ITI DUYOG TI SINGASING: Ti Maika-7 a RFAAFIL (Tuloyna)

KURAPSION KEN EKSPLOYTESION.

Ti kurapsion dagiti nababa a tattao babaen kadagiti nabileg. Inusar ni Andres ti bilegna kadagiti awanan gaway…

“No kaya ni Hilda a ket umay agyan idiay opisinak ta umaynak ibueltaan…”

Dayta ti sarkastiko a pannarita ni Andres iti ama ni Hilda. Ket daytan ti nakaipasngayan ti ilehitimo nga ayan-ayat.

Pasig a maipapan iti kinabileg ni Andres ti maika-10, maika-11 ken maika-13 a lagip. Eksploytesion ti kapatas babaen ti selective logging ti maika-10 a lagip. Eksploytesion iti trabahador nga agmulmula kadagiti bunubon nga ipil-ipil ti maika-11 a lagip. Eksploytesion ti district forester a bilbilinen ni Andres a puoranna dagiti naimula a pagatsiketen a kaykayo tapno makaalada manen iti pundo para iti reforestation ti maika-13 a lagip. Nasiken ti pannakaisuratna ken nalawag a maawatan ti eksploytesion dagiti nababbaba nga empleado babaen kadagiti nangato iti takemda. Inaramat ni Andres ti bilegna kadagiti adda iti babaenna para iti pagsayaatan ti akinkukua ti logging concession ken pakairamananna metten.

Maipapan iti eksploytesion ni Mayor Andres babaen ken ni gobernador nga akinkukua iti logging concession ti maika-12 a lagip. Bilbilinen ti gobernador nga ikalawada ti masakupanda a pagtarikaywan ta nagtaud iti logging concession ti kuarta a binusbosna iti itatapogna iti politika.

Kanser a sakit ti gimong a saan a maag-agasan ti kurapsion ken eksploytesion.

5) KIDDIS TI KONSENSIA.

Kinuna ti administrative officer ken ni Andres iti ospital a naganakan ni Hilda idi dinamag ti naud-udi no apay a nauma iti logging:

“Konsensia, partner,” inlingalingna. “Saanto a datayo ti agsagrap ngem dagitinto dadduma a parsua a pakairamananto dagiti sagibotayo.”

Uray ni Andres ket ay-ayamen ti konsensiana. Iti maika-4 a lagip, kinunana ken ni Hilda bayat ti panaglinongda iti sirok ti higante a bittaog iti nagbaetan ti Caangilan ken Cadungunan.

“Sayangka, Cadungunan.”

Ket iti udina, idi naimatangan ni Andres Galano ti buya ti Cadungunan Valley.

“Iti itatan-awmo, naipasabat iti imatangmo ti buya a saan sa pay a simmiplot uray iti kaalikutegan a pampanunot dagiti pintor ken sumasarita a mangiladawan iti kunkunada nga impierno.

Agay-ayus pay laeng ti kolor-kape a pitak iti adayo a baba. Sumagmamano a bubongan ti ipaspasirip dagiti nagkukuros a kaykayo a namalamalan iti pitak. Ad-adda a dagiti kasla nakabutbuteng a ramut dagiti kayo ti agpakpakita imbes koma a dagiti nalalangto a bulbulongda…”

Iti saan a pannakasarak dagiti bangkay da Barangay Chairman Andrew Gervasio ken ti pamiliana ken uray ti inana a ni Hilda Gervasio, timmulangen ti kiddis ti konsensia ken Andres Galano alias Andy Gale.

“Nagsublika iti sirok ti bittaog. Nagtakderka a simmango iti baba. Inukradmo dagiti takiagmo a kunam no adda sabatem nga arakupen. Naglulok dagiti tumengmo ket nagdissoda met iti daga.

Hilda! Andrew! inriawmo iti panunotmo; pinungotmo ti nakoloran a buokmo.

Iti alintataom, nagparang dagiti agtumban a higante a pinuon; mangmangegmo ti wanerwer dagiti makina a mangilalaaw iti pannakaungaw.

6) TI TEMA TI DEFORESTATION. Ti mapaspasaran itan a layus, flashflood, mudslides, landslides ket bunga amin dagitoy ti nakaro unayen a deforestation wenno pannakapukan dagiti kaykayo. Ti rigatna, urayen ti pinullo a tawen santo maisubli ti inungaw a kabakiran. Ken saanto a maisubli dagiti inungaw a kaykayo no addanto pay laeng dagiti nakabarong tagalog nga addaan iti dakkel a buksit ken atiddog nga ipus.

7) TI KATATAO NI ANDRES GALANO. Wenno Andy Gale a manglimlimo ta dina kayat nga adda makailasin kenkuana. Manipud iti kinataona a kinurap ti material a banag ken bileg nga awan mamaayna, pinarukno ti bales ti Ina Nakaparsuaan. Nabileg ti karakterisasion a naikawes kenkuana.

Manipud iti mangliwengliweng a tanap ti panagsuratan, naiyaon daytoy a sarita manipud iti mudslide dagiti sinurat ket naidiaya iti 7th RFAAFIL tapno kirkiranna dagiti naalikuteg a pampanunot nga agpanunot iti pagimbagan ti sapasap.

Nabara a kablaaw iti author!

(Adda tuloyna)