Iti Ilocos Sur, agwagayway latta dagiti Singson

Komentario ni Tatang Lakay

Umuna a paset

 

VIGAN CITY – Ditoy Ilocos Sur, awan latta ti masirmata iti asideg a masakbayan a makabael a mangpekka iti panagturay dagiti agkasinsin a Singson iti nasuroken nga uppat a dekada.

Kadagiti dadduma nga agpalpaliiw iti politika ditoy probinsia, kunada pay nga ad-adda ketdi ti ibibileg ti kapet  dagiti Singson iti turay iti manamnama a panagwagayway dagiti sumarsaruno a kaputotan dagitoy iti masungad nga eleksion inton Mayo 2013.

Iti umuna a distrito, awan ti makita a tibbakol iti panagkandidato dagiti dua nga annak ti gobernador, ni Congressman Ryan Singson nga agkandidato a para gobernador ken ni dati a Congressman Ronald Singson nga agkandidato para diputado iti umuna a distrito. Mapaliiw met nga ad-adda nga immamnut iti puestoda dagiti kakabsatna a da Bokal Jerry Singson ken ni Caoayan Mayor Germelina nga agpada a pailayon iti puestoda. Ingget raniag iti agdama ti bituen ti kaanakanna a ni Vigan City Mayor Eva Marie Singson Medina ket awan ti timmakder a sumango kenkuana iti kinamayor iti Vigan City.  Karaman pay nga agwagayway dagiti maibilangen a kameng ti pamiliana a pakairamanan ti abalayanna a ni Vice Gov. Deogracias Victor Savellano nga agpailayon iti puestona ken ti anakna a ni dati nga SK Federated Presidente Victor Jose nga agkandidato para bise mayor iti Cabugao.

Idi damo, naipadpadamag a ni manen Gov. Luis “Chavit” Singson ti tumaray a para gobernador iti probinsia ngem idi panagipilaanen iti certificate of candidacy, ni metten Congressman Ryan Singson ti indeklarana a kumandidato para gobernador. Katiket ni Cong. Ryan Singson ti katuganganna, ni incumbent Vice Gov. Deogracias Victor “DV” Savellano nga agpailayon iti dayta met la a puesto iti masungad nga eleksion. Karaman met iti tiket ni incumbent sangguniang panlalawigan member Jeremias Jerry” Singson a para bokal.

Ni Tagudin Mayor Roque “Jun” Verzosa, Jr. ti kasango ni Cong. Ryan Singson a para gobernador. Nupay napintas ti rekord ni Verzosa iti panangaywanna iti Tagudin iti nagsasaruno a tallo a termino, kuna dagiti political analysts a saan nga umdas dagitoy a mangital-o kenkuana iti kinagobernador ti probinsia. Segun kadakuada, iggem ni Gov. Singson dagiti alas agsipud ta kaaliadona amin dagiti mamayor iti probinsia malaksid laeng ti napigpigket itan a langenlangenda ken ni dati a House Deputy Speaker Eric Singson nga iti naminsan a basingkawel ti politika, nagsangdoda nga agkasinsin iti kinagobernador.

Madakamat ditoy a nupay adda dagiti mamayor a sabali ti partidoda, nakikappengda iti koalision iti Bileg Party, accredited a partido ni Gov. Singson, ket impatalged dagiti town executives bayat ti maysa a miting a naangay iti Baluarte, pagtaengan ti gobernador, a dagiti kandidato ti teddek ti politika iti probinsia ti itangguyodda iti kinagobernador ken congressman iti eleksion inton Mayo 2013.

Nabileg ti payapay ti politika ken ni dati a Congressman Ronald Singson ket sublianna met laeng ti puestona a mangibagi iti umuna a distrito ti Ilocos Sur iti pagpandayan linteg iti Kamara.

Kasangona para diputado ni Atty. Beltrand Baterina ti Sto. Domingo, Ilocos Sur.

Madakamat ditoy nga idi binakantean ni dati a Congressman Ronald ti puestona kalpasan ti panangkonbiktar kenkuana ti maysa a korte iti Hong Kong mainaig iti kasona iti droga, naangay ti maysa nga espesial nga eleksion a nagbalubalan ti kabsatna a ni Ryan ken ni Baterina. Imbalat ni Ryan Singson ni Baterina.

Kadagiti agpalpaliiw iti politika, abaken latta ni dati a Congressman Ronald Singson ni Baterina iti daytoy a panagbalubalda a mangibagi iti umuna a distrito ti Ilocos Sur.

(Adda tuloyna)