ITI DUYOG TI SINGASING: Nom de Plume

Nagkaadun dagiti nabasbasak a komento ken panirigan kadagiti blogsites, websites ken nadumaduma a forum maipapan iti nom de plume wenno pen name. Kaaduanna a negatibo ti reaksionda ken saanda a napuntaan ti pudno a kaipapanan no apay a nagaramat ti maysa a mannurat iti nom de plume.

Nupay saanko nga ayonan ti kaadduan dagitoy a komento ken panirigan, saanko a kunaen nga awan ti panangrespetok iti kapanunotanda maipapan itoy. Imparangda laeng ti kapanunotanda. Imbatadda laeng ti nawaya a kapanunotanda; nawaya ti asinoman a mangiyebkas iti kapanunotanna.

Kasta met kawaya ti panagsuratan. Karbenganmi met ti maaddaan iti kapada a trato itoy a sinurat.

Saan nga agpapada dagiti rason no apay a nagaramat iti nom de plume ti maysa a mannurat. Malaksid iti tiempo ti gubat wenno rebolusion a ti nom de plume ti us-usaren dagiti kabalieros a nom de guerre. Ngem sabalin daytoy a saritaan.

Adda kabukbukodan a rason ti mannurat nga agaramat iti nom de plume. No aniaman dayta, addan kenkuana. Madakamat laeng siguro ti rason no masaludsod wenno madamag no apay a nagaramat wenno inaramidna dayta a banag. Adda kapkapnekanna a rason ngem saanna a naibaga wenno naipaduyakyak agsipud ta awan met ti agdamag. Apay pay laeng nga ibaga ti kapkapnekan a banag no awan ti agdamag maipapan itoy?

Itoy a punto awan ti naiparang a nagamad iti mismo nga author no di ket dagiti laeng kapanunotanda ti nagtaudan dagiti insuratda. Nupay nawaya ti panangitedda iti opinionda, awan met ti nagsaludsod no apay tapno adda koma pangadawanda iti konklusion ket malawlawaganda a saan ket a  bukodda laeng a kapanunotan.

Ngem kaadduanna a no saanen a madamag, saan metten a maibaga ti pudpudno a kinaasino ti nagaramat iti nom de plume. Agbalin lattan a kasta. Agbalin lattan a palimed. Maammuan laeng nga isu ti partikular a mannurat a nagaramat iti nom de plume no basaenen ti kabibiagna, biodata wenno ti resume. Kadagiti dadduma, saanda payen a a madakdakamat. Bay-anda lattan ti nom de plume nga agbiag ken sibibiag iti panunot dagiti agbasbasa.

Itoy a punto, nalatlatak pay ketdin nga adayo ti nom de plume ngem ti makin-pen name. Binay-anda lattan ti nom de plume a maipasngay ken agbiag a kas iti gagangay a tao. Kas maysa a creative writer, maysa a bunga ti arte ti makapataud iti naidumduma a karakter a nalatak ken pagdidinnamagan. Ta mammarsua met ti maysa a creative writer. Pinarsuana dayta a persona. Inikkanna iti kababalin, ugali ken karisma nga ayaten ken ipateg wenno laisen ken guraen dagiti tao.

Maibilang met a creative writing ti mangparsua iti maysa a nalatak unay a nom de plume. Pinarsua ni mannurat ti ‘author’ a nagaramat iti nom de plume. Dayta nga author ket adda kabukbukodanna nga anges ken biag.

No kasano ti kinarigat iti agparsua iti karakter a saan a matay iti agnanayon, narigrigat pay ti mangparsua iti nom de plume; daytay sumagmamano laeng ti makaammo kadayta a sikreto ti mannurat. Kaadduanna a ti mismo a mannurat ken ti/dagiti kameng iti editorial a nagsuratanna ti makaammo laeng kadayta a ‘panagparsua’ ket lumabas pay dagiti tawen santo maammuan ti kinapudno. Kadagiti dadduma, saandan nga ibagbaga ta awan met ti agdamdamag. Agserbi laengen dayta a palimed ken paset iti creative writing.

No dadduma, nalatlatak pay nga adayo ti nom de plume ngem ti mismo a makinnagan. Nalatlataken dayta nom de plume ngem ti pudno a nagan. Awan ti maaramidan dita, no di akseptaren ti mannurat kadayta a banag. Adda ngamin iti lubong ti creative writing. Panagparsuaan.

Addan dagiti sumagmamano a mannurat a nangisukat ti pudno a naganda idi nagbuniagda iti pinarsuada a nom de plume. Maysa ditan ni Ricardo Eliecer Neftalí Reyes Basoalto, kalaingan a mannurat a taga Chile. Iti panagsuratan iti daniw nga ad-adda nga am-ammo ken nalatlatak ti nom de plume a Pablo Neruda. Gapu itoy, inadaptar ni Ricardo ti nagan a Pablo a kas legal a naganna para iti aniaman a transaksion. Ngem idi naawardan iti 1971 Nobel Prize for Literature, naipasuli ni Ricardo ket timpuar a nom de plumena ni Pablo. Binigbig pay ni Gabriel Garcia Marquez ni Pablo ti nome de plume, saan a ni Ricardo, a “the greatest poet of the 20th century in any language.”

Immawat met mi Marquez a taga-pagilian ti Columbia iti Nobel Prize for Literature idi 1982 ken nangipauso ti sinurat a magical wenno magic realism.

(Adda tuloyna)