Panagsao iti Tallaong
Maysa kadagiti kettatan ti kaadduan ti agsao iti tallaong: agdiskurso, sumarita iti maipapan ti maysa a banag, umawat iti mensahe ken aganalisar iti inawat a mensahe, agsao maipapan ti napalabas, agsao maipapan ti maripripirip a masakbayan, agsao maipapan ti mapaspasamak iti agdama.
Tallaong. Dakkel a grupo.
Ta kasano aya ti agdiskurso? Ania ti aramiden? Kasano ti agsao wenno agibbet kadagiti linabag ti balikas?
Sakbay a sungbatantayo dagita, nasken nga ammuentayo pay nga umuna dagiti benneg wenno nabennebenneg a grupo ti tallaong tapno nalaklaka a maawatan ti intay ipalawag maipapan ti panagsao iti tallaong.
1. Para iti dua a tao.
2. Bassit a grupo.
3. Dakkel a grupo.
4. Mass media.
1. Para iti dua a tao. Daytoy ti kagagangayan, ti panagsao wenno panagsinnao ti dua laeng a tao. Ekslusibo. Kas koma dagiti agassawa, ekslusibo dayta a tungtonganda ta duada laeng ti rumbeng nga agtungtong para iti bukodda a pagimbagan wenno pagimbagan ti sapasap no di man ti pamiliada. Uray kadagiti agayan-ayat, ekslusibo met ti tungtonganda ta para laeng kadakuada. Adda man naigna wenno awan ti tungtonganda, awan ti bibiang ti lubong ta ekslusibo a tungtonganda dayta. No dadduma, agin-innarasaas pay dagitoy nga agayan-ayat iti panagsaoda. Isu a kunada no dadduma: whispering sweet nothing. Ken dadduma pay a para iti dua a tao-ekslusibo. Ditoy agsinnukatda iti kapanunotan, agsinnublatda nga agsao.
2. Bassit a grupo. Manipud iti tallo agingga iti walo a tao ti bilangda. Grupo a bassit daytoy nga agtutungtong maipapan ti maysa a banag wenno agan-analisar maipapan ti maysa a banag wenno agsapsapul iti solusion iti maysa a parikut. Posible met a maipapan ti maysa a business meeting. Ditoy agsisinnukatda iti kapanunotan, agsinnublatda nga agsao. Kadagiti dadduma, pasaray adda naituding a batang tunggal maysa nga agsao.
3. Dakkel a grupo. Dakkel a tallaong daytoyen. Malaksid kadagiti panel discussion, saan a sumungbat ti udiens ditoy. Ania dagiti ehemplo kadaytoy a diskurso? Panagsao iti commencement exercise. Iti meeting de avance wenno political, indignation rally. Panagsao iti tallaong iti maysa a pasken wenno okasion nga adda mabendisionan wenno mainaguran. Kabilang ditoy ti state of the city address (SOCA) ken state of the municipality address kadagiti mayor ken katukadna a mangidatag wenno mangipakaammo iti kasasaad ti lugarda ken ti gapuananda ken naaramidanda iti dayta a panawen nga inda panagtakem. Karaman ditoyen ti state of the nation address ti presidente ti pagilian.
4. Mass media. Panagaramaten daytoy kadagiti behikulo ti mass media a kas iti radio, telebision, public address system, pagiwarnak ken aniaman a babasaen, iti printed wenno aniaman nga oral forms.
Dagiti wagas ti panagdiskurso kas kiddawen ti panawen.
1. Impromptu
2. Extemporaneous
3. Manipud iti memoria
4. Manipud iti basbasaen a diskurso
5. Manipud iti power point presentation
1. Impromptu. Asalto. Karirigatan amin daytoy. Agdiskurso a saan a sisasagana. No imbagada nga agsao/agdiskursoka iti dayta met laeng a kanito ket agdiskursokan. Biglaan a kunada. Saanka met a makaatras ta kiniddawdan dayta kenka. Lalo no inwaragawagdan iti tallaong a sumaritaka wenno ay-ayabannaka payen ti ispiker. Saanmo ngaruden a maliklikan. Saan met ngarud a mabalin a “diak a sisasagana a sumao” kunam, ta kaipapananna a saanmo nga ammo ti makibagay wenno makitaripnong iti tallaong. Itoy a punto, no ibagam ti dimo pannakaammo wenno kaawan ammom maipapan iti extemporaneous a panagdiskurso, impakitam met ti kinaasinom wenno kinataom nga awan a talaga ti ammom kadagita a bambanag idinto a nagsimple laeng nga aramiden daytoy a banag. (maituloyto)
