Footer

Ti Arte ti Komunikasion Ilokano 101 (Maika-35 a Paset)

Ania ti aramidem no maipasungalngalka iti impromptu a diskurso?

Dagitoy ti kangrunaan nga aramidem:

1. Mentally alert

2. Ti mensahe wenno kangrunaan nga ibaga

3. Ti taray ti lengguahe wenno panagsao a kas maibagay iti kapanunotan ken tungtongan wenno mensahe.

1. Mentally alert. Relaks. Siempre, no addaka iti maysa a dakkel a tallaong ket madama ti diskurso, dumngegka ta pasetnaka ngarud ti tallaong. Naka-mentally alert ti dumngeg nga udiens, saan a mentally absent. Kas nakunatayon idi madama nga intay ad-adalen ti dumngeg wenno panangawat iti mensahe, tumaud metten iti isiptayo, agrusing iti kapanunotantayo ti kabarbaro nga idea a kayattayo nga ibinglay ken ipadigo no ited dayta ti gundaway kadatayo. Eswes, no dimteng dayta a gundaway ket inawagandatayo nga agsao, sigurado nga intay ibaga ken ibingay wenno ipadigo dayta kabarbaro nga idea. Related topic dayta ta nagrusing a kapanunotan iti napalabas a diskurso a dinengngeg. Mentally alert.

Kasanon no naipasungalngalka nga agsao iti pasken, tallaong nga awan pay ti nangngegmo a nagsao? Daytay sika ti awaganda nga agdiskurso ta awan pay ti kangrunaan a sangaili?

Saan a parikut daytoy no mentally alertka. Kasano? No dimmar-aykan, ammomon no ania a pasken dayta a dar-ayam. Maipapan iti ania? Kasar? Natayan a nasken a mangitedka iti eulogy sakbay a maitabon ti bangkay? Iti inatendaram a panagturpos wenno commencement exercise? No mentally alertka, saan a parikut ti panagdiskursom iti impromptu ta ammom no ania ti napanam ket ammom metten ti aramidem no sika ti maawagan. Usarem laeng ti kinaania ken kinaapay dayta a pasken wenno ti kinapateg dayta a pasken. Dayta laeng ti sungbatam ken panangilawlawagmo ket makunan a diskurso.

2. Extemporaneous. Nalaklaka bassit ngem iti impromptu ta adda sangkabassit a panawenmo a mangisagana iti sawem. Kas pagarigan dumdumngegka ket immasideg kenka ti emcee ket kunana a sumaoka man met, naipasubokan, siempre, Saanka a makakedked. Agbalinka laeng a kj wenno kill joy. Ngem agsipud ta adda pay sumagmamano a minutosmo a mangamiris iti ibagam, daytan ti aramidem. Mangisaganaka iti sangkabassit a sawem. Saanka a mangisurat iti sibubukel nga speech no di ti kangrunaan laeng a sawem. Kas koma no maipapan iti panagabuso iti arak ti kiniddawda kenka a sawem iti extemporaneous, isaganamon dagiti agsasaruno, ulitek – agsasaruno – nga inka ibalikas. Isuratmo iti sangkapirgis a papel wenno ikabesamon. Kas koma itoy a panagsasagannad:

I- Rugi – parikut – no ania ti parikut wenno topiko

II. Dagiti makabartek

III. Gapu iti panagbartek

IV. Epekto ti panagbartek

V. Pananglapped iti panagbartek

VI. Konklusion.

No naisuratmo iti sangkapirgis a papel dagiti naagapad iti ngato, dagita ti surotem nga isawang. Addaankan iti medida wenno pagibatayan iti sawem a naurnos ken nagsasagannad. Irugi ti rugi, maipapan iti parikut No awanen ti masao pay maipapan iti rugi wenno parikut, rugian manen ti sumaruno.

Itoy a wagas, naurnos ken nagsasagannad dagiti inka insawang, ket agraem la ketdi ti tallaong kenka ta kaslaka nakasagana nga agnanayon.

Extemporaneous. Addaanka iti sangkabassit a panawen nga agisagana.

3. Manipud iti memoria. Inkabesa a sawen. Nagsuratka nga immuna, samo inkabesa iti dua nga aldaw wenno dua a lawas. Kas iti valedictory address, salutatory address, ken dadduma pay a naikabesa a diskurso.

Nupay inkabesa, adda latta met option wenno panangbalbaliw ti inkabesa lalo kadagiti balikas a mas nasamsamay iti dayta a gundaway ngem ti insurat ken binasa. Ditoy, gumana ti taray ti utek.

4. Manipud iti basbasaen a diskurso. Adda insuratmo iti papel, santo basaem. Nupay kasta, saan a kas iti agbasa iti nagsupotan iti tinapa ti aramidem nga agbasa no di panangiyebbetmo kadagiti balikas ken panagtaldiapmo iti papel a basbasaen .

Kasayaatan amin no ibasa ti diskurso, ket nasken ti naynay a panangbasabasa sakbay a dumteng ti diskurso ta pamiliarkanton kadayta a diskursom. Iti panangbasabasam, amangan no maikabesam payen ket taldiataldiapam laengen. Iti panagbasam, nasken latta met a taliawem ti udiens iti kanawan, tengnga ken iti kannigid nga agsisinnublat.

5. Manipud iti power point presentation wenno iti projector.

Ditoy, posible a dagiti laeng kangrunaan a sawem ti naikabil a mabuya wenno mabasa. Mabalin a naisuraten amin a sawem ket dita a sarsarunuen ti udiens.

Iti panagdiskurso, kangrunaan a lagipen ti kinaadda ti panagtalek iti bukod a kabaelan (confidence), panangiyibbet a nalawag ken addaan anag dagiti balikas lalo kadagiti kangrunaan a balikas, addaan iti facial expressions (gestures), dagiti kumpas a kas iti nakunatayo idi ken eye-to-eye contact iti udiens. Makatulong amin dagitoy iti interperetasion dagiti dumdumgeg…(maituloyto…)

, ,