Footer

ITI INDAYON NI LAGIP: Nakasalda nga ayat

Tallo nga aldaw a saan a nagparparang ni Sir Marius iti pagtagilakuan. Intawagna ken ni Brenda a no adda problema, iyawagda laeng kenkuana.

Nadamagmi iti maysa a katulongda a pimmanaw ni Sir Marius iti pagtaenganda nga agassawa ket aggigian iti maysa a condominium. Saan kano nga impalubos ni Ma’am Lyka a sumurot ti anakda.

“Nasaysayaat sa nga inta kitaen ni Sir Marius,” nakunak. “Amangan no kasapulannata.”

“Dangnga, no apanta, ad-adda a dumagsen ti ririda nga agassawa. Ad-addan ti panagipapan ni Ma’am Lyka nga agpayso nga adda nalimed a relasionyo ken ni Sir Marius.”

“Ania daytoy a mapaspasamak? No adda la dakkel nga urnongko, agikkatakon iti trabahok,” nakunak.

“Ha? No agikkatka, pangalaam iti sustentom? Numona ket agturposkan,” minulagatannak ni Brenda.

Napatugawak. Ania ti aramidek? Agparparikna kaniak nga adda pay dakdakkel ken nakarkaro a mapasamak iti nagbaetan da Sir Marius ken ni Ma’am Lyka agingga iti addaak iti pagtagilakuan.

Uray idi addaakon iti eskuela, maburburiborannak latta. Saanko a maimdengan a nalaing ti leksionmi. Nakadlaw sa ti maysa a kaklaseak ket sinutilnak nga in-labak ta adayo ti yuyeng ti panunotko. Napasennaayak. No ammona la koma ti problemak.

Iti dayta a lawas, diak nakita ti anniniwan ni Sir Marius. Saan pay a naggawid iti balayda. Saan kano met a palubosan ni Ma’am Lyka a sunduenna ti anakda iti pagadalan. Adda kano tinangdananna a bantay ti ubing tapno saan a makaasideg ni Sir Marius.

No mabalin laeng, kayatko a mapan sarungkaran ni Sir Marius iti condo a yanna. Ammok a malmalday gapu iti dumakdakes a relasionda nga agassawa. Ammok a kasapulanna ti mangidalimanek iti kuartona, ti mangasikaso kadagiti kasapulanna.   Ngem pinengdak ti bagik. Ania koma ti gapu a bumallaetak iti ririda nga agassawa? Problema ti agassawa ti nagsinaanda, isuda ngarud ti mangrisut. No mapanak iti condo ni Sir Marius, ad-adda laeng a kumaro ti dida panagkinnaawatan aglalo no maammuan ni Ma’am Lyka ti panangpasiarko iti asawana. Kayarigak ti naipit iti nagbaetan ti dua nga agtuptupa a bato.

Diak ammo no apay a maseknanak unay iti mapaspasamak iti nagbaetan dagiti agassawa. Ngem dakkel ti simpatiak ken ni Sir Marius agsipud ta saan nga agpayso ti ipabpabasol kenkuana ti asawana. Nakaro unay ti panagimon ni Ma’am Lyka ket makitak a nabulsekanen iti panagipapanna. Uray ngata asino ti mangipalawag a nagbiddut iti panangpabpabasolna ken ni Sir Marius ket saanna a patien.

Idi madanon ti panagsueldok, nakaikeddengak nga agikkatakon iti pagtrabahuak. Diak kayat a marakrak ti taeng ni Sir Marius gapu laeng kaniak. Nasaysayaat a siak ti pumanaw iti biagda nga aggasawa.

(Maituloyto)