ITI DUYOG TI SINGASING: Ti Maika-7 a RFAAFIL (Tuloyna)

Dumteng ti panagbabawi ken ni nangirurumen ken Ina a Nakaparsuaan no mautobna ti agdadata a kinapudno, no makitana ti dakkel a panagbiddutna.

“Liniklikannanto met ngamin ti kainaran. Kinaykayatna ti panagminas nga ines-estoria dagiti kakasinsinna. Pakairanudan kano a dagus, dakkel ti sapul ken adu a paimas iti biag. Adda koma ita idiay Banaue. Ania la ket dagitan a biddut…”

Maysa nga Ifugao ni Mark, ti bida. Nakaasawa iti Ilokana a taga-Cauayan, Isabela. Kas kadagiti agtutubo a nasapa a naasawaan, limmabas iti biagda ken ni Viring ti nalabes a kinaderrep a puon ti saanda a nakatuloyan iti kursoda nga kina-agrikultor.

“Nakapagturposda koma idiay Santiago no dida nasulisog iti ayan-ayatda. Pettat ti panagtaray ken panagkasarda iti hues nga isu ti nakaatakean ni amangna. No impangagna koma dagiti pammagbaga dagiti dadakkelna, agrikulturista koma itan. Matultulonganna koma itan ti inana iti talon a napanawan ti amana…”

Ngem iti laksid ti amin a babawi kadagiti nagbiddutan, dumteng latta met iti isip ti kaadda ti Mannakabalin a pangitalkan iti amin, ni Apo Maknongan, ti Supreme God wenno kangatuan a diosen dagiti Ifugao. Ket kastoy ti makaterred lua a nagaon manipud iti lansad ti barukong ni Mark:

“Apo Maknongan, agyamanak kadagiti paraburmo: ti biagko, da Amang ken Inang, ni Viring, da katugangak…Adu dagiti nagbasbasolak kenka. Nagkurangak kadagiti nagannakko. Natay ni tatang gapu iti panangasawak iti maysa nga Ilokana. Pinanawak ni Inang nga agpatpatulong. Dinadaelko ti panagadal ni Viring. Liniklikak dagiti nakaikamangak. Pinanawak dagiti kakasinsinko. Pinangpang-or ken binungbongmi ni Ina a Nakaparsuaan. Pagbabaywak dagitoy a naar-aramidko. Pakawanennak koma… ket no matayak, pangngaasim ta alaennak iti dennam…”

Uray idi nakalasaten ni Mark, nagtultuloy latta ti kinaasidegna ken ni Apo Maknongan ta naaramidna nga ikararagan dagiti pimmusay a kakasinsinna.

“Apo Maknongan! Alaem koma ida iti dennam…!”

Ket iti paggibusan, dumteng ti naminpitla a panagbabawi iti nagbiddutan ket dumteng metten ti panangabaruanan iti biag.

“Narikna ni Mark ti dakulap ni Viring iti dakulapna. Inlagana dagiti ramayna kadagiti ramay ti asawana. Wen, agawiddan idiay Banaue—ken sumarungkardanto idiay Cauayan.”

Nupay trahedia ti nangipaay iti panagbabawi iti daytoy a sarita, naimpusuan ti panagbabawi. Pudno la unay nga awan ti umuna a babawi no di pasig a maudi. Ngem adda latta panawen ti panagbabawi, uray iti maudi nga anges. Naikonektar ken naibudi iti anges ti naimpusuan a babawi. Isu a no umang-anges pay la ti tao, adda kenkuana, saan a maawan, dayta a panagbabawi. Isu nga aramiden ti panagbabawi kabayatan nga umang-anges, ta no saan, mapukaw ti tiansa no mapukaw metten ti anges.

Iti laksid a madama ken kainget ti trahedia, saan a nalipatan ni Mark ni Apo Maknongan. Maluktan latta ti Ruangan kadagiti agtuktok iti ridaw. Dimteng ti panagbabawi, ti nalaus unay a panagbabawi. Ken araraw nga iti kanibusanan ti biag, makipagnaed iti Mannakabalin. Nauneg ti relasion ken pammati ni Mark ken ni Apo Maknongan.

Sabali a talaga no bumales ni Ina a Nakaparsuaan. Itedna ti didigra wenno kalamidad. Kadagiti saan a nagbabawi, isuda ti aglak-am iti pannusa. Ti agbabawi, isu ti mangabaruanan iti biag.

Naasi pay laeng ni Ina a Nakaparsuaan kadagiti tao iti laksid ti ipalpalak-am ti tao a sagsagabaenna.

Ti mensahe ket adda amin itoy a sarita ken naidanonna kadagiti agbasbasa. Nagballigi ti author a nangiyallawat kadagiti kayatna a mensahe kadagiti agbasbasa.

Ti panagayat iti Ina a Nakaparsuaan ket kas met laeng iti panagayat iti Namarsua.

Naminas daytoy a sarita manipud iti urat dagiti naba iti usok Level 700, naidaya a kas balitok a kapanunotan ket pinabaknangna ti kamalig ti Literatura Ilokana.

Nabara a kablaaw iti author!

(Adda tuloyna)