ITI DUYOG TI SINGASING: Dagiti Sarsarita-parparaangan (Maudi a paset)

Apay a naikonektar dayta a fairy tales iti saritaan? Kas paset ti sarsarita-parparaangan. Kas mangbiag ti saritaan wenno tungtongan. Saanko a masinuo ti nangrugian kadayta sarsarita-parparaangan. Ngem masirok a no agar-arbis ngem agin-init, mairapit a rason wenno sungbat ti kinaadda ti kallaysa ti ansisit no apay a mapaspasamak dayta a phenomenon.

(Gagangay a dagiti puraw nga ansisit ti pakaipaayan daytoy nga aplikasion. Ngamin, kunada a dagiti puraw nga ansisit ket saan nga agdangran kadagiti tao wenno banag a napateg iti tao idinto a dagiti nangisit nga ansisit dagiti mangirurumen iti tao.)

Ngem sa met la mapasamak dayta a sarsarita-parparaangan no agin-init ken agar-arbis. Adda ispesiko a detalie ti panawenna. Saan a mapasamak no agin-init wenno agar-arbis laeng. Masapul nga agar-arbis-agin-init.

Ta ania kadi ti signipikante a kaipapanan daytoy a sarsarita-parparaangan? Adda naisangsangayan a relasion ti nakaparsuaan iti tao. Ti nakaparsuaan ket paset iti inaldaw-aldaw a panagbiag ti tao. Ti nakaparsuaan ti pagadawan ti tao kadagiti signipikante nga istoria. Saan laeng a makaited iti linglingay ken ray-aw, mangbiag iti tungtongan no di ad-adda pay nga ipateg ti nakaparsuaan. Iti daytoy a punto, maimula iti panunot ti asinoman lalona dagiti ubbing ti panangipateg iti nakaparsuaan. Wen, nasken nga ipateg ti tao ti nakaparsuaan tapno ipateg met ti nakaparsuaan ti tao ken ti aglawlawna.

Umamnut ken addaan iti kaimudingan ti relasion ti tao ken Ina Nakaparsuaan. Nasken a masaluadan daytoy a kinapateg ti relasion ti tao ken Ina Nakaparsuaan. Isu a no tunggal dumteng ti panawen nga agar-arbis ken agin-init, lumtuad dagitoy a sarsarita-parparaangan a kas pangpaamnut iti nasao a relasion. Lumtuadda a kas lasag ken dara ni Ilokano.

Dagiti aso ti maysa pay a taudan dagiti sarsarita-parparaangan. Kas mapaliiw, tunggal agsasarak wenno adda aguummong a dua wenno ad-adu nga aso iti kalsada wenno sadino ditan, angotenda ti ubet ti tunggal maysa. Kasla napateg unay dayta a kababalin kadakuada a pangidasiganda iti damo a panagkitada wenno panagsarakda manen no kabusor wenno gayyem dayta a kinasinnarak, nairanrana a kinasinnarak wenno aksidental a panagsinnarak. Ngem apay nga ubet ti umuna nga angoten ti aso iti padana nga aso? Apay a mapasamak ti kastoy a panagug-ugali dagiti aso? Maibuksilan ti rason iti maysa a sarsarita-parparaangan.

Idi un-unana nga aldaw, naguummong dagiti aso. Aduda a nairana a nagsasarak. Pinnadamag iti panagbiag. Linnaingan ken pinnalastog iti kinaasinoda iti agdama. Pagammuan, adda naangotda a nabangsit. Makasael a bangsit. Maysamaysa ket dimlaw. Asino ti immuttot? Awan ti mayat a mangipudno. Agtultuloy ti pinnabasol. Agsipud ta awan ti mayat a mangipudno, nagnginnerngerda. Maysamaysa ti nangipangta a masapul a maammuan no asino ti ulbod tapno madusa.

Sipud idin agingga ita, no adda dua wenno ad-adu nga aso nga agsasarak, agiinnangotda iti ubet, kas panangtakuatda no asino daydi naulbod. Agsipud ta di pay natakuatan no asino daydi naulbod, agtultuloy latta dayta nga aramid dagiti aso nga angoten ti ubet ti padada nga aso.

Ta ania kadi ti signipikante a kaipapanan ti sarsarita-parparaangan? Iparangarangna a ti kinaulbod ket agnanayon nga aglak-am iti panagatap. Katukad ti kinaulbod ti nalabusan a panagtalek. Apaman a nalabusan dayta a panagtalek, nalangto latta ti panagduadua.

Isu a napateg la unay ti kinapudno iti pada a parsua tapno saan a mauksob dayta a panagtalek. Dagitoy dagiti sumagmamano laeng a nakitatayo a signipikante dagitoy a sarsarita-parparaangan.

Sarsarita-parparaangan laeng dagitoy, ngem makapaisemda met!#