Iti global a kompetision, babassit a pagilian ti agsagaba

Maysa a damag a naipablaak itay nabiit iti aginaldaw a pagiwarnak ti nakaawis iti imatang ti Tawid News Magasin. Maipapan daytoy ti pannakaibuntog dagiti tagilako a nababa unay ti presioda ditoy pagilian manipud iti China.

Segun iti damag, limmaka unay ti presio dagiti tagilako ti China gapu iti panagpababa ti consumer demand iti Mainland.

Maitudtudo a maysa a gapu ti limmakaan dagiti tagilako ti China ti Severe Acute Respiratory Syndrome (SARS). Gapu iti daytoy a sakit, kaykayaten dagiti agindeg ti aggian iti uneg ti pagtaenganda ken naggikayda kadagiti lugar nga ayuyang dagiti tattao kas kadagiti pagpalpaliwaan ken pagtagilakuan. Pinarnuay ti SARS ti panagamak dagiti tattao a maakaranda iti daytoy a sakit nga awan pay ti natakuatan nga agasna.

Iti panagpababa ti demanda dagiti aggatgatang kadagiti produkto ken tagilako ti China, napilitan nga agbirok dagiti turayen daytoy a pagilian iti pagibuntoganda kadagitoy sobra a food items ken consumer goods kas iti Pilipinas.

Di ngarud nakakaskasdaaw a ginundawayan daytoy dagiti negosiante ditoy pagilian ket inyad-aduda ti orderda iti China agsipud ta bimmaba ti presio ti tagilakoda iti agingga iti 50 porsiento. Lumiksab la ketdi iti dakkel dagiti negosiante ditoy pagilian.

Iti biang dagiti consumers, dakkel ti pakapalag-anan ti bulsada ti kaadda dagiti magatangda a tagilako a nakalaklaka.

Ngem kadagiti agparpartuat ken mannalon, madegdegan latta ti problemada nangnangruna iti pannakailako dagiti produktoda.

Uray idi awan ti SARS, reklamon dagiti agparpartuat ken mannalon ti pannakaibuntog ditoy pagilian dagiti nalaka a tagilako manipud kadagiti sabali a pagilian.

Bunga daytoy ti pannakaipalubos ti iseserrek ditoy pagilian dagiti tagilako dagiti ganggannaet a pagilian kas ginubuay ti pannakikappeng ti pagilian it World Trade Organization para iti sangalubongan a panagtagilako.

Sakbay daytoy, impeksan dagiti mannalon, negosiante, mammartuat ken sumagmamano nga opisial ti turay iti dida ikakanunong iti iseserrek ti pagilian iti panagtagilako iti sangalubongan agsipud ta iti paniriganda, saan a kabaelan ti pagilian ti makikompetensia kadagiti ganggannaet a pagilian. Iti global a kumpetision, di pay nakasagana dagiti industria ditoy, dayta ti ipetpettengda. Ngem nagtungpal laeng ti anek-ekda nga awan binambanagna.

Mainayon pay ditoy ti panangipuslit kadagiti tagilako.

Apay ngarud a gumatang dagiti umili iti lokal a produkto no agkaiwara dagiti nalaka ken imported a tagilako?

Problema a dakkel daytoy dagiti masalapon nga industria. No saanda a sisasagana ken dida pay kabaelan ti makikumpetensia, di pagduaduaan a maipapaigidda iti dalan, mapanawan nga agnguy-a.

Iti global competition, dagiti laeng napigsa ken nabileg a pagilian ti agturay. Kaasi piman dagiti babassit a pagilian nga agsagaba.#