangammo kadagitoy a balikas.

English – bittersweet. Iti Iluko, “nasam-it-napait.” A kas iti “nasam-it-napait” ti isemna idi kinablaawak iti naimbag nga aldaw. No dadduma isu met laeng dayta “napait-nasam-it”(nagbaliktad). A kas iti “napait-nasam-it” ti rupana ta kaririingna la unay ita a bigbigat. “Nasipnget-a-naraniag” ti aldawna, ti kayatna a sawen.

English – pretty ugly. Iti Iluko, “napintas-a-nalaad.” Kas iti “napintas-a-nalaad” met ti ugalina daydiay a tao. Nakatugaw laeng iti “nangato-bassit” a bangkito, saan metten a magaw-at ti timmapuak nga alipusposna.

English – open secret. Ania ti Ilukona nay? Wenno asideg a pakaitarusanna? Wenno asideg a pakaiyaspinganna? Wenno kunaen a silulukat-a-palimed?

Karaman iti Top 20 figure of speech ti oxymoron isu a no maminsan narigat nga ikkan ti pakaitutopanna a balikas iti Iluko. Isu a “makatitileng-nga-ulimek” ti masansan a maibaga kadaytoy no madakamat, ta pasaray kunaen a “nalatak-a-di am-ammo” a balikas. Aysus!

Ngem ketdi, maiduma ti kayat a sawen ti oxymoron iti paradox ken iti contradiction. “Naulaw-a-tengnga aldaw” ti sasaaden a panangipatarus iti Iluko ngem “magaw-at latta met ti nakangatngato no kayat,” saan?

Iti paradox – A statement that seems contradictory or absurd but, is actually valid or true. A kas iti “Ayatem ti kabusormo a kas iti panagayatmo iti bagim.” Kasano ngarud ti panangayatmo iti kabusormo? Siempre, busorem no kabusormo, saan?  Contradictory or absurd but true!

Daytoy pay: “No barsakendaka iti bato, barsakem met ida iti tinapay.” Ania? Ti la ibagbagam. No binatodaka,  batuem met idan. Alangan met nga inka pay la gumatang idiay panaderia iti tinapay nga ibatom kadakuada! Kadagiti saan-a-makalawlaw-killeb, amangan no bumarsakda payen iti granada.  Contradictory or absurd but true.

Adtoy pay. Manipud met laeng iti Duyog ti Singasing I. “Nagasat dagiti napanglaw.” Waaa! Balbalatong kunak koma ngem mismo met a ni Apo Jesus ti nagtaudan dayta a paradox. Isu a contradictory or absurd but true. Nailawlawagen idi ti kayatna a sawen, isu a true.

Iti contradiction, saan a figure of speech ken saan met nga statement wenno saan met a “contradictory statement.”

Kas koma daytoy a contradiction: “Wow, nagimasen ta mangga nga isawsaw iti bugguong nga adda silina ngem agsakit ti tianko a mangan iti naalsem.”

Adtoy pay: “Nagimas ‘diay halohalo ngem diak a nangan ta sobra ti panatengko.”

Ngarud, no buklen ti nauneg a figure of speech, oxymoron dayta. No statement contradictory but true, paradox dayta. Contradiction, no nalawag ti statement a kas kadagiti nadakamat nga ehemplo.#