ITI DUYOG TI SINGASING: Ti Maika-7 a RFAAFIL (Tuloyna)

MAIKA-9 A LAGIP: Ti kinaaddan ni Andres iti ballasiw taaw. Ken ti pannakaawatna iti surat ni Hilda. Ti pannakabasana iti pagiwarnak a rinibu ti natay iti mudslide iti Cadungunan…

NAKAGTENG da Andres iti pagpatinggaan ti lugan. Masapul a pagnaenda ti maysa a kilometro sakbay a madanonda ti Cadungunan. Imbaga ti taxi driver a bunga ti deforestation ti napasamak a kalamidad. Nagindidiaammo ni Andres.

MAIKA-10 A LAGIP: Ti panagung-unget ni Andres iti kapatas ti logging concession ta ipalpalagip daytoy ti selective logging. Impapilit ni Andres a no select kunana, pukanenda amin a kayatda. Imballakadna a gumatangen ti kapatas iti anteohosna ket inikkanna iti sangapaldo a kuarta.

MAIKA-11 A LAGIP: Ti panagung-unget ni Andres kadagiti trabahadorna gapu iti panagmulada iti kayo.

MAIKA-12 A LAGIP: Ti pannakabutos ni Andres a mayor ti La Purisima. Tinulongan ti gobernador a makinkukua iti logging concession. Kuna ti gobernador a nasken nga ikalawada pay ti concessionda.

MAIKA-13 A LAGIP: Bilinen ni Mayor Andres ti district forester a puoranda dagiti immulada a kaykayo tapno makadawatda manen iti pundo manipud iti gobierno para iti reforestation…

NAKAGTENGEN da Andres ken ti taxi driver iti Cadungunan. Ket nasaksian ni Andres ti nakaay-ay-ay a buya…

PAGPINTASAN TI SARITA: Sumagmamano laeng dagitoy a nasiripko…

(1) TI PANNAKAISURATNA. Ikonsiderarko ti presentasion ti sarita a saan a kas iti gagangay. Nupay maipapan iti sangapulo ket tallo a lagip iti kapitakan a tanem ti ad-adda masarsarita a kas ipasimudaag ti paulo ti sarita, saan ket a pasig a lagip. Nagkadua a pasamak ti sarita: dagiti sangapulo ket tallo a lagip wenno sakbay a napasamak ti kalamidad ken ti agdama a napasamaken ti kalamidad. Ababa ngem namsek dagiti balikas a naaramat, diretsa a naisawang ken nailadawan ti kayat nga iyallatiw ti author kadagiti agbasbasa. Nalaka a maawatan…

2) TI AYAT … KEN LIPUT. Nasiken ti ayan-ayat da Hilda ken Andres kadagiti nasutil a gundaway. Nupay addan pamilia ni Andres, impateg latta ni Hilda agingga iti tanem. Mabasa a kas paset iti surat ni Hilda ken ni Andres:

“…Saanko a mailibak a sika pay laeng ti agikut itoy pusok iti laksid dagiti naglabas a tawen. Pammaneknek ti saankon a panagsapul iti sabali nga ayat.”

Nupay addaanen iti pamilia, di pulos binaybay-an ni Andres da Hilda ken ti anakna a ni Andrew. Impategna ida uray idi isun ti mayor ti La Purisima. Naggagar a nagawid manipud iti trabahona a pagaramidan iti kotse iti sabali a pagilian idi mabasana ti nakaam-ames a mudslide.

Iti katatao ni Andres a pagubbogan ti ayat, pagubbogan pay ti liput ta saan a napudno iti asawana.

3) TI KINAPATEG DAGITI KAYO. Iti tatang ni Hilda:

“Ti danum, maurnong kadagiti ramut dagiti kayo. In-inutento dagiti kayo nga iruar dagita a danum inton dumteng ti tikag. Umunanto a marikna ti Cadungunan dagiti umay a tikag a sungbatanto met dagiti dadakkel a layus.”

Ken daytoy pay, iti panagsarsarita ti ama ni Hilda ken ni Andres.

“Dagiti ramut dagiti kaykayo ti agpaay a tulang ti daga. Ay-ayto pay ti Cadungunan no agrunoten dagita a tulang. Saanton a maigawid ti pannakakalbo ti daga. Agbalinto ti Cadungunan a sementerio nga awanan padeppa.”

Nagserbi metten daytoy nga insawang ti lakay a kas pre-figure iti sibubukel a pakasaritaan.

Ken ni Andres, kinunana ken ni Hilda idi dimmagasda iti sirok ti higante a bittaog iti pantok ti turod iti nagbaetan ti Cadungunan ken Caangilan idi napan naggatang iti abastoda:

“Maysa a naindaniwan a lugar ti Cadungunan, Hilda…”

(Adda tuloyna)