ITI DUYOG TI SINGASING: Interbio (Tuloyna)

Interesado ti employer  kadagiti trabahador. Isu a no makakita iti makaited iti panagbalbaliw ken makasolbar iti parikut, ora mismo, ibagada a naawatkan ken sumrekkan iti kabigatanna. Ngem no dida imbaga a naawatkan, agpanunotka laengen iti sabali.

No encoder ti kasapulanda koma, nasken a makayenkodka iti 45 words per minute (standard requirement). Ngem nupay naalam nga agpayso  ti 45 words per minute, 25 words met ti mistake, ay, saan a sika ti solbar ti parikut iti panagkasapulanda iti encoder.  

Dagiti kasapulan nga aramidem no ayabannaka ni employer iti interbio.

1. Panagplano ken panangisagana

2. Dumngeg a nalaing ken agobserba

3. Saganaan ti saludsod ken pammaneknek

4. Mangngeddeng a dagus kalpasan ti panangamiris ti situasion

 

1. Panagplano ken panangisagana. Nasken nga ammuem ti panggep ti interbio, no apay a napaayabanka a pagsaludsodan ti employer. Interbiuendaka tapno ammuenda no umno ken maiparbeng met laeng nga alaendaka wenno saan iti trabaho nga idiayada. Isaganam met dayta bagim. Planuem, pattaem ti posible a damagenda kenka. Naynay a  saludsodenda ti ammom iti inaplayam a trabaho, isu a nasken a kabisadom daytoy  nga aramiden ken ibaga, ti maited wenno maitulongmo iti kompania, no sisasaganaka met laeng nga agtrabaho uray awan ti bisor, no sisasaganaka met laeng nga agtrabaho a kas maysa a kameng ti team a saan ket nga individualism, ken dadduma pay.

Saganaam dagitoy. Saanka nga agpannakkel iti character reference-mo. Ta uray pay  nangato a tao dayta a character reference no adda madi a ladawanna iti sarming, nairamankan a naladaman wenno narikian. Isu a bukodmo a bagi ti salakanmo. Ti ammom ti kaskenan.   

2. Dumngeg a nalaing ken agobserba. Denggem ti ibagbaga ti aginterbio tapno dimo paulit ti saludsod. No saan nga umisem, agmisuot no kua ti HR Specialist. Saankami nga agawat iti tuleng ken dagullit, apo, kunananto pay  ketdi. Obserbaram met ti ibagbagana. Napateg dagitoy a panagsagana.

3. Saganaan ti saludsod ken ti pammaneknek.

Ulitenta  manen ti ehemplo iti ngato: “Ammom ti agaramid ti payroll?” Agsipud ta naggraduarka iti information technology, wen kunam, no talaga nga ammom. Kasapulan manen ti pammaneknek isu nga ibagam nga aramidem ta apagbiit met laeng a mairingpasmo no talaga nga ammom.  

4. Mangngeddeng a dagus kalpasan ti panangamiris ti situasion. Okey, imbagada a naawatkan. Ngem minimum laeng ti sueldom. Dakdakkel ti sueldom iti ayanmo iti agdama. Siempre no dimo kayat, ibagam a dagus tapno agsabatkayo. Nasken nga agsaoka, saan ket a saka la agreklamo no nakapirmakan iti waiver wenno madamakan nga agtartrabaho. No dimo kayat ti offer a sueldo, ibagam ti riknam. No kurang ti benepisio, opsionmo nga aplikante ti agsanud uray imbagada nga awatendaka.

Nupay  kasta, adda met dagiti makaapekto iti saan a pannakaawat iti sumrekan, a kas iti sumaganad:

1. poor personal appearance

2. overbearing, aggressive, conceited

3. poor English

4. overemphasis of money

5. poor scholastic record

6. lack of courtesy

7. lack of interest in the company

8. radical ideas

 

No adda uray maysa nga ikutmo kadagitoy negatibo nga aspeto, dakkel ti posibilidad a dika makastrek iti sumsumrekam. Uray maysa  laeng kadagita walo a nadakamat, apektadon ti iseserrekmo.

Ta  ania  ngamin aya dagitoy?

1. Poor personal appearance. Daytay agdudugyotka, dika man la nagdigos a mapan agpainterbio. Dika man la nagsagaysay. Improper hygiene.

Iti interbio, nasken nga  ipakitam a nangato ti kalidad ti personal appearancemo. A kabaelam met ti agbado iti disente. Uray daan wenno panawen pay laeng ni Limahong dayta a badom no la ketdi nadalus ken disente a makita. Business attire para iti mangopina. Kadagiti adda iti trade skills, at least, masapul ti nadalus met bassit a kawes ken mararaem a takder. First impression technique. First impression lasts!

2. Overbearing, aggressive, conceited. Overbearing. Isu daytoy daydiay ngay pangas, lastog, ken arogante. Saan a maikkat daytoy lalo kadagiti nangato ti puruana.

Pagpangasmonto ketdi nga anaknaka ni kastoy,  ninong wenno ninangmo ni kasdiay,  kabagiam ni pulano wenno pulana, barkadam ni ampangog wenno ampangag, wenno nagtugawka ket kontodo kuyegyeg ti sikkawilmo ken saoka a sao iti awan met kaes-eskanna, wenno saan, kunam la no asino a ponso pilato a simrek iti opisina, hmmn, no kastoy ti idiarmo, negatibo, ket 99% a didaka alaen iti sumsumrekam.

Aggressive. Kontra-pelo. Daydiay mangipapilit iti ammona, nakarkaron no saan met a husto ti ibagbagana!

No agpainterbioka, ket nalalaingka pay ngem daydiay aginterbio kenka, apagtallikudmo pay laeng, ibasuranan ti papelmo! Ania met daytoy a tao, kunanan a, ket, awanen. Ti manginterbio kenka ti mangeddeng no maawatka wenno saan. Ngem no maysaka a kontra-pelo wenno dominante a tao, awan a, dimo namnamaen nga awatendaka. Ta iti maysa a kompania, agtrabaho amin a kas maymaysa a team. Awan dayta domdominante, mangipapilit iti kayatna. Adda dagiti sursuroten nga annuroten ken paglintegan wenno procedures.

(Adda tuloyna)