ITI DUYOG TI SINGASING: Ti Maika-7 a RFAAFIL (Tuloyna)

Sangapulo ket Tallo a Lagip iti Sakaanan ti Kapitakan a Tanem

Sarita ni Efren A. Inocencio

Maika-3 a Gunggona

PAKAUNA: Maipapan iti deforestation manen. Panangkalbo kadagiti bantay. No maipanggep iti tao kontra nakaparsuaan ti pagsasaritaan, nabaknang iti kapanunotan dagiti mannurat nga Ilokano kas maibasar kadagiti paniriganda kadagiti nangab-abak a sarita, nangruna kadaytoy maika-7 nga RFAAFIL. Nangato nga agpang ti panirigan a mangkonkondena iti di naintaoan nga aramid ken Ina Nakaparsuaan…

Bueno, irugitayo ngarud a siripen ti sarita…

ABABA A TALDIAP ITI SARITA: Nanglimlimo ni Andres Galano wenno ni Andy Gale iti isasangpetna manipud ballasiw taaw ta saanna a kayat nga adda makailasin kenkuana. Iti laksid a nagpakolor iti buokna, nagaramat iti artipisial nga iming, ken no agsao iti English, kunam no talaga a foreigner. Isu ngamin ti sigud a mayor ti La Purisima iti Cadungunan Valley . Dina kayat nga adda makabigbig kenkuana. Kiddis ti konsensia. Ngem kang-runaan iti amin, sumarungkar iti Cadungunan Valley a yan ti nakapasamakan ti nakaam-ames a mudslides. Karaman a nagaburan ni Hilda nga ina ti anak ni Andy, ti apokoda ken ti manugangda a ni Ethel…

AGTURONGEN ni Andres iti calamity area— Cadungunan Valley – naglugan iti taxi.

UMUNA A LAGIP: Maipapan ti ipapasiar ni Andres ken ni Hilda, ti aglaklako iti kakaisuna a tianggi iti lugar. Simmapit iti saritaanda ti maysa a lakay, dina ammo nga isu gayam ti ama ni Hilda. Sarkastiko ti panagsarsarita ni Andres iti lakay. Kuna ti lakay a tinto Cadungunan ti agsagrap iti dusa ti nakaparsuaan…

MAIKA-2 A LAGIP: Ti panagpakaasi dagiti agama a tulongan koma ida ni Andres nga isu ti operations manedier ti logging concession. Agpakpakaasi ti lakay a naospital ti asawana gapu iti eltor ket awan ti kuartada a pangiruarda iti baket. Uray ibatinan ti dokumento ti nuangna. Ngem di kayat ni Andres ta dina nagustuan idi ti kinapilosopo ti lakay, dina kasapulan ti dokumento ti nuang ta di met agtaltalon. Ni Hilda ti nagpakaasi ken ni Andres. Imbaga ni Andres nga agserbi ni Hilda iti dagus daytoy tapno iserbianna. Nayat lattan dagiti agama iti kayat ni Andres…

MAIKA-3 A LAGIP: Ti panagballigi ni Andres a nangiwayat iti gartemna ken ni Hilda…

MAIKA-4 A LAGIP: Kalpasan a naggatang da Andres ken Hilda iti abastoda, nagtugawda iti sirok ti bittaog iti pantok ti turod iti nagbaetan ti Caangilan ken Cadungunan. Imbaga ni Andres nga idi ubing ket arapaapna ti agbalin a mannaniw. Linawlaw dagiti bantay ti Cadungunan, isu a naawagan ti Cadungunan Valley . Ngem iti isip ni Andres, sayang laeng ti lugar…

MAIKA-5 A LAGIP: Ti pannakaammo ni Andres nga aginaw ni Hilda. Daydi met ti sipudna a tinaktakna dagiti taona iti trabahoda tapno agsapul kadagiti narigat a masapulan a masaramsam a paggugusto ni Hilda…

MAIKA-6 A LAGIP: Ti panaganak ni Hilda iti maysa nga ospital iti maysa a probinsia nga adayo iti logging concession. Nagsarak da Andres ken ti sigud a kaduana iti logging concession nga isun ti administrative officer ti ospital. Inamin ni Andres a maikadua nga asawana ni Hilda. Dinamag ni Andres no apay a nauma ti dati a kaduana iti logging. Insungbat daytoy a nakonsensia.

MAIKA-7 A LAGIP: Ti iruruar ni Hilda iti ospital. Ti buniag ti anakda a pinanaganan ni Hilda iti Andrew…

MAIKA-8 A LAGIP: Nabutosan ni Andres a mayor ti Cadungunan babaen ti tulong ni gobernador ken makinkukua iti logging concession. Ni met Andrew ti kasiriban iti klaseda…

(Adda tuloyna)