ITI DUYOG TI SINGASING: Interbio

Kas pagarigan ta IT ti kursom ket sumsumrekka iti trabaho, no damagen wenno ipaaramid kenka ti aginterbio no kasano ti mangsumar iti masueldo ti sangaribu a trabahador a saan nga agpapada ti ganarda, ti total ti orasda iti regular a trabaho ken iti overtime, ti ganarda iti ora/aldaw, a saan nga agpapada ti deductionda, ania ti aramidem? No dika nagsukisok, wenno dimo inadal, wenno di inyadal ti nagiskuelaam, dimo la ketdi ammo daytoy. Isu a kasapulan ti reserts ken panangipadas sakbay a mainterbioka. Lalo no adda bukodda nga accounting software. No saan met, VLookup laeng ken wenno IF function dayta. Fundamentals wenno basic laeng iti computing system.

Reserts. Nasken nga agresertska sakbay a sumabakka iti interbio iti sumrekam a trabaho.

Ta ania ngamin aya ti interbio? Apay a nasken pay laeng ti interbio no sumrekka iti trabaho?

 Adtoy dagiti rason ti interbio.

1. panagkalap iti impormasion

2. panangparnuay iti panagbalbaliw

3. solbaren ti parikut

 

Panagkalap iti impormasion. Ti personal background ti sumsumrek. Educational background ken dadduma pay. Ta kaadduan kadagiti sumsumrek iti trabaho ti mangpabussog iti resumeda, name-dropping iti character reference, pati iti history of employment,  ibagana a nagtrabaho uray saan, ken kas gagangay a mapaspasamak, ibagana a kabaelanna dayta a trabaho ngem saan met  gayam. Namnamaenna a makastrek dita gapu ta dakkel ti natugawan (ti) dagiti character reference wenno aw-awaganda iti endorsement credential.

Lalo no gobierno ti sumrekam. Ta  adu dagiti sumrek ken nakastrek iti trabaho gapu laeng iti nangiserrek kenkuana, saan a gapu iti ammo wenno skills a kabaelanna. Wenno saan,   ginatangna ti item iti plantilla.  Panawen pay laeng ti kupongkupong ti panaggatang iti item iti plantilla ket maibilang daytoy a sakit ti gimong. Ket no maamak ni boss wenno idiktarna nga iserrek ni kasdiay wenno ni kastoy, nalpas ti minimini.

Ngem kasanon  no iti pribado a sector ti sumrekam?  Iti pribado a sector, saan nga agbalin ti padrino ken ginatang nga item iti rank and file. No adda man mapaspasamak a kastoy, bassit laeng nga ilgat. Kasapulan a talaga ti ammo,  saan a no asino ti am-ammo.

Adda pay dagiti negosio iti pribado a sector a dida kayat nga awaten ti aplikante no ibagana nga adda kabagian wenno am-ammona iti uneg. Dagitoy dagidiay negosio a kayatda a suruan ti empleadoda a saan ket a ti empleado ti mangisuro kadakuada.

Iti interbio, no ibagam ti kinaasino dagiti mangimaton ti kompania, ken no apay nga am-ammom ida, ibagam ti pudno, a nagresertska nga umuna ta interesadoka a makipaset iti dayta a workforce. Ken ipanamnamam ken ipasiguradom a kabaelam nga aramiden dayta a trabaho, no di man mangited iti am-amang pay a dur-as ken panagbalbaliw (innovation).

 

    Panagbalbaliw. No adda met laeng maited ti aplikante a panagbalbaliw iti trabaho a sumrekanna. Kayatna a sawen, no adda met laeng  maitulong dayta nga aplikante. Amangan no ‘wall flower’ wenno awan ti aramidenna  no di laeng nakatakder.

Adtoy man nga estoriaek ti maipapan itoy. Nakastrek ti empleado ta kayong ti regional director ti BIR. Idi nagsukat ti regional director (kada uppat a tawen), aburidon ti simmukat kenkuana idi kitaenna dagiti empleadona. Nakitana dayta nga inserrek ti sinukatanna a director nga awan ti aramidna. Drayber ti nakadeklara a posisionna ngem dina ammo ti agmaneho. Dina met ngarud ammo ti agmakinilia  (makinilia pay laeng idi) ta tumulong la koman a kas typist.

Panagbalbaliw. Ti employer, birokenna ti panagbalbaliw.

Kas iti ehemplo ti IT graduate. Idi, mabayag nga aramiden ti payroll. Adu a sumar a manual.Ngem ita, mabayagen daydiay agmalem a panagsumar no sangsangaribu laeng dagiti empleado. Lalo ita a panawen ti kompiuter. Addan  spreadsheet solution ken software designs para itoy a benneg. Kaaduanna pay ketdin a kompania ket bukodda a design ken programs dagiti spreadsheetda. Aramid dagitoy dagiti software specialist ken programmer. No ekspertoka iti spreadsheet, nagbiit nga aramiden ti payroll.  Maysa ti Excel iti Microsoft kadagitoy nga spreadsheet solution. Maysa laeng ti nasaotayo itay a VLookup ken If Function kadagiti nagkaadu nga accounting spreadsheet solutions tapno mapadaras a solbaren ti aniaman a kuenta.

 

Solbaren ti parikut. Kas iti nadakamat iti ngato, kasapulanda a talaga ti encoder a napartak nga agisagana iti payroll, isu a damagenda no kabaelam dayta panangaramidmo iti payroll ti sangaribu a tao. Kabaelam a talaga  ta Information Technology graduateka wenno computer-based nga accounting graduate.  Inadalmo dayta. Ken sinukisokmo pay. Ngarud, no ipaaramid kenka ti aginterbio, aramidem ken kontodo sao. Kastoy, kunamon… sawem ti procedure, presto, no makitana a mismo nga inaramidmo iti bassit a laeng a kanito, impresibo dayta, ket kunana la ketdi, “You’re hired!”

Ngem no imbagana a tawagannakanto, awanen ti namnamam a makastrek iti inaplayam a trabaho.

        (Adda tuloyna)