ITI DUYOG TI SINGASING: Gubat ti Dila (Umuna a paset)

Naisurattayon iti napalpalabas ti maipapan iti ‘Gubat ti Dila’. Nagduduma a presentasion iti kapanunotan ken panirigan ngem agingga iti agdama agtultuloy latta ti kinaadda dagiti pagsasao (language) a nailupeklupek, nabaybay-an wenno binaybay-an ket inarakup ti sabali a sao, pinatay ti biddut a panirigan ken sistema ti edukasion,  ken sitatallugod a pananglipat wenno panangpanaw iti bukod a sao. Sitatallugod ta mismo a dagiti kameng ti puli wenno dagiti sumagmamano wenno kaaduan nga annabo ti puli ti mismo a nanglipat wenno dida kayat ti agsao iti kabukbukodan a sao dagiti appoda. Dagiti dadduma, mabainda pay a mangibaga ti kinaasinoda wenno puli a nagtaudanda.

Sumagmamano laeng dagitoy ti impresentartayo a paliiw. Mismo a datayo ti nagpaliiw ken nagob-obserbar ken nakaimatang. Sinirmatatayo ti in-inut a pannakatay ti bukodtayo a dila – wenno ti bukodtayo a pagsasao – ti Ilocano, Ilokano, Iloko, Iluko wenno Samtoy.

Banag a saan a mapasamak iti sabali a nasion, agsipud ta irupirda ti karbengan ti pulida, gapu ta adda dayta iti kalintegan ti tao (human rights).

Napaliiwtayo ti in-inut a pannakatay ti bukodtayo a dila babaen ti sabali a dila. No asino ti natibtibker ti sangina a puli wenno annabo ti puli a mangipatpateg itoy isu ti agballigi. No asino a puli ti nasikap isu ti agikut iti pannaranay ken pannakaitandudo. Kasla ketdin nga iti daytoy a language war, taraon met laeng ti lengguahe  ti sabali a lengguahe wenno dagiti dadduma a dialekto, lalo dagiti babassit ken awanan sangi a mangirupir iti kalinteganda wenno kas co-existence.

Kas insurat ni Dr. Pamela Constantino iti “Tagalog/Pilipino/Filipino: Do they differ in Executive Order No 134?,”  “…The language Pilipino was the Filipino National Language (in 1943) that was based on Tagalog beginning in 1959 when Department Order No. 7 was passed by then Secretary Jose Romero of the Department of Education. The same name (Pilipino) was also used for the official language, the language for teaching and subject national language starting 1959. This stopped only when Filipino was approved as the national language. Filipino was the name used to call the national language in the 1987 Constitution….”

Innayon pay ni Constantino: “It was apparent that Pilipino was also Tagalog in concept and structure and there was no Pilipino language before 1959. Also, there was no Filipino language before 1973. Pilipino is different from Filipino even though both became national languages because these are different concepts — one was based on only one language and the other on many languages.”

Ta ania ngamin daytoy nga argumento itoy a sinurat?

Pannakabalusingsing iti annuroten ti international human rights standards. Ta mabasa a linaon ti UN Charter on the Rights of the Child daytoy a panangisakit ti kabukbukodan a sao. Iti Article 29 ti nasao a kalintegan ti tao (human rights), mabasa daytoy: “State Parties agree that the education of a child shall be directed to [among other goals]…the development of respect for human rights and fundamental freedoms,” the child’s cultural identity, language, and values, and peace, tolerance, equality of sexes, and friendship among all peoples, ethnic, national and religious groups and persons of indigenous origin.”

Maysa ‘toy pagilian kadagiti signatories iti kalintegan ti tao. Ngem iti laksid ti pannakitaripnongna ken pannakigamulona kadagiti annuroten ken maysa kadagiti signatories itoy a kalintegan, agtultuloy latta met ti pannakapukaw dagiti kabukbukodan a dila. Awan ti implimentasion dagita a bileg iti pagilian. Lalo kadagiti minoridad nga etniko.

Mabasa pay iti Article 30 iti isu met laeng a kalintegan: “In those States in which ethnic, religious or linguistic minorities or persons of indigenous origin exist, a child belonging to such a minority or who is indigenous shall not be denied the right, in community with other members of his or her group, to enjoy his or her own culture, to profess and practice his or her own religion, or to use his or her own language.”

To use his or her own language. Panangaramat ti kabukbukodan a dila wenno sao. Ngem kas kapaliiwan iti mapaspasamak iti kagimongan, saan a maitandudo daytoy a kalintegan. Saan a maikaskaso. Saan a maikkan iti importansia.

(Adda tuloyna)