ITI INDAYON NI LAGIP: Dagiti natarumamis a siit iti dalan (Maikadua a paset)

Nabayag a diak nakatimek. Kasla diak patien ti nangegko. Diak impagarup a dayta a banag ti kiddawen ni Jason. Ngem saan a nagbiddut ti panagdengngegko: kayat ni Jason ti pre-marital sex!

Inawidnak manen. Insanggirna ti ulok iti nabayog a barukongna. Mariknak ti aprosna iti ulok, namitlo a naipekkel iti teltel sa nagbayag iti bukotko.

Kasla kayatko ti kumayakay ngem saan nga agtignay dagiti takiagko ken bagik. Diak ammo no amak wenno panangiyalikaka iti bagik ti marikriknak.

“No pudno nga ay-ayatennak, patgannak koma,” inayarasaas ni Jason idinto a kinagatna iti nalag-an iti lapayagko.

Napakidemak. Agkarayam manen ti naisalsalumina a bara iti bagik ket simgar pay dagiti dutdotko.

Inangayko ti amin a pigsak a rimmuk-at kenkuana. “Ngem apay a dayta, Jason?” kinunak.

“Pangipaneknekam iti kinapudnom.”

“Agduaduaka pay kaniak?”

“Saan. Ngem no itedmo ti kiddawko, ad-adda manen ti panangipategko kenka ta masigurokon nga aramidem ti amin kas pangipakitam iti panangipategmo met kaniak.”

“I-ikkannak koma iti naan-anay a panawen nga agpanunot,” nakunak.

“Ita koman nga agdesidirka,” nakuna ni Jason.

“S-saannak pay a sisasagana ita. Pangngaasim, dita koma agdarasudos iti maysa a banag a mabalin a pagbabawyantanto iti masakbayan,” nakunak ket timmakderakon sako inyawis nga aggawidkamin.

DIAK makatagtagari a simmangpet iti kaserak. Nupay sinutildak manen dagiti kabordmeytko iti inkam panagdeyt ken Jason, awan ti gaganaygayak a nakiinnangaw kadakuada, idinto a naynay nga ipadpadayawko ti kinamanagayat ti pogi a nobiok. Kasla kawaw ti panunotko ita.

Dua kadagiti kabordmeytko ti mangiyang-angaw nga agawenda kaniak ni Jason. Madlaw ti kinadekket dagitoy no pasiarennak ti kaayan-ayatko.

Uppatkami iti maysa a siled. Da Rowena ken Gina iti maysa a double deck bed. Ni Manang Evelyn a nadanonko a nakailad ken agbasbasa iti libro ti kaduak iti sabali a double deck bed. Iti akimbaba ti iddana.

Inyiladko. Ngem alusiisennak. Riribukennak ti kiddaw ni Jason.

Itedko ngata ti kidkiddawenna? Ngem kaipapananna metten ti pannakaibaba ti kinataok.

“Pay a dika makatalna, Myrna? Sumanakuntipka kada sumanennaay,” tinannawagannak ni Manang Evelyn.  “Nagapakayo ken ni Jason?” manutsutil ti isemna.

“Saan, manang…”

“’Pay ngarud a mariribukanka? Makatulongak kadi?”

Napaturedak a nagpudno. Graduating iti B.S. in Psychology iti U.P. College of Baguio ni Manang Evelyn. Kadakami amin a borders, isu ti manang a pagpatulonganmi kadagiti amin a parikutmi. Sidadaan met a tumulong toy Ilokana a Novo Viscayana.

“Nia meten ni Jason,” napasakuntip. Kinamangna ti silulukat a tawa sana binuya ti kasalengan ti Forbes Park a dayaen ti Engineer’s Hill.

“Dimo patgan ti kiddawna!” kinunana idi agangay.

“Amangan no guraennak, manang. Diak ammo ti mapasamak kaniak no isinanak ni Jason.”

“Denggennak, Norma,” iniggaman ni Manang Evelyn ti agsumbangir nga abagak. “No pudno nga ay-ayatennaka ni Jason, saan nga agkiddaw iti pakadadaelam!”

(Adda tuloyna)