ITI DUYOG TI SINGASING: Ti Maika-7 a RFAAFIL (Tuloyna)

b. Ni Masong a kapatas dagiti atsero.

“Tsuper ti taksi daydi tatangko. Addaakon iti maikatlo a tawen iti kolehio idi mahold-ap. Limmaban iti hold-aper, pinasokanda iti gripo ti bakrangna. Saanen nga immabut iti hospital. Gapu ta siak ti inaunaan iti lima nga agkakabsat, nagsardengakon a nagbasa. Nagbirokak iti trabaho. Helper iti trak ti troso ti nastrekak. Ditoyen ti nagturposak a kas atsero. No mano a tawen a nagtalinaedak a kasta. Nagbalinak laeng a kapatas dagiti atsero idi sumangpet ditoy ni Boss Ser. Thank you, bossing!”

c. Ni Drigo, ti foreman ti logpond.

“Itoy a biag,” kinuna ni Drigo, “nasken unay ti kinapraktikal tapno makalung-awka iti gayunggayong ti kinakurapay. Kinapudnona, masansan a dagiti gagangay laeng ngem praktikal iti panagut-utekna ti agballigi, imbes a dagiti maibilang a masirib. Uray salukagmo amin a salukag no agkurangka iti siglat, maaruska latta iti lumba ti biag.”

d. Ngem ti boss, ni Servando, ti kakaruan iti amin a natroso ti prinsipiona. Maysa a radikal idi agtutubo ken masansan a sumurot kadagiti rali idi agis-iskuela iti kolehio. Maysa nga idealistiko. Ngem, napukan, in-inut a natuang, sa natroso iti biag.

“Ngem naduktalanna idi agangay a maysa a nadagsen a krus a bakbaklayenna ti kinaradikalna kas estudiante. No kasta nga agaplikar iti trabaho, makutkot latta dagiti rekordna iti polisia a no mamin-ano a naikarsel gapu iti kinamilitantena, kas agad-adal man wenno empleado. Nupay makastrek met iti trabaho sagpaminsan, ad-adu dagiti gundaway a saan. Kakaasi ni baketna a mangyan-anay ti sueldo daytoy a kas gagangay a maestra iti elementaria.”

Nangrugi a maburibor ni Servando idi aggigiddan nga agbasa iti sekundaria ti tallo kadagiti uppat nga annakna. Haiskul pay laeng, marigatanen a mangisakad. Kasanon inton agkolehioda?

Isu a kinontakna ni Jack. Nakaklasena ni Jack. Anak ti politiko iti Cagayan. Nagdiputado. Isu ti kakontak dagiti ganggannaet nga agpupuonan iti panagtroso wenno panagpukan kadagiti kayo iti kabambantayan ti Sierra Madre sada iruar met laeng iti pagilian a mapan iti Korea ken Japan . Kas ken ni Dr. Faustus, kastoy man ti panangilako ni Servando ti kararuana:

“How much do you want to sell yourself, eh?” inamad ti maysa kadagiti Koreano.

Napakidem ni Servando. Nariknana nga immulo a dagus ti darana.

Iti apagdarikmat kayatna nga arrabisen dagiti ganggannaet.

Ngem saanna a naaramid dayta. “Makaammo kaniakon ni Jack,” kinunana.

Naggapu iti rigat, di kayat ni Servando a pagpasaranto met daytoy dagiti annakna. Inkidemna ti panangawatna iti diaya dagiti Koreano, malaksid laeng iti sueldona iti konsesion a dina mapagkedkedan. Kasta met nga inikkan ni Jack iti sueldo a dina mapagkedkedan.

Iti kasta a gundaway a rinitrit dagiti ragadi ti konsesion ti troso ti kinaidealistiko ken kinaradikalna.”

Ni Servando ti kangrunaan nga agbibiag itoy a sarita. Kasta ti panangiladawan ti author ti panangilakona ti prinsipio ken kinataona.

3. Ti troso kas paulo. Umno la unay – kas kaykayo a napukan manipud iti bantay wenno maipapan iti trabaho iti logging concession ken sawmill, ken figuratively, dagiti agbibiag a natroso ti prinsipioda gapu iti ayatda a nam-ay, saan ket a rigat ti lak-amen ti pamiliada. Isu nga adu ti agbalin a Dr. Faustus a mangilako ti kararuada gapu iti panagayatda iti nasayaat a masakbayan dagiti kameng ti pamiliada. Iti biag, maysa daytoy nga agdadata a kinapudno ken mapaspasamak…

a. Premonition. Wenno seniales. Ti sabali pay a pagpintasan ti sarita ket ti premonition a mapaspasamak ken ni Servando sakbay ti kalamidad. Maysa a forewarning kenkuana nga adda dakes a mapasamak kenkuana no dina ikaskaso dayta a banag. Inkabil pay ti author iti rugi ti sarita a kas foreshadowing ti sarita. Ta iti gibus ti sarita, sinublian wenno insubli ti author dayta a paset ti sarita a kas panangilawlawag wenno pannakawarwar ti foreshadowing. Saan ngamin nga inikkan ni Servando ti kaipapanan ti forewarning wenno tagainepna. Naggibus a trahedia ti sarita ta di naikankano dagiti ballaag wenno saan a maawatan dagiti agdidiaya a sumaruno a pagteng.

Ti premonition ket balido a pagteng sakbay ti desgrasia wenno kalamidad. Kas koma iti kinaadda ni Servando iti bangka, ngem naibbatanna ti gaud ken tekken, inanud ken ginuyod ti alinuno ti bangka. Ti kayat a sawen dayta ket palagip nga immulog “iti bangka ti biag a napan iti alinuno.” Wenno iti nalawlawag a kayatna sawen, ti panangidissona ti prinsipiona. Isu nga adu ti igges nga agkuyamkuyam iti paglanglangoyanna. Ket iti udina, naibilangen kadagiti natay wenno dagiti nailungon.

(Adda tuloyna)