ITI DUYOG TI SINGASING: Interbio (Tuloyna)

Ngarud, apektaran ti poor scholastic record ti iseserrekmo iti trabaho. Ta ania koma ti maibagam nga inadalmo wenno ammom no di aturgaren ti mismo nga eskuelaan a nagadalam a nalaingka?

Poor scholastic record. Napateg la unay daytoy ta isu ti mangipakita nga adda  inadalmo wenno ammom maipapan iti ap-aplayam a trabaho.

6. Lack of respect. Agpalastogkanto ketdin a ninongmo ni mayor wenno asino la ditan a  nangato a tao. Wenno saan, ipalastogmo a degree holderka. Ipakpakitam laeng ti kinataom wenno personalidadmo, a sika daytay nagiskuela ngem awan a pulos ti nasursurona.  

Lack of respect. Panagdayaw. No simrekka iti siled ti paginterbioan a dika la ngarud nagtuktoken, diretsoka pay  a nagtugaw sakanto kasla kalaingan a nagpakpakuyegyeg ken nangipalpalawlaw ti panagkitam iti uneg, ken dika pay pulos pinagunian ti aginterbio wenno no saan,   dagitay sao-underworld ti saom, ayna, adda kadi   namnamaem a maalaka? Kasapulan a dayawem ti kasaom sakbay a sumaoka.     

7. Lack of interest in the company. Adda no kua daydiay saludsod, no kasano ti pannakaammom a bakante ti ap-aplayam. Gagangay a saludsod daytoy. No  rasonmo nga imbaonnaka ni kongresman, ni mayor, ni ninong wenno ni ninang, kayatna metten a sawen nga awan ti interesadom iti kompania, ta mas interesadoka  kadagiti ninong ken ninang a kredentialmo.

Masapul a saganaam ngarud no damagenda  kenka no kasano a naammuam ti kinaadda ti bakante iti kompaniada.

Kasta met a kanayon a saludsod dagiti aginterbio no kasano ti kinalawa ti interesmo a makastrek iti kompania.

Ngem no isungbatmo a nabasam iti diario, ta managbasaka  iti diario wenno ania la ditan a nagsupotan ti tinapa, a saan a kompleto ti aldawmo no dika  makabasa iti diario, ket ti kastoy wenno kasdiay ti paboritom a diario, a saanmo a kayat a basaen daydiay a diario ta kasdiay ken kastoy santo pay daydiay ket kasdiay, siempre, agkatawa ti aginterbio iti inka imbaga. Sakanto pay nakipagkatawa ken agkinkinnatawakayon iti inka is-istoriaen, nalpaskan! Namnamaem kadi a maawatka? Sinakayannaka laeng ti aginterbio iti kinanengnengmo tapno dika mabainan. Saan a kasta ti rumbeng a  sungbat!

Ngem no ti sungbatmo: Nabasam iti anunsio ti diario, interesadoka iti bakante a puesto isu a nagsukisokka maipapan iti kompania,  naallukoyka iti kinapintas ti pribilihio nga it-ited ti kompania kadagiti trabahadorna, nga ibilang dagiti opisial a kabsat dagiti empleado, a nangato ti interpersonal relationship ti kompania,  sa ammom pay ti nagan dagitoy  a mangimaton ken dadduma pay, makitan nga adda interesmo iti trabaho ken ti kompania. Interesadoka ta inammom ti kompania ken dagiti mangimaton itoy. Addaanka iti interes a makuna.

8. Radical ideas. Kadagitoy a tiempo, saan a kayat ti kompania ti radical-minded. Buong ti ulo iti masanguanan nga aldaw, kunada. Lalo pay a saan a kayat ti kompania a mismo a kameng iti radical nga organisasion ti aplikante  

Sadiay Philex Mines idi 1980s, adda naestoria ti maysa a security officer (gayyemtayo) nga aplikante. Kadagiti test, isu latta ti kangatuan. Nalaing iti amin a banag. Nasayud pay nga agingles iti interbio. Adayo met a lugar ti naggapuanna. Isu nga agduadua dagiti HR Specialist. Inikkanda iti sabali nga eksaminasion ken interbio. Ditoy a natakuatanda a kameng ti radikal nga organization. Nagaplay iti Philex Mines tapno  agorganisa wenno isu ti organizer para iti radical organization no maawat. Siempre, no mangipatulod ti maysa nga underground organization, daydiay talaga a nalaing ken kabaelanna ti agorganisa.   Saan nga inawat ti kompania  ta ti pannakabuangay ti sabali pay a labor union ti panggep ti nakaikappenganna nga organization.

Kadagiti kompania, kangrunaan a siimenda no radical-minded dagiti sumsumrek. Saanda a kayat ti agparikut iti masanguanan  nga aldaw. Ta apaman a maawat ti maysa nga empleado, saan a bastabasta ikkaten daytoy kas sagudayen ti linteg. Lalon a di maikkat no  makabukel payen iti organisasion dagiti  mangmangged.

Kaykayat dagiti kompania  nga alaen dagiti magemgemanda nga empleado.

Napateg ngarud a pagibasaranda ti saan a pannakastrek iti kompania dagiti addan iti radical ideas.

        (Maigibusto)