ITI INDAYON NI LAGIP: Dagiti natarumamis a siit iti dalan (Umuna a paset)

Maysaak a head teacher iti maysa nga elementaria iti probinsia. Agtawenakon iti uppat a pulo. Nalabit a diak koma pay nagteng daytoy a kasasaad ken pannakapnek iti biag no saanak a nagbalin a natibker iti pannubok iti napalabas. Pannubok a dandani nangikulbo iti arapaapko iti biag ken ti pamiliak.

No nagbalinak laeng a narasi wenno nalupoy, saan koma a naalut-ot ti pamiliami iti kinapanglaw. Diak koma natulongan dagiti tallo a kabsatko a nakagraduar iti kursoda: ni Roland, maysa nga agriculture engineer ken agtrabtrabaho iti dakkel nga agri-farm idiay Australia, ni James, computer engineer ken agtrabtrabaho iti maysa kadagiti kadakkelan a kompania idiay Subic Industrial Zone, ken ni Shekinah, nurse iti maysa nga ospital idiay Saudi Arabia.

Iti pannakaragpatko iti agdama a kasasaadko iti biag, nagdalanak iti nasiit a dalan. Nangruna iti ayat….

DAGITI laengen tuktok dagiti saleng ken eucaliptus ti madanon ti raya ni Apo Init. Nalamiisen ti aglawlaw a pugpug-awan ti pul-oy ti agpakpakadan a Nobiembre. Ngem awan pay ti panggepmi nga agawid ken ni Jason a kaayan-ayatko. No kastoy ngamin nga agpasiarkami pasaray urayenmi a kuddotennakamin ti angep sakamto agawid.

Mabuyami iti Melvin Jones dagiti pareha a naulimek a nakadalupisak iti berde a football ground ti Burnham Park kabayatan iti inakm panangkutim iti sangasupot a mani.

Inawisnak ni Jason nga agpagnapagnakami ket nagkibinkami a nangkamang iti rebulto ni Aliguyon a nagbaklay iti ugsa iti sulina ti amianan-a-daya ti football ground. Nagtugawkami iti dalumpinas a bato a nangtallikud kadagiti nakataytayengteng ti labagada a sabong ti dahlia.

“Umadanin ti agmakatawen nga anibersario ti relasionta, Myrna,” pinetpetan ni Jason ti kannigid a dakulapko sana inagkan iti namitlo.

Nakariknaak iti bara a nagkarayam iti bagik ket pimmardas ti panagangesko.

“Kasano a selebraranta ti anibersariota?” dinamagko met iti kalugarak ken kinaubingak a nobiok.

Inawidna ti rupak sana inap-aprosan. Nakapungpungay ti matak a nangperreng kenkuana. Manen, nagkarayam ti bara iti sibubukel a kinataok. Nagyamanak iti nalimed ta inayatnak ni Jayson. Kinaagpaysona, idi pay la high schoolkami, kraskon ni Jayson. Nabayagko met nga inur-uray nga agdaton kaniak. Siguro, kunkunak man, dinak ngata type ta agpadakami a nagtaud iti nakurapay a pamilia. Ngem nagarem kaniak idi maikadua a tawenmin iti kolehio. Ditoy met la a lugar ti nangsungbatak kenkuana.

“Myrna, adda koma kiddawek kenka a regalo iti inta panangselebrar ti agmakatawen nga anibersario ti ayan-ayatta.”

“Ania dayta? No la ket kabaelak, itedko kenka nga awan sawirna. Siak ti mangilibre kenka idiay Jollibee? inggarikgikko.

Pinerrengnak iti napaut. Manulsulisog dagiti narimat a matana. Nalag-an ti panangawidna ti rupak sana inyarasaas ti kiddawna.

Napakietak. Diak nakatimek.

(Adda tuloyna)