ITI DUYOG TI SINGASING: Intay agkulisip iti basi ken daniw (Maudi a paset)

Kellaat a naibun-ay ti agsaringgayad iti suelo nga isemko ta naawatan gayam ni baket dayta nasutil ken nagantil a daniw daydi kumparik a Bagnos Cudiamat a napauluan iti “Bay-annak Man Nga Agunnoy”.

Ngem nagbalawak ta serioso metten ti rupa ni commander-in-chief. Ania man ngatan ti mulmulmolan ti mugingna?

“Apay, no matmatannak, kaslaka met agpasinan?” nasaludsodko.

“Alla, lakay, saan kadi a kankantaen dagiti babaket ken lallakay idi kadagiti ubbing? ‘Pekpekkel a pekpekkel/ta daras a dumakkel…”

“Ket?” sinaludsodko idinto a nagbaniekesak a nangmulagat kenkuana, makaibagbagaakon nga alas-kuatron ket di pay la mapan aglako iti nateng ken prutas iti pagtagilakuanmi iti Engineer’s Hill Satellite Market (Baguio City) ta di ket sabali manen ti pakain-intonaranna.

“Balakad dagiti sukitayo a babbaket a taga-Cabinet Hill-Teachers Camp, nasaysayaat no isardengmo laengen ti panaginummo iti arak ta amangan no idaniwkonto met…” kunana a nagserioso ken nakipinnerreng.

“Idaniw ti…?” lalo a pinadakkelko ti mulagatko kenkuana.

“Padeppel a padeppel/ pasas met ti ideldel…” Ket uray la nagindayon dagiti patongna ken nagaatiddog dagiti widawidna a rimmuar iti siled nga aggargarikgik. Nabatiak a nakanganga, nakamulagat ken mangkudkudkod ti di met nagatel a tuktok!

Ha-ha-ha! Ania ket ti asawakon, aya? Ti la ketdin mapidpidutna kadagiti sukina a natarabit ken nasarawitwit. Pasas, hmp…?

Uray pasas, nakasamsam-it latta ta agnanayon a nasam-it ti panagayat ni Ilokano, ania la ketdin, aya! No ania man ti mulmulmolan ti mugingmo iti agdama, isu dayta ti maysa a kaipapanan ti daniw.

Wen, pudno la unay a makapnek-makapatig-ab,  nagpipintas ken suabe dagiti balikas-erotika iti Literatura Ilokana. Saan nga aron ken segged a mangipangato ti libido ken irarasuk-derrep no di ket nakaisigudanda a kinasutil ken kinagantil ta dagita ti naisalsalumina a rekado ti nasalibukag, naganaygay, naragsak ken naannayas a panagbiag ni Ilokano.

Ala, inton maaramid dayta proyekto ti ‘Basi ken Daniw’  a pagpaayan da Roy Aragon, Ariel Tabag ken Mighty Rasing a kas editor, ikaudkonto met ti virtual (pay laeng) nga ungot tapno innakto man met simsiman ti ingel, imas ken imnas dagiti dandaniw nga erotika iti Literatura Ilokana iti agdama a panawen; barbareng kas kaimas no diman naim-imas ngem dagiti concoction manipud iti kayo a putar da foremost poet Joyce Kilmer ken 1973 National Artist for Literature Jose Garcia Villa; dagiti dandaniw ken kankanta a timmaud manipud iti lubuag ti daga ken nagnagna a siwawaya kadagiti parparaangan, bitbit-ang ken kalkalsada, iti man kabus wenno kidem a rabii wenno simmagaysay a bulan; naggudaod kadagiti kataltalonan ken kabangkagan, iti tepteppang dagiti karayan, kadagiti wawaig ken paspasayak, iti aplaya man wenno iti tengnga ti baybay, kadagiti siudad wenno probinsia; iti panawen a katutudo wenno kalgaw; adda dagitoy a bunga ti Literatura Ilokana iti agnanayon a dinto pulos mapukaw wenno agmawmaw…

Tay man ngarud benbenyo a naupran iti pasas, ta ne, kimbeten ti karabukobko!

Mangideldelkayo man a, ta mansiat tako ngalud. Ayye, ta maid met ‘ya manwalas-walas!#