Iti eskuelaan, di saktan dagiti ubbing

AGANNAD koma dagiti  mannursuro ta serioso ti Department of Education  ken ti linteg a mangdusa iti asinoman a titser  a mapaneknekan a nagbasol  a nangpasakit kadagiti adalanda.

Emosional. Sobra nga stress iti trabaho ti rason ti maysa a titser a nangkabil iti adalanna. No bangad ti adalan ket di nagustuan ti titser ti aramid, panagsasao ken ugali daytoy, posible a dina nateppelan ti bagina ket napasaktanna ti ubing.

Ngem mangibunga iti saan a nasayaat ti kuddot, tungpa, baut, malo, panangbarsak iti eraser ken chalk ken dadduma pay a panangpasakit iti pisikal a bagi ti ubing iti uneg a mismo ti eskuelaan. Uray ti panangpabain, bugkaw, lais ken panangipangngeg iti di malamot ti aso a balikas iti ubing ket saan a nasayaat. Ma-trauma ti ubing ket kabutengnan ti mapan agiskuela. Dinan maiyulo ti agadal. Pagangayanna, agikkat ket mailiklik kenkuana dayta a pribilihio ti edukasion a rumbeng koma nga agpaay kenkuana. Ta maysa a pribilihio ti edukasion a saan a rumbeng a mailiklik iti uray asinoman nga indibidual, aniaman ti kasasaadna iti biag, nasalun-at man ken addaan iti an-annayen.

Tinawen nga adda latta dagiti titser a maipadamag a nangpasakit iti adalanna. Isu a nasken ti ballaag kadagiti amin a mannursuro a dida koma aramiden daytoy a banag. Ta saan nga anaken ti DepEd dagiti mannursuro a  mangpasakit kadagiti ubbing.

Kas itay napalabas, maysa a mannursuro iti Cambuac, Elementary School iti Sikatuna, Bohol ti sinuspinde ni Ombudsman Ma. Merceditas N. Gutierrez kalpasan a napaneknekan a sinaktanna ti adalanna nga agedad iti siam. Nasuspende ti nasao a babai a titser iti innem a bulan, ken saan nga agsueldo kabayatan ti suspensionna.

Saan laeng a binugkawan ti titser ti ubing, kinuddot ken tinambiogna kano ti bukot daytoy gapu ta saan a simrek ti ubing iti klasena no di ket napan nakiay-ayam kadagiti padana nga adalan ti eskuelaan.

Nagdarum dagiti dadakkel ti ubing iti pannakapasakit ti anakda. Impadoktorda pay tapno adda medical certificate nga ebidensiada iti darumda. Gapu itoy a medical certificate ken ti testimonia ti mabutbuteng nga ubing, napaneknekan a nagbasol ti mistra ket naipataw kenkuana ti umno a dusa.

Wen, tao laeng ti titser a mailaw-an a mangpasakit iti adalanna. Ngem no mabalbalin, lapdan koma ti bagi a mangpasakit iti adalan.

Kadagiti met ubbing nga ages-eskuela, ipapatiyo ti agadal. Saan a nangnangruna dayta ay-ayam nga ay-ayam. Lalo kadagiti mahilig la unay iti kompiuter nga aglibas iti eskuelaanda wenno saanda a sumreken tapno laeng makapagkompiuterda. Kasta met dagiti mahilig iti ay-ayam a biliar. Tambay sa biliaran a kunada. Saanyo nga aramiden daytoy ta kaipapananna ti panangdadaelyo a mismo ti naraniag a masakbayanyo.

Kadagiti met nagannak, nasken ti nasayaat a panangmonitor kadagiti annak nga agis-iskuela no sumsumrek met laeng dagitoy iti klaseda a saan ket nga iti uneg ti kompiuteran wenno biliaran, no ar-aramidenda met laeng dagiti asaynmentda ken projectda.

Nasken met a menteneren ti nasayaat a relasion ti nagannak-titser tapno nasaysayud ti pannakamonitor ti panagiskuela ti anak.

Ti nasalun-at a relasion ti nagannak ken ti titser ket lapdanna dagiti posible a pannakapasamak iti panangdusa wenno panangkabil ti titser iti bangad nga adalan. Ta no nasalun-at ti relasion ti titser ken ti nagannak, kasaon no kua ti titser dagiti nagannak maipapan iti aramid, ugali, tabas ken kasasaad ti adalan iti uneg ti eskuelaan: no kuneng ken munnel, no bangad ken sadut, no saan a sumsumrek iti eskuelaan, no daytoy ket managlangan ken kanayon ti inna cutting classes.

Masabat amin amin a parikut iti uneg ti eskuelaan babaen iti panagtitinnulong ti titser ken nagannak a mangtarabay kadagiti annak. Masabat amin a parikut babaen ti diplomasia wenno panagsasarita iti naannayas.

Awan koman ti madusa pay nga ubing. Awan koman ti madusa pay a titser. #