Iti Ilocos Sur, agwagayway latta dagiti Singson

Komentario ni Tatang Lakay

Maikadua a paset

 

 

Kuna dagiti agpalpaliiw iti politika nga iti daytoy a panagsangoda ken ni Atty. Beltrand Baterina, awan ti sawir ti panagsubli ni Ronald Singson iti politika kas mangibagi iti First District ti Ilocos Sur agsipud ta adda iti likudanna ti political kingpin nga amana ken  ti suporta dagiti amin a mayor iti umuna a distrito ti probinsia.

Manamnama met ti pannakailayon ni Bokal Jeremias “Jerry” Singson iti puestona. Maipalagip a nagtugaw pay ni Bokal Singson a bise gobernador idi naginana ti kabsatna iti politika iti tallo a tawen.

Uray ni Vice Governor Deogracias Victor “DV” Savellano, manamnama a mangabak iti agdama a puestona iti daytoy a panagrupakda iti kinabise gobernador ken ni dati a Bokal Efren Rafanan, Sr. Namin-anon a nagbalubal da Savellano ken ni Rafanan iti kinagobernador ngem saan a nabaelan ti dati a bokal nga imbalat ti immuna.  Kuna dagiti agpalpaliiw iti politika a narigrigat manen nga abaken ni Rafanan ni Savellano agsipud ta naikkan iti naam-amnut a patapat ti kinasinged da Gov. Singson ken ni Vice Gov. Savellano gapu iti panagkallaysa da  Cong. Ryan ken ni Patricia nga anak ti bise gobernador.

Iti Vigan City, awan ti nakaitured a mangdungpar ken ni incumbent Mayor Eva Marie S. Medina. Anak daydi nag-Gob. Evaristo “Titong” Singson, kabsat ni Gov. Chavit, ni Mayor Eva ngem nakatakder daytoy iti bukodna a gapuanan ken nakalaksid iti anniniwan ti nalatak nga amana. Babaen ti panangidaulo ni Mayor Eva, naglupos ti Vigan manipud iti maysa nga ordinario nga ili ket nagbalin a maysan kadagiti kangrunaan a destinasion dagiti turista iti Amianan. Kadagiti political analysts, arig panagbekkel ti aramiden ti asinoman a mangdungpar ken ni Mayor Eva gapu kadagitoy a gapuananna nga ad-adda a nakaipateganna kadagiti kalugaranna iti siudad ti Vigan.

Uray ni Mayor ti Caoayan Germelina Singson-Goulart, kabsat ni Gov. Chavit, ket awan ti sumango kenkuana iti daytoy a panagpailayonna. Ngamin iti umuna a terminona, addan dagiti timmakder a gapuananna a saan a naaramid dagiti immun-una a nangituray iti Caoayan, kas iti pannakaipatakder ti moderno a tallo kadsaaaran a balay ti ili.

Iti sangguniang panlungsod, idi damo, karaman iti tiket ni Mayor Eva ti anakda ken ni dati a Mayor ti Vigan Ferdie, ni Konsehal Janina Carine Medina-Fariñas ngem sakbay ti deadline iti panagipila iti substitution, nagatras ni Konsehal Janina ket naisandi kenkuana ti sabali a kabsatna, ni Juan Carlo. Maipalagip a nabakante ti puesto ti bise mayor ti Vigan idi nagkandidato daytoy a para congressman iti umuna a distrito iti naangay nga espesial nga eleksion kalpasan a naideklara a bakante ti puesto ti diputado gapu iti napasamak ken ni Diputado (idi) Ronald Singson iti Hong Kong.

Nagpangato a bise mayor ni Konsehal Lourdes Baquiran, number one a konsehal gapu ta isu ti kadakkelan ti butos iti eleksion idi 2010. Ni Janina Carine ti napili ti partido a mangsukat iti binakantean ni Konsehal Baquiran a puesto.

Iti Cabugao, masigurado a lumsot ni dati a Sangguniang Kabataan Federated President Deogracias Victor Jose Savellano, Jr. iti panagtarayna a bise mayor, katiketna ni incumbent Mayor Edgardo S. Cobangbang, Jr. Kabangbangloan ni Cobangbang kadagiti umili ti Cabugao gapu kadagiti adu a proyektona a mangpadur-as iti panagbiag dagiti kailianna ken iti ekonomia iti ilina ket iti panagkapartidoda ken ni ub-ubing a Savellano, kuna dagiti political analysts nga awan ti makaibalat iti daytoy a tandem da Cobangbang ken ni Savellano, Jr.

Ditoy umuna a distrito ti Ilocos Sur, ad-adda pay a rimmangrang ti bituen dagiti ag-Singson, kasta met a nairaman a rimmaniag dagiti naikamang kadakuada ket awan a pulos ti makita uray bassit nga ulep a mangkumot iti kinarimatda.#