ITI DUYOG TI SINGASING: Interbio (Tuloyna)

Conceited. Kontrabida. Agpapaimportante nga aplikante.  Alas-otso y media iti bigat ti imbagada nga oras ti interbiom ngem napanka met iti alas-kuatro y media iti malem, hmm, namnamaem ngarud a maalaka? Wenno saan, sika ti agpauray imbes a sika ti aguray iti mangiterbio kenka. 

Maysa nga oras sakbay ti imbagada nga interbiom, masapul nga adddakan nga agur-uray. Ania ti ammom no adda  agpalpaliiw kenka ket kunana a nagsapaka. Nayon a pogi points dayta, ta ti kinasapam wenno punctuality a makunkuna, ipakitam nga interesadoka la unay iti kayatmo a sumrekan a trabaho.  Dakkel la unay a preperensia dayta nga interes. Ngem no dua, tallo nga aldaw wenno lawas pay ti ladawmo iti interbio, ahuu, amangan  no adda payen naalada.

No naibaga ti oras iti ipapanmo, aramidem dayta ken sapsapaem pay no mabalin. Saanka nga agpapaimportante ta itoy a panawen, pinullon ti aplikante iti maysa laeng a bakante.

3. Poor use of English. Adtoytayo manen. Apay ti poor use of English? English ti global language ti business ken trade skills. Kayattayo man ken saan, awan ti maaramidantayo. Market competition is the name of the game. Nainget la unay a pagannurotan daytoy iti global market. Nasken a makibagayka no di man makisinnanggolka iti labor force iti global market.  No dimo ammo, wenno appigudka nga agsao iti English, basbassit ti tiansam para iti global market force. Maibilang met a ramen iti interpersonal skills daytoy. Kabaelam ti makipulapol iti uray ania a puli iti uray ania a kanito.

Idi Pebrero 27 itoy a tawen, naangay ti maysa a symposium mainaig iti ‘IT Today’ a  nakaamadan kadagiti IT Specialist iti agdama no ania ti masakbayan, parikut, status ti information technology. Dinamagko iti resource speaker no adda epektona ti poor use of English iti panagdur-as ti IT. Kunana a daytoy ti kangrunaan a lapped iti dur-asan ti IT. Inggunamgunamna a maikkan iti preperensia daytoy a banag. English ti lengguahe iti IT ken computing. Napaliiwko met iti symposium a Tagalog no agsaludsod dagiti partisipante idinto a di pay nag-Tagalog ti speaker.  

Poor use of English. Dakkel ti epektona, ngamin English ti mayoria a lengguahe iti information highway. English dagiti software, programming, ken dadduma pay nga aspeto iti computing. Ngarud, nasisita la unay a kabisadom met ti English, wenno kas iti yad-adal daytoy a  segmento, nasken ti panagsaom, nawayaka nga agsao,  agsaoka a saan nga agtabbed iti man Tagalog, Iluko wenno iti English.

4. Overemphasis of money. Daydiay panagessem unay iti kuarta. Kas pagarigan, ta iti interbiom, inikkandaka iti proyekto, no kasanom  nga inka  ipatungpal, ngem insungbatmo met a depende iti budget. Overemphasis iti kuarta daytan, kayatna a sawen, napatpateg kenka dayta a budget. A kasla dika makapaggunay no awan ti budget. Kadagiti eksperto, daytoy a saludsod ti gagangay a pakatnagan dagiti aplikante.

Overemphasis of money. Kasanon no pledges wenno kari pay laeng dagiti  pundo ti proyekto? Sabali ti pundo a cash on hand ken ti pledges. Mapanmo pay laeng singiren ti pledges.

Wenno saan, awan ti pundo ti proyekto ket sika a mismo ti agsapul iti pundo. Adda  dagiti kompania a kastoy ti patakaranda lalo no kayat a suoten ti kompania ti empleado nga agbalin a resourceful  ken self-reliant. Dagitoy dua a kalidad ti sapsapulen ti employer iti maysa a trabahador. Adda pakairanudan kenkuana a makuna.

Ket siempre, no  agballigika ken dakkel ti naipastrekmo iti kompania, saanka met a mabain a dumawat iti insentibo gapu iti nagapuanam. Usarem ditoy ti kinalaingmo iti interpersonal a dumawat iti increase wenno bonus wenno insentibo.

Kadagiti dadduma pay a kompania, damagenda a dagus no mano ti kayatmo a sueldo. Itoy a saludsodda, saanmo nga ibaga ti kas kangato dagiti bituen. Naynay a pakatnagan ti aplikante daytoy a banag.   

 5. Poor scholastic record. La  unay a. Amangan no kunaen ti employer kalpasan a nabasana ti transcript of recordsmo: “Ania ngay ti pangusarak kadagitoy wasay? Saankami met a concessionaire iti sawmill, saan met a lumberjack ti sapsapulenmi nga adu ti wasayna,” no kunana ngay?

Sabagay, saanna nga ibaga dayta ta sarkastiko, ngem no bilang nay ta adda met dagiti HR specialist a di makateppel no kua wenno istilona ti naangaw ken aggaramat kadagiti pun ken sarkastiko a binatog.

Wasay. Adu a wasay. Pasig a seven, ti kayatko a sawen, 75 agingga iti 79 a grado. No saan met, nataratar a pasig a tres ti linaon ti transcript. Kayatna a sawen a naasian la ngata ti instructor wenno ti eskuelaan kenka ta nagagetka met nga agbayad iti tuition fee isu nga inikkannaka iti grado a tres. Ken maysa, manmano ti eskuelaan a mangted iti 3.25-5.00 iti estudiantena iti final lalo iti transcript. Tres ti kababaan.

No daytoy ti mabasa ti employer iti transcript of record, tabbed met daytoy, kunana la ketdi. Wenno saan, kunana a nasadutka a nagiskuela, isu a pasig a tres  wenno 74 ken 75 ti gradom. Ta  no nagagetka koma, at least, 2.75 ti gradom lalo no kanayonka a sumsumrek. Wenno 80 agpangato.

(Adda tuloyna)