ITI DUYOG TI SINGASING: Nabugi dagiti nakalap iti 3rd Premio Duque (Tuloyna)

Kayat a sawen ti inhiniero a salsallukoban ken paypayongan ni Rey Vitug ti akinkukua ti kompania kadagiti indulto a pinarnuayna; uray no isu ti agrigat ken maibabain kadagiti transaksion. Isu nga imballakadna a sumapul laengen ni Rey Vitug iti sabali a pagtrabahuan. Ta di ket kasla payong a para sarapa kadagiti indulto ti kompania.

Uray dagiti gagangay nga empleado a kas ken ni Rey Vitug ket mangriknada met iti pannakaisualit ti karbenganda. Lalo no mariknada a saan a pulos a masubadan ti kinasinseridadda. Karbenganda met ti sumapul iti sabali a ‘sumallukobanda a payong’ wenno iti sabali a trabaho kas maitutop iti kinasinseridad ken kinaganetgetda. Ta rumbeng laeng a masubadan iti imbag ti kinapasnek ken dedikasionda iti trabahoda.

Ti kinadedikasion ken kinasinseridad iti trabaho ket ipamatmatna ti kinaasino.

Kas kadagiti nangab-abak pay a sarita ni Jake F. Ilac,  makaay-ayo la unay iti daytoy a sarita ti mood wenno karirikna ti bida a marikna ken mapaliiw dagiti readers. Saanna nga imbaga daytoy no di ket inggunamgunamna nga imparikna-imparaman ken kinontrol manipud iti rugi agingga iti gibusna.

Daytoy ti maysa a gupit toy sarita ni Jake. Ammona a yallatiw kadagiti readers ti atmospera ti kapanunotan, karirikna ken marikrikna ti bidana. Ngarud, iggemna a kas author ti relationship dagiti readers ken ti basbasaenda a sarita. Adda kadagiti dakulapna ti interes a nasken  nga ilalaenna unay.

No saan nga agkonekta wenno saan a marikna ti relationship dagiti readers ken ti basbasaenda, nungka met a maapresiar ti sinurat a nangpespesan ni author ti kinalaingna wenno ti inaramidna a sarita.

Ta ania ngamin aya ti akem ni mannurat iti sinuratna?

Daytoy ti sungbat ni E. M. Foster: “A good fiction writer should be able to do both: tell stories and weave plots.” Daytoy ti sikreto a gupit ken awid ‘toy sarita, ta agis-istoria kadagiti naurnos ken naabel a nasayaat a pagteng wenno balabala.

Ammo ti mannurat ti agistoria ken agabel kadagiti balabala, kuna ni Foster. Uray ammo ti maysa a tao ti agistoria no dina met ammo ti agabel iti balabala, awan mamaayna. Uray no ammona ti agabel iti balabala no di met makaay-ayo ti istilona nga agistoria wenno dina ammo ti agistoria, appigud, aglalaok dagiti bamban kada alupasi, barut ken nylon, nasagursor, awan latta. Isu a masapul nga agpada  a nalaing nga agistoria ken agabel iti balabala ti mannurat.

Simple laeng ti sarita. Gagangay nga istoria ti biag – pakasaritaan ti trabaho – ngem makaay-ayo agsipud iti naikawes a panagiparang iti sarita a kas kinuna ni Foster. Saan pay a brutal wenno awan ti napasamak a kinadang-as.

Agsipud ta adda development ken panagbalbaliw iti sarita, maitutop la unay ti kinaadda met ti development ken panagbalbaliw ti karakter ti bida. Round character.

Ti pay nakadidillaw ken makapatig-ab iti sarita ni Jake ti panangilukatna ti sarita iti posible a mangited ken ni Rey Vitug iti panagbalbaliw. Isu met la daytoy ti nangigibusanna. Ngarud, adda koneksion ti nangirugianna ken ti nangigibusanna.

Dakkel ti akem ni Mr. Carl Choong iti panagbalbaliw ti biag ti bida. Dakkel nga akem a nangrugian ti sarita ken isu met laeng ti nangigibusanna.

Iti librotayo nga Iti Duyog Ti Singasing II, intay nadakamat daytoy nga istruktura ti sarita. Intay inawagan iti clockwise structure. No sadino ti nangrugian, isu met ti pangigibusan.

Kas iti sarita ni Kerima Polotan a “The Kite.” Dagiti tallo a nangabak a sarita ni Tawid News Magasin publisher Salvador A. Espejo a “Kuadrado a Lubong”, “Bangkero” ken ti “Diego M. Alas, Taxi Driver”. Impangabaktayo met daytoy nga istruktura iti saritatayo a “Maysa nga Aldaw iti Biag ni John Cruzado” iti salip ti GUMIL California.

No adda desdes dagiti ayup, kali ti karayan ken waig, riles ti tren, no adda ruta a dalan dagiti eroplano ken barko,  kasta met dagiti pampasahero a bus ken dyip, ken dadduma pay, nabaked met dagiti sarita a naisakab iti nabukel nga istruktura.

Kas iti nasaotayon, umam-amnut ken pumimpintas dagiti sursuraten ni Jake a sarita.

Nabara a kablaaw!#