ITI DUYOG TI SINGASING: Ti “Ti Sarukod ni Moises” ni Juan S. P. Hidalgo, Jr. (Maikadua a paset)

Nagsanay ngarud a naimbag ni Peter. Nagpabalakad kadagiti swimming instructor iti umno a panaglangoy. Nadumaduma ti mapanna pagsanayan agraman iti baybay. Orasanna met ti panaglangoyna. Nagbalin a managkararag. Naggayuno pay ket inggiddanna iti Ramadan dagiti Muslim a gagayyemna.

Iti bakasion iti klase iti Marso 2009, nagawid sadiay Brgy. Salvacion. Kayatna a padasen ti pardasna nga aglangoy iti dan-aw. Inkuyogna ni adingna a Danny ket daytoy ti nangoras iti pardasna nga aglangoy.

Idi agawidda, impudnona ti panggepna a mangala iti datdatlag a sarukod ni Propeta Moises iti tengnga ti rabii inton Biernes Santo.

Iti Huebes Santo, nagparang manen iti tagainepna ti datdatlag a lakay. Imbilin ti lakay a di mangikuyog iti kaduana a mapan iti dan-aw ken uray ania ti mapasamak iti panaglangoyna, ituloyna latta.

Iti rabii ti Biernes Santo, Abril 10, nagturong ni Peter iti dan-aw. Nagsagrap iti adu a lapped iti panangpadasna a mangala iti sarukod. Apaggammatna ti sarukod, timmayaben daytoy. Naisurot ni Peter iti law-ang. Nagparang kenkuana ti datdatlag a lakay a nabalkot iti lawag. Kinuna ti lakay a maited kenkuana ti pagrebbengan nga agaywan iti Daga ken iti Sangkataoan ket agingga nga adda kenkuana ti sarukod, awanto ti puersa iti rabaw ti daga a makabael a mangparmek kenkuana. Bilinenna laeng ti sarukod ket agtungpal daytoy kenkuana.

KARAKTER: Nadayaw ken napakumbaba nga agtutubo ni Pedro Malong. Dina impasindayag ti abilidad ken ti kinataona, uray no naynay a mangabak iti salip ti linnangoy. Ammona nga isagana ti bagi, isip ken kararuana.

Nadayaw ken managpakumbaba ni Peter Santiago. Masirib. Napintek ti pannakirelasionna iti Mannakabalin. Mamati iti pasintawi ket dayta ti insaganaanna.

Ti datdatlag a lakay ti nangibunannag a maymaysa a tao da Pedro Malong ken Peter Santiago babaen kadaytoy nga imbalikasna: “Saganam a naimbag ti bagi, isip, ken kararuam tapno saankan a mapaay manen a mangala iti sarukod ni Propeta Moises.” Napasamak ti proseso ti reincarnasion uray no saan nga imbaga ti author dayta a banag.

LUGAR: Napasamak iti dan-aw iti Brgy. Salvacion, Rosales, Pangasinan. Nupay nagduma iti panawen dagiti agbibiag, maymaysa a lugar ti nakapasamakanda.

PACE wenno PACING: Nagtaray ti sarita a kas kidkiddawen ti akem ken panawen dagiti agbibiag. Diredirekta ti pasamak, ababa ken namsek. Saanen a kasapulan ti taldiap-napalabas ken dadduma pay a tekniko ken devices iti panagiparang kadagiti pasamak iti maysa a sarita.

TEMA:

1. Ti relasion ti tao iti Mannakabalin.

2. Ti reincarnasion

ANALYSIS: Nupay saan a nadakamat, ti relasion ti tao iti Mannakabalin ti maysa kadagiti tema a nadependeran itoy a sarita. Ta adda pay aya naim-imbag a pasamak iti biag ti tao no di ti naannayas a pannakirelasionna iti Namarsua? Daytoy laeng ti pakariknaan iti napudpudno a pannakapnek ken pagubbogan ti ragsak a di mabubos. Iti daytoy a nariribuk a lubong a nagpuniponan ti nagduduma a basol, umno la unay ti panagtalinaed a kankanayon iti salinong ti Mannakabalin tapno maiyadayo iti pakaisagmakan, pannakapukaw iti dana ti biag, ken pannakaiyaw-awan iti panggep no apay nga agbibiagka. Adda panggep ken rason no apay a dumalantayo iti daytoy a biag, ket dayta a rason ken panggep ket saan a rumbeng a baybay-an ken yaleng-aleng wenno isukat kadagiti agpukaw a gatad.

(Adda tuloyna)