Footer

ITI DUYOG TI SINGASING: Dagiti Tagilako iti Igid ti Kalsada

Maysa kadagiti napintas a gannuat a napaliiwko ket ti panagaramid iti suka ken basi iti Sta. Maria, Ilocos Sur partikular kadagiti barangay ti Maynganay Sur ken Norte. Napintas a gannuat ti panagaramidda kadagitoy a produkto sada idispley tapno mailakoda iti igid ti kalsada. Mayat la unay a livelihood project. Saanna laeng a nayonan ti masapulan no di degdeganna dagiti lumugar nga agagawa tapno sumayaat ti panagbiagda. Pagsapulan a nangrugi pay idi time immemorial, saanmin a malagip no kaano gapu iti kinabayagnan.

Saanen a kabarbaro a kapanunotan ti panangidispley kadagti tagilako iti igid ti kalsada. Ta nabayagen nga ar-aramiden daytoy dagiti lumugar kadagiti ili iti Pangasinan. Nalatak unayen a sumardengan dagiti dyip ken uray dagiti bus dagitoy a puesto iti igid ti kalsada. Kas koma iti liningta a mais iti Binalonan; ti suka, basi ken bugguong iti Pozzorubio; ti padaw iti Sison a nakakabil iti timba ken dadduma pay. Babaen dagitoy a produkto, maipalnaad ti pamastrekan ti lugar.

Kinapudnona, saan laengen a dagiti kailiantayo dagiti kliente dagiti agar-aramid iti buneng iti maysa a barangay iti Pozorrubio no di ket dagiti taga-ballasiw taaw. Partuat dagiti lumugar dagiti espada a naaramat iti maysa a pelikula ni Mel Gibson. Mangipakita a dakkel a pakaiyam-ammuan dagiti tagilako iti pannakaidispleyda iti igid ti kalsada.

Iti probinsia, mapappapigsa ti panaglako kadagiti produkto babaen ti pannakaidisleyda iti igid ti kalsada. Kas iti kalamay. Anansata, adda payen dagiti kumalabkab kadagiti bus nga aglako iti kalamay ken adda pay hilera dagiti puesto nga aglako iti daytoy a produkto iti igid ti kalsada iti mismo a siudad ti Candon. Ti la mapaliiwko, problema ti pagparkingan dagiti lugan tapno mapan aggatang dagiti pasahero iti kalamay ken dadduma pay a pasarabo.

Nalawa ti parkingan dagiti lugan ket nawaya nga aggatang dagiti pasahero iti pasalubongda iti puesto ti bibingkaan iti Bantay, Ilocos Sur. Ngem diak makita iti pagidispleyan dagiti produkto a kornik iti Bantay ken Candon. Nupay agmalmalem ken agpatpatnag sa pay a nakabitin dagiti buneng, kampit, kumpay, arado ken dadduma pay a kanaigna a produkto iti Barangay Caburao, Santiago, ing-ingpek a makita dagitoy a produkto a maidispley iti Manueva, Santa ken iti Bantay.

Dagiti inabel iti Santa ken Bantay? Saanko a makita ida, ngem ketdi, addadan kadagiti mall ken dadakkel a pagtagilakuan ken kadagiti tiendaan a mismo. Kasta met dagiti sumagmamano nga alahas nga aramid dagiti alahero/alahera iti Bantay.

Adda met idi makita a tagilako a sitsaron iti Narvacan, partikular iti krosing, ngem idi ngimmina ti karne ti baboy, nagawan metten. Sitsaron kunami daytay bagnet a naibaybayag a nailuto ken kumarandikang.

Immadu ti displey nga alsong ken gilingan iti San Esteban. Adda payen dagiti slabs wenno nakorte a bato nga aramiden para iti flooring, dalan, diding ken uray anian a pangusaran. Pasaray met nataratar iti displeyan dagiti usaren iti panaggapas iti Candon City, Sta. Lucia ken Sta. Cruz, dagiti linaga iti Candon City ken Tagudin ken dagiti ubas iti Narvacan, malaksid laeng nga ikalab wenno yuli dagiti aglaklako kadagiti bus ken dadduma a lugan.

Amin dagitoy ket mangipakita iti kinasaldet ken kinagaget ni Ilokano.

Iti aniaman a lugar, no kayat ti rumang-ay, nasken ti yaagawa.#