ITI DUYOG TI SINGASING: Taldiap kadagiti 10 a Sinurat a Nangimpluensia iti Lubong (Maudi a paset)

Ti El Cid Campeador – Iti Spain
daytoy. Ti kolonisador nga Espania. Pakasaritaan ti maingel a
kabaliero daytoy, ni Rodrigo Diaz de Bivar.






Maibuksilan ti kinamaingel ditoy ni El Cid. Ngem saan a
makita ti kinamaingelna nga agkutkuti iti likudan ti kinatao no di
ket ti tao a kas maingel a parsua iti rabaw ti daga.

Dakkel ti impluensia daytoy a literatura iti western
world wenno iti lumaud, ken kasta metten iti Pilipinas. Ta apay?
Ngamin ti dangadang ti kristianismo ken islam ti pakabuklan daytoy a
sinurat.

Lalo ti extremist islam wenno dagiti mangisaksaknap iti
terorismo iti sangalubongan a sarangten itan ti kristianismo a
kangrunaan a lapped iti dur-asan iti panggep.

Saantayo man a madlaw, ngem mapaliiwtayo nga agsupadi
dagitoy dua a relihion iti panirigan ken panangipatungpal kadagiti
ingpen isu a mapaspasamak ti susik a kas iti nailadawan iti El Cid
Campeador. Ti susik dagitoy a dua ti makunkuna a moderno a
pagpeggadan a sangsanguen ti sangkataoan.

Naipelikula pay daytoy ket da Charlton Heston ken Sophia
Loren dagiti bida.

10. Ti Uncle Tom’s Cabin – daytoy ti mitsa ti porma
ti gobierno a demokrasia ken liberalismo. Panagpapada. Puraw man
wenno nangisit. Nangato wenno nababa. Daytoy ti mitsa ti American
civil war a nagkaykaysaan dagiti amin a nangisit iti Amerika nga
ilabanda ti patas a karbenganda a kas iti puraw. Sinurat daytoy ni
Harriet Beecher Stowe ti America.

Ta saan kadi nga agpapada amin a tao iti karbengan?

(Bay-amon dagita white supremacist a Ku Klux Klan.
Inigges ti agaon a balikas dagiti ngiwat dagiti kinadebdebatek
kadagiti chat box dagiti estasion ti country music iti USA. Mahiligak
a dumngeg iti country music kabayatan nga agkomkompiuterak a kas ita
a sursuratek daytoy. Talaga a kagura dagitoy a white supremacist
dagiti nangisit, nalabassit ken kayumanggi.)

Malagipko man ti kinuna idi Abraham Lincoln iti kaunaan
a panagkitada ken ni Harriet Beecher Stowe, “Daytoy gayam ti bassit
a babai a nangaramid iti nakadakdakkel a gubat.”

Maipapan iti pannakatagabo dagiti Negro ti “Uncle
Tom’s Cabin”. Racial discrimination. Ti nobela ket maipapan iti
nakakaskas-ang a kasasaad dagiti tagabo a Negro kadagidi a panawen.
Daytoy a libro ti nangited iti mitsa iti makunkuna nga American civil
war.

Binasa uray dagiti nalatak a pigura iti rebolusion ti
Pilipinas daytoy a libro ket naimpluensiaanda. Inimpluensiaan daytoy
a libro ti gimong nga awanan iti wayawaya tapno makaruk-at iti
kinaadipen iti bukodna a taeng.

KONKLUSION:

Pudno a nabileg dagitoy a sinurat idi ken marikna pay
laeng ti bilegda iti agdama. Saan laeng a binaliwanda ti panirigan,
kabibiag ken panunot ti maysa nga indibidual no di pay dimmur-as ti
gimong gapu iti panagbalbaliw.

Ngem iti agdama, itoy a panawen ti cyber era, sabali pay
a literatura ti mangit-ited iti impluensia iti sibubukel a lubong.
Dina laeng apektaran ti panirigan, utek, gimong ken trabaho no di pay
ti panagbiag.

Nalabit a kunaentayo a maika-11 daytoy a sinurat a
nangimpluensia iti lubong. Saan laeng a selected ti inimpluensiaanna
no di pay ket sangalubonganen. Awanen ti Islam, Kristiano, Hindu,
wenno kita ti gobierno. Sinaknapen daytoy aminen a literatura.

Immuna a sinurat ni Lady Augusta Ada Byron, anak ti
nalatak a mannaniw, ni Lord Byron ti UK, ti kunkunak a literatura.

Ni Lady Ada Byron ti computer programmer ni Charles
Babbage, ti nangimbento wenno ama ti computing system.

Nalaing a computer programmer ken mathematician ni Lady
Ada. Nagballigi ni Charles Babbage a nangimbento iti computer ken
naawagan a Father of Computer ta dakkel a kinatulonganna ni Lady Ada
.

Kadagiti programmers iti agdama, awaganda iti literatura
dagiti program. Adda dagiti nasayaat a kas itoy a sinuratko ta dakkel
ti naitulong ti kompiuter ngem adda met dagiti saan a nasayaat kas
kadagiti bayolente nga ay-ayam iti kompiuter a nangbalbaliw iti
panunot ken panirigan ken nangiyaw-awan iti panagadal dagiti ubbing.

Adda pagsayaatan ken pagdaksan tunggal literatura.

Anianto pay ngata ti sumaruno a mangimpluensia iti
sangalubongan?#