ITI DUYOG TI SINGASING: Ti Maika-7 a RFAAFIL (Tuloyna)

TI PANNUBOK ITI USOK

Sarita ni Clarito de Francia

Maika-5 a Gunggona, naipablaak iti Bannawag, Oktubre 5, 2009.

ABABA A TALDIAP ITI SARITA: Minasan. Iti kaunegan nga usok wenno Level 700 ti nakadanonan da Mark, ken dagiti kasinsinna a ni Enteng, Joe ken Noel. Dita ti napananda ta nangato ti kalidad ti maalada a naba.

Agparparikna ken ni Mark ti karkarna a mapaspasamak gapu iti napaliiwna nga ititinep ti danum iti botasda ken ti mangmangegna a karasakas ti danum. Ngem naglak-am laeng iti kantiaw. Idi kamangenna ti man way, napaliiwna a pumigpigsa ti karasakas ti danum. Dinagdagna dagiti kaduana nga umaon ket ibatidan dagiti naba, ngem nangibaklay latta da Noel ken Enteng. Pinartakanda ti immuli. Nakalabasdan iti sumagmamano a nagsasangaan ti usok idi malapunosen ti botas ni Mark.

Gapu ta pumigpigsa ti mangegna a karasakas ti danum, napanunot ni Mark a sumrekda laengen ken ni Joe iti nabatoganna a sanga ti usok. Limmagto a nanglisi iti nagsangaan, ngem binagkat ti napigsa ken marapitak nga allon ni Joe. Inalistuan ni Mark ti nagpangato. Pinukkawanna dagiti kasinsinna ngem awan simmungbat.

Naginana. Iniddepna payen ti spotlightna. Ngem dimmegdeg ti danagna idi nadlawna ti danum iti yanna. Marigatan payen nga umanges. Nakasapul manen iti sabali nga usok. Sinurotna ket limmukay ti aangsanna. Nakasarak iti man way nga umulianna nga agpangato. Naginana.

Nalagipna ti napalabas iti biagna. Ni Viring a kaingungotna. Ti aramidda nga agminminas. Nagna manen. Kimmapsuten ti silawna. Nagna latta. Naitikleb ket naipuruak ti skullguardna. Ginangtanna ti spotlightna ngem saanen nga agsilaw.

Nagar-arikap iti kasipngetan iti pannagnana. Agibarsak iti bato tapno paliiwenna no natangken ti lugar a papananna. Nalagipna ni Apo Mugna, ket nagkararag ken nagbabawi. Adda nariparna a kasla dagum a lawag ngem nakapsuten ket naawanan iti puot.

Dimteng dagiti immarayat. Insalakanda ni Mark. Ngem iti panunot ni Mark, idiannan ti agminas ket agsublida laengen nga agassawa sadiay Banaue, ken dumagasdanto idiay Cauayan, Isabela a lugar da Viring.

PAGPINTASAN TI SARITA: Nasiken ti pannakaiparang ti nalabes unayen nga aramid dagiti agminminas ken Ina a Nakaparsuaan kas iti sumaganad a mabasa:

“Mautobnan a kaarngi dayta ti panangpasakitda iti nakaparsuaan. Sinsilen wenno bungbongenda ti nakatangtangken a bantay. Arigenggenen, panalbuongen, pabettaken ken derderenda ti lasag ti daga. Karamanda a nangparnuay kadagiti rikki, agbitbitin, matmatnag, natatadem a batbato. Rumekenda dagita a kasla tangan-saka sa iruarda nga ipagiling a pangalaanda iti tapok a lutuenda nga agbalinton a balitok.”

Maibugasan dita ti panagibtur ni Ina Nakaparsuaan gapu iti aramid dagiti agminminas. Saan laeng a pagbalinen dagiti minero a kasla pagsusungkaan dagiti bantay, mairaman pay a mapugipog dagiti kayo a mausar a pagistaka kadagiti usok. Dagiti agsasallupang nga usok ti sugat-laslasag ni Ina Nakaparsuaan. Kastoy ti pannakailadawanna itoy a sarita:

“Ngem ti mawangwanganda agbalin a sugat: nangato, nababa, nalawa, babassit, kuadrado, rektanggulo, nagarko, awan sukogna, namaga, agtedted, napudot, nalamiis, natalged, narisgo wenno marba nga usok a panawan ken baybay-anda kalpasanna… Nalabit a nauman nga agiturtured ti Nakaparsuan…”

Wen, nauman iti panagituredna ni Ina Nakaparsuaan.

(Adda tuloyna)