ITI DUYOG TI SINGASING: Nom de Plume (Maudi a paset)

Adu dagiti nom de plume a nalatlatak nga adayo ngem ti pudno a nagan dagiti mannurat. Mangdakamattayo laeng iti sumagmamano. Kas  iti bigbigbigentayo a mannurat a ni Anatole France, nom de plume gayam ni Jacques Anatole François Thibault; ti paboritotayo a mannurat nga eksperto iti twist ending, ni O. Henry, maysa met gayam a nom de plume ni William Sydney Porter; ni Mark Twain, a maysa a nom de plume, nalatlatak pay  ngem ni Samuel Langhorne Clemens a makinnagan; ad-adu ti makaam-ammo iti lubong ken ni mannurat ken philosopher  Voltaire a maysa laeng a nom de plume ni François-Marie Arouet; ken ti nalatak a mannaniw a ni Joyce Kilmer a  ni Alfred Joyce Kilmer ti pudno a naganna.

Iti agdama, nagadu dagiti libro ni Ayn Rand kadagiti bookstores ken nagbalinda pay a best seller ngem nom de plume ni Alisa Zinov’yevna Rosenbaum. Uray ti nalatak nga autor dagiti libro a  Harry Potter a ni J. K. Rowling ket pen name ni Joanne Rowling. Awan ti middle name ni Joanne, inusarna ti umuna a letra ti nagan ti lolana a Kathleen isu a nagbalin a J. K. Rowling ti nom de plumena. Nagaramat ni Joanne iti pen name agsipud ta daytoy ti imballakad ti kakaisuna a publisher a nangawat iti umuna a librona a Harry Potter gapu iti pammati a di kayat dagiti ubbing a lallaki ti agbasa iti libro a sinurat ti maysa a babai.

Iti literatura Ilokana, adu met dagiti nagar-aramat iti nom de plume. Maysa ditoyen ni Juan Hidalgo, Jr. a nagaramat iti dua a nagan ti babai a kas nom de plume, ti Juliet Zamora ken Ruby Peña Rosal.

Wen, adda dagiti mannurat a lallaki a nagaramat iti nagan ni pinay a kas nom de plume kas ti Rio Alma ni Virgilio Almario, ti Ester Aragon ni Efren Abueg, ken ti nalatak unay a Lola Basyang ni Severino Reyes.

Uray ni nalatak unay a Francisco Baltazar ket nom de plume ni Francisco de Cruz Balagtas.

Uray idi panawen ti Kastila, Amerikano, Hapon, panawen ti rebolusion, ken ita a panawen ket nagar-aramat dagiti mannurat ti nom de plume. Kaaduanen iti nom de plume ni Marcelo H. del Pilar a nagaramat iti sangapulo ket tallo a nagan: Plaridel, Dolores Manapat, Piping Dilat, Siling Labuyo, Kupang, Haitalaga, Patos, Carmelo, D. A. Murgas, L.O. Crame, D.M. Calero, Hilario, M. Dati.

Apay nga adu dagiti nalalatak a mannurat a nagar-aramat iti nom de plume, babai man wenno lalaki? Umuna, saan a panangilemmeng ti mannurat ti kinaasinona a kas iti panangipagarup ti kaaduan no di ket ti kinawaya ti asino man nga agdakiwas sadino man ti kayatna a papanan nga awan ti sungsungbatanna a reaksion mainaig ti kinaasinona iti dayta a sinuratna. Adda kabukbukodanna a biag a maiduma iti kabibiag ti pinutarna wenno pinarsuana a karakter. Ta rumbeng laeng nga agsina ti biag ti mannurat iti pinutarna.

Makadua, saan a showy wenno naparammag a mannurat ti agar-aramat wenno nagaramat iti nom de plume. Dayta ti agdadata a kinapudno. Saanna a lubong ti agsao iti nagapuananna. Saanna nga ibaga wenno ipannakkel ti nagapuananna iti asinoman . Umanayen nga isu ket isu.

Kaniak a biang, saantayo a kabukbukodan ti panagsuratan. Inakemtayo laeng daytoy a naikumit kadatayo a pagrebbengan wenno pagduyosan. Adda awis iti kaunggan a tungpalentayo wenno pagustuantayo, total awan met ti mapukaw kadatayo no intay aramiden.

Awan sabali a makinkukua daytoy a kinasirib no di ti Mannakabalin. Adda pay aya sabali? Inaramatnatayo laeng a mangipaduyakyak ti kinaadda ti pannakabalinna wenno binagaannatayo laeng a kabaelantayo met ti kabaelan dagiti tangtangaden ken pagraeman a mannurat. Saantayo a kukua. Nagubbog laeng kadatayo dagiti balikas nga adda nagtaudanna. Nagburayok kadatayo. Naaramattayo laeng a nagubbogan. Saantayo a kukua, ta apagbiittayo laeng ditoy a lubong. Panawantayo, saantayo nga agnanayon ditoy lubong. Ngem agtalinaed dagita nga ubbog ti kinasirib iti lubong. Daytoy a kinasirib a simmakduan ken imminuman dagiti bituen ti literatura ket addanto latta ditoy lubong, agnanayon ti kinaadda ti dayag ken pannakabalinna ta agnanayon met ti kinaadda ti Mannakabalin.

Immaytayo ditoy a lubong ket adu dagiti bukel ni ayat nga intay naimatangan. Maysa ditan ti panagsuratan. Kas napili a nakakita iti ayat, akmentayo wenno aramidentayo laeng ti paset nga intay pinidut ken ipaduyakyak tapno agsantak daytoy nga ‘ayat’ iti sumarsaruno a kaputotan.

Saan ngarud a pagdidinnuskitaran no apay a nagaramat iti nom de plume ti maysa a mannurat. Agpapada dagiti rason a napintek: ti pannakipasetna wenno pinatganna ti kiddaw a nasken a makipaset kadayta nga aramid.

Uray idi saanak pay a konektado iti Saringit Chronicle ken Tawid News Magasin, agar-aramatakon iti nom de plume. Saan nga importante a magemgemantayo ti nagan a mangitayok kadatayo iti kinalatak no di ket umanayen ti pannakilaok ken pannakigamulotayo iti nagan ti arte. Mas importante ti naaramidan ngem ti kinaasino ti nangaramid; total, kas nasaotayon, adda nagtaudan dayta a naaramidantayo. Saantayo a kukua.

Adda sumagmamano a nom de plume nga intay ar-aramaten iti agdama. Ngem kas nakunatayon, saan a ti kinaasino ti nangaramid ti napateg no di ti naaramidan.#